Menntamál - 01.08.1967, Qupperneq 76
170
MENNTAMÁL
— Kennarar segja iðulega, að þetta eða hitt þurfi Ríkis-
útgáfan að gera, og flest er það rétt, en gallinn er bara sá,
að næsta takmarkað er hægt að gera af fjárhagsástæðum. Það
væri mikill styrkur fyrir viðleitni útgáfunnar, ef skólarnir
og kennararnir keyptu almennt og notuðu það, sem hún
gefur út af hjálpargögnum, svo að meira væri hægt að gera
af þessu tagi.
— Það er sérstaklega tvennt, sem Ríkisútgáfan þyrfti að
hafa fjármagn til að gera: í fyrsta lagi útgáfa bóka og hjálp-
argagna, sem hentuðu við kennslu barna, sem eru fyrir neð-
an meðallag að námsgetu. Ekkert hefur enn verið hægt að
gera á þessu sviði, en það tel ég mjög nauðsynlegt. Og í
öðru lagi endurskoðun og endurskipulagning lesbókakerf-
isins á barnastiginu og viðbót við lesefnið á gagnfræðastig-
inu, en þar hefur verið gefið út myndarlegt safn í 4 heftum.
— Hvernig hefur starfsaðstaðan verið þessi ár?
— Við höfum lengst af búið við þrengsli og ófullnægj-
andi starfsskilyrði, en nú eru horfur á að úr rætist, þar sem
Ríkisútgáfan hefur keypt aukið húsnæði. Nú er unnið að
því að innrétta þetta húsnæði og batna þá starfsskilyrðin
verulega, en auðvitað þrengir það fjárhaginn nokkuð í bili.
— Ég vil að lokum segja þetta: Við höfum haft miklu
meiri verkefni en komizt hefur verið yfir, og þótt fjárhagur-
inn hafi batnað, er starfið þó miklum takmörkunum háð.
Ég álít, að Ríkisútgáfan hafi það þýðingarmiklu hlutverki
að gegna í þágu skólanna, að ríkisvaldið ætti að búa sem
bezt að henni, og ber fram þá ósk, að svo megi verða. Hjá
okkur verður engu endanlegu takmarki náð. Hlutverk Rík-
isútgáfunnar er að reyna að gera sér sem bezta grein fyrir
því, hvers skólarnir þarfnast á hverjum tíma, koma auga á
ný og nauðsynleg verkefni og framkvæma þau. Til þess að
vel megi takast er nauðsynlegt, að náið og gott samstarf sé
á milli skólanna og Ríkisútgáfunnar, því að Ríkisútgáfan er
ekki venjulegt útgáfufyrirtæki heldur fyrst og fremst þjón-
ustustofnun fyrir skólana og allan almenning í landinu.