Glóðafeykir - 01.04.1984, Page 71
GLÓÐAFEYKIR
71
svo að notendur þurftu aldrei að bíða.
„Adolf Björnsson var mikill áhugamaður um eflingu iðnfyrirtækja
og stofnun nýrra á Sauðárkróki, og sat í mörgum nefndum, er höfðu
það að markmiði. Forgöngumaður var hann um stofnun minkabús á
Nöfunum á Sauðárkróki og leiddi það starf fyrstu árin.” (H.R.T.).
Árið 1947 kvæntist Adolf Stefaníu Önnu Frímannsdóttur bónda á
Austara-Hóli í Flókadal, Guðbrandssonar bónda á Steinhóli í sömu
sveit, fórst með þilskipinu ’Maríönnu’ í maímánuði 1922, Jónssonar
bónda á Vestara-Hóli, Ólafssonar, og konu hans Jósefínu
Jósefsdóttur bónda á Stóru-Reykjum í Flókadal, Björnssonar, síðast
bónda í Hvanndölum, fórst með ’Haffrúnni’ 1964, Gíslasonar, og
konu hans Svanfríðar Sigurðardóttur bónda á Stóra-Grindli í Fljótum
o.v., Sigmundssonar. Þau Adolf og Stefanía áttu ekki börn saman, en
son átti Stefanía áður en þau giftust, Guðmund, sjómann á Bíldudal
vestur, og gekk Adolf honum í föðurstað.
Adolf Björnsson var meðalmaður á hæð, þrekvaxinn og þykkur
undir hönd, sléttfarinn í andliti, fríður sýnum, svipmótið festulegt,
yfirbragðið stillilegt og rólegt. Hann var greindur maður og
geðþekkur, fasprúður og hægur í viðmóti, vel máli farinn og þó
orðstilltur og enginn hávaðamaður, en hélt á máli sínu af einurð og
hóglátri festu.
G.M.