Gripla - 20.12.2010, Síða 97

97M A R G R É T A R S A G A I I
*En er hon hafði þetta mælt, þá *skein ljós mikit í myrkvastofuna ok sýndisk
kross Krists svá hárr at tœki til himins ok sat heilǫg dúfa á krossinum ok *mælti:
“*Sæl ertu, Margareta, því at þín bíða opinn dyrr paradísar.”
Ok sem Margareta hafði heyrt þessa vitran, þá leit hon til fjándans ok mælti:
“Seg þú mér, fjándi, hvaðan er eðli þitt.”
Fjándinn svaraði: “*Ambátt Krists, lyptu þá fœti þínum af halsi mér ok man ek
segja þér tíðendi.”
*En er Margareta létti sínum <fœti> af hǫfði honum, þá mælti fjándinn:
“Belzem er nafn mitt eða Belzebub. *Margra réttlátra verkum spilta ek ok bǫrðumk
ek í gegn réttlátum ok mátti engi yfir mik stíga. Þú hefir sprengt út augu mín ok
brotit niðr krapt minn *ok gerðir þú við mik sem þér líkar, því at Kristr eflir þik.
Þú vart áðr jǫrð ok aska en guð samtengdisk þér ok var líkami þinn óstyrkr, ok má
síðan engi þik sigra er þú fekt himneska speki þá er þér gefr mikinn ávǫxt réttlætis.
Fœtr þínar sýnask gullligir en hendr þínar með Krists marki. Þær bundu mik ok
*vágu bróður minn er ek senda at glata þér. *Ek em sá er berjumk í gegn réttlátum
ok eggja ek menn til synda ok blinda ek hugi þeira. Læt ek þá gleyma himneskri
speki. En þá er menn sofa, kem ek til þeira ok vek ek þá um nætr at þeir fari at
stela, en þá er ek má eigi ór stað hrœra lét ek þá saurgask í draumum ok mátti engi
forðask hendr mínar. Frá þeim segi ek þetta, er ek hefi nǫkkut vald á ok ek finn
standa án kross marki. En *þeir er þér eru líkir þar hvarf ek frá tómr ok yfirstiginn
svá sem ek em nú í dag af þér hneyktr, ok ef alroskinn drengr stígi yfir mik þá væri
mér þat létt bært. En nú em ek hneyktr af lítilli meyju þeiri er faðir hennar ok
móðir váru mínir lagsmenn. Undarligt er orðit er ein ung mær hefir stigit yfir
fǫður sinn ok móður ok alla frændr sína ok fylgir Kristi ok bindr djǫfla ok ekki má
kraptr várr, því at vér erum yfirstignir af einni ungri meyju.”
Margareta *svaraði: “Seg þú kyn þitt ok atferli. Hverr býðr yðr at glepja góð
verk manna.”
Nú talar fjándinn: “Segðu mér, Margareta, hvaðan er líf þitt ok *trú þín eða
hversu Kristr kom til þín *ok mun ek þá segja þér verk mín.”
*En er hon hafði þetta mælt] – 428a *skein] kom 428 *mælti] + við Margaretu 428a *Sæl ertu
Margareta, því at] – 428a *Ambátt Krists] – 428a *En er ... hǫfði honum] Nú gerir hon svá
428a *Margra réttlátra ... engi] ok berjumk ek í móti réttlátum mǫnnum. Engi mátti 428a *ok
gerðir þú ... þik] því at guð er með þér 428a *vágu] – 428a *Ek em sá ... standa án] Ek eggja
menn til synda á marga vega bæði vakandi ok í svefni með reiði ok á verkum ok meinsœrum tæli
ek menn ok svá at brjótask í hús manna at stela. Mega ek eigi ór stað hrœra þá, sendi ek drauma
skrimsl ok villi ek þá í draumum. Til þeira mæli ek þetta, sem án eru 428a *þeir er þér eru líkir
... einni ungri meyju] frá hinum fer ek hneyktr er þér eru líkir ok nú í dag hefir þú gert. Þætti
mér minna um vert ef karlmaðr hefði mér þetta gert. En nú er ein mær hefir mik yfirstigit þá
þykir mér várr máttr engu nýtt at einn mær stigi yfir hann ok fǫðr sinn ok móður ok alla sína
frændr ok fylgir Kristi ein síns liðs ok bindr djǫfulinn 428a *svaraði] mælti við fjándann 428a
*trú þín] trúa 428a *ok mun ek þá segja þér verk mín] – 428a