Skírnir - 01.04.2017, Page 161

161við og hinir
Danske Forening) sem starfaði í nánum tengslum við Danska
þjóðarflokkinn: Í fyrsta lagi sem ógn við danska menningu og
dönsk einkenni, í öðru lagi græfi aðkomufólk undan efnahagslífinu
og velferðarkerfinu og í þriðja lagi fylgdi þeim auknir glæpir og
upplausn í samfélaginu (Widfeldt 2015). Hugmyndafræðin er byggð
á þeirri trú að þótt þjóðir séu jafngildar þá farnist þeim best hverri
í sínu lagi. Jafnvel þó svo að slík aðskilnaðarstefna jaðri við fasíska
hugsun þá hefur Danski þjóðarflokkurinn ávallt gætt sín á því að láta
ekki spyrða sig við yfirlýstar rasískar hreyfingar.
Talsmenn Danska þjóðarflokksins færa andstöðu sína við fjöl-
menningu því ekki fram á líffræðilega rasískum grunni heldur
menningarlegum. Karen Wren (2001), sem áður var vitnað til, telur
það til menningarlegs nýrasisma að halda því fram að dönskum
gildum standi ógn af innflytjendum. Hvað sem því líður þá skilja
flokksmenn allavega skýrt á milli ,okkar‘ sem tilheyrum hópnum
og svo ,hinna‘ sem fyrir utan standa. Samkvæmt þeim gengur fjöl-
menningarsamfélag ekki upp í Danmörku og útlendingar verða
trauðla Danir. Þeir líta á danskt þjóðerni sem lokað og meðfætt og
að aðkomufólk nái af þeim sökum illa að tileinka sér það. Í grunn-
stefnuskrá flokksins frá 2002 segir enda að fjölmenningarlegt sam-
félag sé óstöðugt og án innra samhengis, að í það vanti samstöðu og
því leiði það til átaka — sem beri að forðast.
Með því að halda fullan trúnað við þjóðernishyggju Grundtvigs
og tala beint inn í þá þjóðarsál sem þróaðist eftir áfallið við stöðugan
samdrátt gamla yfirríkisins hefur Danska þjóðarflokknum tekist að
umturna allri umræðu í Danmörku í málefnum innflytjenda og
flóttamanna. Togstreitan í sjálfsmyndinni á milli hinar fyrrum yfir -
þjóðlegrar herraþjóðar og nýrri áherslu á etnískt einsleita danska
þjóð skýrir því að hluta til árekstrana í samskiptum innfæddra Dana
og aðkominna útlendinga. Í Danmörku var því af sögulegum rótum
frjór jarðvegur fyrir pólitík Danska þjóðarflokksins líkt og Karen
Wren (2001) hefur til dæmis bent á.
Það eitt dugir þó ekki til að skýra nokkuð einstakan árangur
Danska þjóðarflokksins. En auk þess hefur flokknum ennfremur
auðnast að bjóða upp á trúverðugan valkost við ráðandi öfl án þess
að hljóta almenna útskúfun. Í kjölfar þingkosninganna árið 2015,
skírnir
Skírnir vor 2017.qxp_Layout 1 31.3.2017 13:24 Page 161