Frjáls verslun - 01.01.2009, Blaðsíða 43

rita og segist hafa ósköp gaman að því að skrifa en skeri sig ekki úr
hópi samstarfsmanna sinna, þó misjafnt sé hvort menn leggi áherslu
á að skrifa á íslensku og ensku, bækur eða greinar, en nærri allir
háskólakennarar fáist við einhver ritstörf og rannsóknir. Þótt akademísk
skrif séu dálítið öðruvísi en fréttamennska kveðst hann telja að skólun í
blaðamennsku hafi stutt við þau skrif, en Gylfi starfaði sem blaðamaður
á Morgunblaðinu sumrin 1986 til 1990. Þar skrifaði hann aðallega
viðskiptafréttir og segist þannig hafa fengið ágætis innsýn í viðskiptalífið,
sem nýst hafi í námi og síðar starfi.
reynsla af ólíkri stjórnsýslu
Í stjórnunarstörfum hefur Gylfi einnig komið víða við, bæði innan
einkageirans og háskólans þar sem hann segir stjórnunarhætti um margt
frábrugðna því sem tíðkast í einkageiranum þar sem eitt einkenna
Háskólans sé jafningjastjórnun. Hún þýðir að menn skiptast oft á að
vera yfirmenn og undirmenn og það býður upp á svolítið sérstaka
stjórnunarhætti sem hann kveðst kunna vel við en kunna að þykja
furðulegir fyrir utanaðkomandi. Þessi stjórnsýsla hafi þó oftast gengið
ágætlega og skilað góðum ákvörðunum þó meiri tími fari í að taka þær
heldur en hjá einkafyrirtækjum þar sem valdapíramídinn er brattari
og boðleiðirnar einfaldari. Gylfi hefur einnnig komið að stjórnsýslu í
Samkeppniseftirlitinu, en hann segir þessi mjög svo ólíku störf styðja að
sumu leyti við hvert annað. Vinna við Samkeppniseftirlitið hafi til að
mynda reynst sér vel í akademísku vinnunni og muni einnig koma að
góðum notum nú, á stuttum ráðherraferli.
bankamálin verða tímafrek
Aðspurður um komandi mánuði í starfi viðskiptaráðherra segir Gylfi
að sér finnist hann þekkja þá málaflokka sem að starfinu snúi ágætlega,
þó hann hafi ekki fyrr en nú haft aðgang að þeim upplýsingum sem
ráðuneytin hafa undir höndum og hafa ekki verið gerðar opinberar. Hann
hafi því sökkt sér ofan í þær fyrstu dagana en ýmsar ákvarðanir séu það
brýnar að fljótt hafi þurft að taka skarið. Vinnulagið ráðist síðan af þeim
mjög knappa tímaramma, eða nokkrum vikum, sem þingið muni starfa
og ekki sé hægt að koma mörgum lagafrumvörpum í gegn. Því verði að
velja og hafna. Þá flæki það málið að stjórnin sé minnihlutastjórn þannig
að ekki sé sjálfgefið að frumvörp fari í gegn en þá þurfi að reyna að tryggja
slíkt. Þá fylgi starfinu óhjákvæmilega ýmiss konar önnur stjórnsýsla þar
sem ráðuneytið hafi bankamálin á sinni könnu og þau verði tímafrek, en
einnig þurfi að gefa sér tíma fyrir aðra málaflokka, þótt þeir séu ekki jafn
aðkallandi viðfangsefni og bankamálin.
vinnan verður áhugamálið
Til að halda geðheilsunni góðri segir Gylfi að sé nauðsynlegt fyrir sig að
eiga samverustundir með fjölskyldunni en hann og kona hans eiga fimm
börn fædd á árunum 1998 til 2007. Þessar samverustundir muni þó
verða færri á næstunni en allir sýni því skilning að eitthvað verði undan
að láta á heimavígstöðvunum næstu mánuði. Aðspurður um áhugamál
segir Gylfi að það sé eins með sig og langflest háskólafólk að vinnan verði
líka áhugamálið og ekki sé hægt að starfa sem háskólamaður öðruvísi. Þá
reyni hann að hreyfa sig eins og tími gefist til og megi segja að það hafi
verið sitt áhugamál á árum áður, þá hafi hann hlaupið maraþon eins og
vitlaus maður en sé löngu hættur því.
SAGt uM GylFA:
Jón G. Þormar stjórnmálahagfræðingur:
Klár húmoristi
Við Gylfi þekkjumst síðan í Mr þar sem við vorum
saman í bekk síðustu tvo veturna 1984-1986 og
höfum alltaf haldið ágætis sambandi síðan þá. Við
tókum virkan þátt í félagslífinu en Gylfi var ritari skóla-
félagsins á þriðja árinu og var líka í ræðuliði Mr sem
vann Morfís-keppnina árið 1986. Hann var strax mikill
ræðumaður og átti auðvelt með að koma fyrir sig orði.
Gylfi hefur alltaf verið mjög klár náungi og góður náms-
maður sem er jafnvígur á ólíkar greinar en um leið er
hann jarðbundinn og yfirvegaður. Hann er líka mikill
húmoristi og hefur gaman af orðaleikjum og allt að því
útúrsnúningi sem einkennir hans kímnigáfu.
Við reynum að hittast af og til, gamall vinahópur úr
Mr, og Gylfi hefur alltaf boðið hópnum einu sinni á ári
upp í sumarbústað til sín en sú hefð komst raunar á
strax í menntaskóla. Þetta er lýsandi fyrir Gylfa sem
leggur sig fram um að halda í gamla vini og hefðir.
Þó að Gylfi hafi strax við lok menntaskóla ákveðið að
verða háskólamaður og hafi haldið sig við þá ákvörðun
hingað til, þá tel ég að hann hafi það sem þarf til þess
að takast á við starf viðskiptaráðherra og efast ekki
um að hann eigi eftir að standa sig vel, enda er hann
mjög hreinn og beinn og myndar sér faglega skoðun á
því sem hann tekur sér fyrir hendur.
Gylfi Zoëga prófessor:
vinnusamur og fylginn sér
Ég þekki Gylfa frá því við vorum við nám í
Bandaríkjunum í kringum 1990. Gylfi er úrvalsmaður
og tryggur, fylginn sér og gefst seint upp. Hann er
vinnusamur, með sterka réttlætiskennd og vel liðinn
kennari. Í einkalífinu held ég að hann sé heimakær og
hafi verið síðan á námsárunum þó það hafi aukist eftir
því sem börnin komu til sögunnar.
Gylfi er hvers manns hugljúfi, geðgóður og tekur
hlutunum með jafnaðargeði og æsir sig ekki en um
leið veit hann hvert hann stefnir. nú nýverið finnst mér
maður hafa séð nýja hlið á Gylfa eins og þegar hann
hélt ræðu á Austurvelli, þá kom fram meiri harka hjá
honum gagnvart samfélaginu heldur en áður enda leið
honum greinilega mjög illa yfir því sem gerðist hér í
haust og fylgdist vel með atburðarásinni.
F R J Á L S V E R S L U N • 1 . T B L . 2 0 0 9 43