Glóðafeykir - 01.04.1984, Síða 42

42
GLÓÐAFEYKIR
léti sjá. Með honum og systursyni hans, Ingimar Jónssyni,
skrifstofumanni hjá S.I.S. í Reykjavík, hafði jafnan verið mjög kært.
Var það Friðbirni til mikillar gleði, er Ingimar flutti fyrir nokkrum
árum til Sauðárkróks til þess að geta verið í námunda við frænda sinn
og honum til ánægju og aðstoðar efstu árin. Upp frá því var Friðbjörn
lengstum viðurloða á ellideild Héraðssjúkrahúss Skagfirðinga á
Sauðárkróki.
Friðbjörn á Hólum hafði mikið yndi af skepnum, einkum þó sauðfé,
enda fjármaður ágætur. í skemmtilegu viðtali í 15. h. Glóðaf. 1975
segir hann m.a.: ’En bóndinn var alltaf nokkuð ríkur í mér, svo að ég
átti bágt með að neita mér um að umgangast skepnur. Ég átti því oftast
þetta 25 - 30 kindur og 2 - 3 hross, heyjaði fyrir þessu á sumrin og hirti
að vetrinum. Það var mikil sálubót’.
Friðbjörn Traustason var fríður maður sýnum, í hærra lagi,
herðabreiður og miðmjór, íturvaxinn. Hann var glímumaður á yngri
árum og ágætlega íþróttum búinn, göngugarpur og léttur í spori fram
á elliár.Hann var vel verki farinn og kappsmaður við alla vinnu.
Friðbjörn var prýðilega greindur og fjölgefinn, unni hljómlist og söng
flestu fremur. Prúðmennska hans og snyrtimennska, jafnt í
klæðaburði sem öllum athöfnum, skyldurækni og óbrigðull
heiðarleiki, frjálsmannleg framkoma og meðfædd reisn, - þetta voru
þeir eiginleikar hver fyrir sig og allir saman, sem einkenndu manninn
mest.
Sigurður Dagbjartur Helgason, verkamaður á Sauðárkróki, lést 18.
janúar 1975.
Hann var fæddur í Garðshorni á Höfðaströnd 9. nóvember 1893,
sonur Helga bónda þar o.v. Péturssonar bónda að Fjalli í Sléttuhlíð,
Sigmundssonar bónda á Ljótsstöðum á Höfðaströnd, Eyjólfssonar,
og konu hans Margrétar Sigurðardóttur bónda í Garðshorni,
Stefánssonar bónda að Nýlendi á Höfðaströnd, Þorbergssonar bónda
í Eyhildarholti, Dagssonar. Kona Péturs og móðir Margrétar eldri var
Guðbjörg Pétursdóttir bónda á Höfða Sveinssonar, er á sínum tíma
var í lífverði Jörundar hundadagakóngs (S.Ó.). Sigurður í Garðshorni
var snjall hagyrðingur en þótti níðskældinn nokkuð svo, flugu stökur
hans víða, var og Margrét dóttir hans hagmælt vel, en flíkaði lítt.
Sigurður Helgason var elstur sjö systkina, er upp komust. Óx hann
upp með foreldrum sínum fram yfir tvítugsaldur, fyrst í Garðshorni til
1898, þá á Hofi til 1901, á Spáná í Unadal 1 ár, á Geirmundarhóli í