Orð og tunga - 01.06.2010, Qupperneq 38

28 Orð og tunga
af sér með bréfi dagsettu 14. nóvember 2006 og lögðu til eftirfarandi
breytingar:
• Asparlundur verði Ártunga.
• Eikarlundur verði Daltunga.
• Grenilundur verði Fífutunga.
• Birkilundur verði Bræðratunga.
• Furulundur verði Engjatunga.
• Hnotulundur verði Hrauntunga.
Bæjarráð lagði til við bæjarstjórn að tillögurnar yrðu samþykktar
(http://www.isafjordur.is/isafjordur/fundargerdir/, skoðað síðast 15. mars 2009).
Annað dæmi kemur úr Mosfellsbæ. Þar var ekki verið að breyta
nöfnum heldur að velja nöfn á götur í alveg nýju hverfi. Á heimasíðu
Helgafellsbygginga í Mosfellsbæ er eftirfarandi greinargerð um ný
götunöfn í Helgafellshverfi eftir Hannes Sigurgeirsson framkvæmda-
stjóra: (http://www.helgafell.is/index.php?option=com_content&task=view&id=36
&ltemid=45, sótt 8. 3. 2009):
Eins og í öllu skipulagi hverfisins þá fannst okkur mik-
ilvægt að vanda vel til verka í þessum efnum og bjóða
upp á áhugaverð götunöfn. Hugmyndin sjálf, að sækja til
verka Halldórs Laxness er að sumu leyti flókin því auð-
vitað skiptir öllu máli að gera þetta vel. Eftir talsverða yfir-
legu kom fram sú hugmynd að nota falleg kvenmannsnöfn
úr verkum skáldsins. Auk þess að vera einföld og smekk-
leg lausn þá gátum við notað nöfnin til að mynda einfalt
kerfi og raðað götunum í stafrófsröð, réttsælis kringum
miðju hverfisins. Þannig verður auðvelt fyrir fólk að rata
í Helgafellshverfi.
Hér lýkur tilvitnun í orð Hannesar en á heimasíðunni stendur áfram:
„Þá verða tvær götur sem mynda kjarna hverfisins nefndar
eftir tveimur af þekktustu skáldsögum Halldórs Laxness;
Gerplustræti og Vefarastræti. Útfærslan var unnin af Erni
Úlfari Sævarssyni, íslenskufræðingi, með aðstoð Halldórs
Guðmundssonar, sem hlaut íslensku bókmenntaverðlaun-
in árið 2005 fyrir ævisögu Halldórs Laxness." Göturnar