Gripla - 20.12.2010, Page 100

GRIPLA100
En er Margareta hafði lokit bœn sinni, þá gerðusk *reiðarþrumur ok kom dúfa
af himni með *krossi ok settisk yfir hǫfuð heilagrar guðs meyj ar Margarete *ok
fellu allir til jarðar þeir <er> hjá stóðu. Margareta fell ok til jarðar fyrir guðs krapt.
Heilǫg dúfa snart við hana ok mælti svá: “Sæl ertu, Margareta, á meðal kvenna, því
at þú leitaðir miskunnar ok minntisk syndugra í bœnum *þínum. Sver ek fyrir
sjalfan mik ok dýrð engla minna at þat skal allt heyrt á himnum ok veitt sem þú
hefir beitt ok beðit hér á *jarðríki. Sæl ertu, er þú minntisk syndugra manna í
píslum þínum ok þar sem kemr af helgum dómi þínum eða bók píslar þinnar *ok
kemr syndugr maðr ok biðr sér líknar með tárum í þinni minningu, þá man honum
þegar fyrirgefask syndir, ok þar inni er bók píslar þinnar er þar man eigi inn ganga
illgjarn andi heldr man í þeim stað gleðjask *friðr ok sannleikr.
Nú ef syndugr maðr kemr at ok biðr með tárum kallandi á þitt nafn í bœn
sinni, þá mun hann finna lausn synda sinna. Sæl ertu ok sæll er staðr sá er þú hvílir
ok þjóð sú er fyrir þik trúir á guð. Kom þú í stað þann er þér er fyrirbúinn. Ek em
með þér ok man fyrir þér upp lúka dyrum paradísar himiríkis.”
Þá leit heilǫg Margareta umhverfis sik ok mælti svá: “Feðr ok brœðr, mœðr ok
systr ǫll, yðr sœri ek fyrir nafn ins mikla konungs at þér gerið minning mína ok
nefnið nafn mitt. *En ek mun biðja fyrir yðr þó at ek sé syndug várn dróttin Jesúm
Kristúm at hann gefi yðr lausn synda ok geri yðr erfingja í ríki sinnar dýrðar í
himiríki.
En ek geri þakkir guði almáttkum er hann lét mik inn ganga í sveit réttlátra ok
í dýrð síns ríkis. Lofa ek ok dýrka ek dróttin várn Jesúm Kristum þann er blezaðr
er um allar aldir alda. Ok sem Margareta hafði lokit bœn sinni, þá reis hon upp ok
mælti: Bróðir, tak sverð þitt ok hǫgg mik, því at nú hefi ek stigit yfir *heiminn.”
Malkus mælti: “Eigi *mun ek vega heilaga guðs mey, því at guð mælir við þik
ok má ek fyrir því eigi hǫggva þik.”
Heilǫg Margareta svaraði: “Ef þú gerir eigi *þetta, þá mantu eigi hafa hlut með
mér í paradísu guðs míns.”
*Þá brá Malkus sverði ok hjó hǫfuð af heilagri guðs mey með hræzlu í einu
hǫggi ok *mælti: “Gjaltu mér eigi, dróttinn, þessa synd.” En er hann mælti þetta, þá
fell hann til jarðar *fyrir hræzlu sakir til hœgri handar *Margaretu.
*reiðarþrumur] + ogurligar ok landskjalftar stórir 428a *krossi] kórónu gullliga ok krossi fǫgrum
428a *ok fellu allir ... fyrir guðs krapt] Allir hræddusk þeir sem hjá váru ok fellu til jarðar fyrir
heilǫgu krossmarki ok svá Margareta 428a *þínum] + víða um verǫldina til hjalpar mǫnnum
428a *jarðríki] + ok þat man mart veitask fyrir þína píning ok þolinmœði er þér kom í hug at
biðja 428a *ok kemr syndugr maðr ... <er> þar] – 428a *friðr ok sannleikr] fagnaðr ok sætleiks
andi með miskunn heilags anda 428a *En ek mun ... syndug] Þó at ek sé syndug biðjandi 428a
*heiminn] + ok folgit mik guði á hendi 428a *mun ek] þori ek at 428a *þetta] at boði mínu
428a *Þá] Nú 428a *mælti] + með ótta miklum 428a *fyrir hræzlu sakir ... Margaretu] – 428a
*Margaretu] + ok fann meðr iðran ok viðkomning líkn þá ok hjalp er heilǫg Margareta hafði
heitit honum 428a; + ok tók hann trú 429