Glóðafeykir - 01.04.1984, Blaðsíða 16

16
GLÓÐAFEYKIR
Vísnaþáttur
Sigurður í Krossanesi er fæddur í Hamarsgerði í Lýtingsstaðahreppi.
hinn 6. júlí 1905, sonur hjónanna Sigríðar Hallgrímsdóttur og Óskars
Þorsteinssonar.
Sigurður hóf búskap í Krossanesi í Vallhólmi vorið 1934 og hefur
búið þar æ síðan. Kona hans er Ólöf Jóhannsdóttir frá Löngumýri.
Sigga í Krossanesi þekkja flestir Skagfirðingar. Maðurinn er
eftirminnilegur fyrir margra hluta sakir, léttur í lundu, grínisti góður,
hestamaður ágætur og hagorður vel. Skagfirðingur að eðli og allri
gerð.
Sigurður var tregur í taumi er ég fór þess á leit, að hann léti
Glóðafeyki í té stökur til birtingar. Þó tókst að herja út þær, sem hér
birtast. Þessar vísur gefa raunar nokkuð einhæfa mynd af vísnagerð
hans, hesta- og veðurfarsvísur. En Sigurður hefur, sem kunnugt er,
slegið ýmsa strengi í vísnamálum og á sitthvað í pokahorninu, sem
ekki er gefið falt að sinm.
Kveðið eftir Stóra Blesa.
Hinumegin hinkrar eftir mér
hesturinn með tygjum rauðblesótti.
Dauðan mig á bakinu hann ber,
á brattann fast í lífinu hann sótti.
Vormorgunn.
Ég söðla minn hest og sest á bak,
sólin rís, það er að morgna.
Sem bergmál er hestsins hófatak
í háaloftunum vængjablak.
Döggvota grasið í dalnum er tekið að þorna.
Vorvísa.
Það er bjart yfir bænum,
blóm undir húsveggnum grær
í sólskini og sunnanblænum,
sumarið kom í gær.