Frjáls verslun - 01.04.2013, Page 26

26 FRJÁLS VERSLUN 4. 2013
Bergþóra Sigmundsdóttir, deildarstjóri þinglýsinga- og skráningadeild-
ar embættis sýslu mannsins í Reykjavík og fyrsti framkvæmdastjóri
Jafnréttisráðs, ákvað þrettán ára sem sendill hjá ríkisstofnun að læra ekki
vélritun og fá þar með lægri laun en karlarnir. Margir þekkja hana sem kjör-
stjóra við utankjörfundaratkvæðagreiðslu.
Ákvað að læra ekki vélritun
Bergþóra Sigmunds­dótt ir hefur alla tíð verið baráttumann­eskja fyrir jafn rétti
kynj anna og beit það í sig þegar
hún var þrettán ára sem sendill
hjá ríkisstofnun að læra ekki
vélritun.
„Ég tók ég eftir því að þótt þar
ynnu bæði karlar og konur voru
karlarnir á sérskrifstofum inni af
ganginum á meðan konurnar,
sem voru á öllum aldri, sátu í
stórum sal, vélrituðu, svöruðu í
síma og sinntu afgreiðslu. Mér
fannst þetta svolítið sérkenni ­
legt og tók fljótlega eftir því
að karlarnir, jafnvel strákar
um tvít ugt, komu með skjöl til
kvenn anna sem þær vélrituðu
fyrir þá. Strákarnir voru ekki
endi lega með meiri menntun
en þær, því ég man eftir a.m.k.
tveimur konum sem voru með
stúdentspróf, en strákarnir sem
þær vélrituðu fyrir höfðu það
ekki og voru jafnvel yngri en
þær. Mér varð fljótlega ljóst að
þeir sinntu störfum sem gáfu
hærri tekjur en konurnar sem
vélrituðu. Ég tengdi þetta strax
því að þar sem þær kynnu að
vélrita væru þær beðnar um að
vélrita og tók þá ákvörðun strax
þarna að ég skyldi aldrei læra
að vélrita. Ég yrði þá aldrei í
þeirri stöðu að verða beðin um
það og fá þar með lægri laun.“
En það var í raun fyrr sem
Bergþóra lagði drög að framtíð
sinni, því þegar hún var níu ára
ákvað hún að þegar barna skóla
lyki skyldi hún fara í Kvenna ­
skólann, þaðan í MR og síðan
í lögfræði. „Það var svo sem
ágætt að ég hafði tekið þessa
ákvörðun snemma, því þegar
maður kemur á tánings aldurinn
og í menntaskóla er maður
meira leitandi og óákveð inn um
hvað við skuli taka, en þetta
markmið mitt sat í mér.“
Þegar stúdentsprófi var náð
hafði Bergþóra fengið áhuga á
stjórnmálafræði, sem þá var nýtt
fag í Háskólanum, og þurfti hún
því að velja á milli hennar og
lögfræðinnar. Stjórnmálafræð­
in varð fyrir valinu, m.a. vegna
þess að sambýlismaður og
síðar eiginmaður Bergþóru,
Gunnar V. Johnsen, var á leið
utan í verkfræðinám og hún
vissi að færi hún með honum
gæti hún haldið áfram náminu
í stjórnmálafræðinni erlendis.
Lögfræðinni gæti hún svo bætt
við sig síðar. Hún lærði því
stjórn málafræði, bæði hér heima
og í Svíþjóð, en útskrifðaðist
sem stjórnmálafræðingur frá HÍ.
Þetta gerði hún samhliða því að
eignast tvö börn á námstíman­
um. Hún leggur þó sérstaka
áherslu á að þetta hefði hún
aldrei getað án eiginmannsins,
sem alla tíð hefur tekið fullan
þátt í heimilisstörfunum, sem og
umönnun barnanna þegar þau
voru að vaxa úr grasi.
Að námi loknu tók við nokkurra
ára starf sem stjórnmálafræð ­
ingur og varð Bergþóra fyrsti
framkvæmdastjóri Jafnréttisráðs
og vann við það í sex ár. Þá
hún tók þá ákvörðun að hætta,
eignast þriðja barnið og setjast
svo aftur á skólabekk og láta
drauminn um að læra lögfræði
verða að veruleika. En þá er
ekki öll sagan sögð. Förum að ­
eins aftur í tímann:
„Haustið sem við byrjuðum
nám í Háskólanum, Gunnar
og ég, byrjaði hann mánuði á
undan mér. Honum fannst hart
að horfa á mig sofa áfram þegar
hann þurfti að vakna og lagði
til að ég kæmi með honum í
tækniteiknun í verkfræðideild­
inni á laugardagsmorgnum í
stað þess að liggja heima,“
segir Bergþóra og brosir.
„Það varð úr og með stjórn ­
málafræðináminu lærði ég
tækni teiknun og tók próf í henni
úr verkfræðideildinni. Þetta
nýtt ist mér mjög vel, því ég
vann sem tækniteiknari með
háskólanáminu, fyrst með
stjórn málafræðinni og svo aftur
þegar ég var í lagadeildinni.
Þetta nýtist mér enn þann dag í
dag, því þessi menntun kem ur
sér einstaklega vel í starfi mínu
núna, t.d. við lestur á eigna ­
skipta yfirlýsingum.“
Með laganáminu vann Berg ­
þóra hjá sýslumanninum í
Reykjavík og síðan alfarið þar
að því loknu og er, eins og áður
segir, deildarstjóri í þinglýs­
inga ­ og skráningadeild. Margir
þekkja hana hins vegar sem
kjörstjóra við utankjörfundar at­
kvæðagreiðslu, sem hún hefur
verið í fjölmörg ár.
Þykir mörgum sjálfsagt dugn­
aður þriggja barna móður ærinn
eftir það sem upp hefur verið
talið, en samt hefur Bergþóra
ekki látið sér það nægja. Hún
hefur einnig starfað mikið í
sjálfboðastarfi fyrir íþróttahreyf­
inguna og þá beitt sér sérstak­
lega fyrir uppbyggingu á allri
aðstöðu fyrir stelpur, enda hefur
áhugi hennar á jafnrétti kynj­
anna síst minnkað með árunum.
Hún starfaði fyrir meistaraflokk
kvenna í fótbolta hjá Stjörnunni,
var formaður handknattleiks­
deildar Stjörnunnar um tíma,
starfaði fyrir meistaraflokks­
ráð kvenna í handbolta og
hefur unnið markvisst að því
að stelpur njóti sannmælis í
íþróttum og fái sömu aðstöðu
og tækifæri og strákarnir. Og
nú hefur golfáhuginn fangað
huga Bergþóru, sem er söm
við sig og því að sjálfsögðu
komin bæði í stjórn Golfklúbbs
Kópavogs og Garðabæjar, sem
og Golfsambands Íslands. Þar
beitir hún sér sjálfsagt áfram
kvenþjóðinni til heilla.
En svo við snúum okkur aftur
að vélrituninni: Hefur það aldrei
orðið henni til trafala í námi og
starfi að hafa ekki lært vélritun?
Bergþóra gjóir augunum á
lyklaborðið við tölvuna og hlær
við. „Ég bjarga mér með tveimur
og er orðin nokkuð lunkin við
það. En ég vélrita eingöngu fyrir
sjálfa mig.“
TexTi: HelGa Möller / Mynd: Geir ólafsson
StJóRNUN
Fyrsti framkvæmdastjóri Jafnréttisráðs:
bergþóra Sigmundsdóttir, deildarstjóri þinglýsinga- og skráningadeildar
embættis sýslu mannsins í Reykjavík.
MIKILVÆGT SKREF
AÐ GÓÐUM ÁRANGRI
Einkabankaþjónusta Arion banka veitir einstaklingum, fyrirtækjum, sjóðum
og stofnunum víðtæka fjármálaþjónustu sem sniðin er að þörfum hvers og eins.
· Þinn eigin viðskiptastjóri sem mótar með þér fjárfestingarstefnu og sér um
þitt eignasafn.
· Sterk tengsl við viðskiptastjóra með símtölum, tölvupósti og reglulegum
fundum.
· Ítarlegt yfirlit um stöðu og ávöxtun á þriggja mánaða fresti.
· Öll almenn bankaþjónusta á hagstæðum kjörum.
Pantaðu viðtal við viðskiptastjóra í 444 7410 eða sendu póst á
einkabankathjonusta@arionbanki.is og komdu þínum fjármálum
í hagstæðari farveg.
ARION EINKABANKAÞJÓNUSTA
VÖNDUÐ EIGNASTÝRING
STJÓRNAST AF MARKMIÐUM VIÐSKIPTAVINARINS