Saga - 2011, Qupperneq 114

„Virt erlend fjármálastofnun“
S-hópnum var talið til tekna að með honum í för væri „virt erlend
fjármálastofnun“. Hópurinn vildi þó ekki gefa upp hver hún væri
og bar því við að hún vildi ekki leggja nafn sitt við verkefnið fyrir-
fram ef svo kynni að fara að þeir fengju ekki bankann. Í þessu sam-
bandi var oft nefnt að alþjóðlegi bankinn Société Générale hefði
hugsanlega áhuga („potentially interested“) á að vera þátttakandi í
kaupendahópnum.40 Niðurstaðan varð þó sú að Edward Williams
frá HSBC-bankanum var tilnefndur af framkvæmdanefnd um
einkavæðingu og átti S-hópurinn að segja honum hver erlenda fjár-
málastofnunin væri. Skyldi hann síðan staðfesta við nefndina að
fjármálastofnunin væri raunveruleg og fullnægði skilyrðum. Þetta
gekk eftir og staðfesti Williams, fyrir undirritun viljayfirlýsingar um
áframhaldandi viðræður hinn 15. nóvember, að um „raunverulega
fjármálastofnun“ væri að ræða. Skarphéðinn Berg Steinarsson, starfs -
maður framkvæmdanefndar um einkavæðingu, spurði Williams
aldrei hvern S-hópurinn hefði nefnt á þessu stigi. Því var fyrirsvars-
mönnum íslenska ríkisins ekki ljóst hver þessi erlendi samstarfsaðili
S-hópsins var við undirritun viljayfirlýsingar um áframhaldandi
viðræður. Þó var vitað að Ólafur Ólafsson þekkti vel Christian
Smitd, sem var banka stjóri Société Générale í Hamborg. Société
Générale hafði verið banki ýmissa íslenskra félaga í Hamborg, svo
sem Sambands íslenskra samvinnufélaga, skipadeildar Sambands -
ins og Sölumið stöðvar hraðfrystihúsanna.41
Ekki hafði verið nefnt í upphafi að það hefði vægi við mat fram-
kvæmdanefndarinnar hvort erlendur aðili ætti þátt í tilboðinu sem
fjárfestir, þ.e. sem væntanlegur meðeigandi að eignarhlutnum í
bankanum. Framkvæmdanefnd um einkavæðingu fór fram á að S-
hópurinn og Kaldbakur veittu þeim upplýsingar um fyrirhugaða
samsetningu hópanna. Svör þeirra eru dagsett 31. október 2002. Í
bréfi S-hópsins var vísað til Société Générale sem ráðgjafa hópsins
við tilboðsgerðina en einnig sérstaklega vísað til franska bankans
sem hugsanlegs fjárfestis með hópnum. Kaldbakur hafði aftur á
móti ekki erlendum aðila á að skipa.42
björn jón bragason114
40 Aðdragandi og orsakir falls íslensku bankanna 2008. 1. bindi (Reykjavík: Rann -
sóknar nefnd Alþingis 2010), bls. 254.
41 Viðtal. Höfundur við þriðja ónafngreinda heimildarmann (úr viðskiptalífinu).
42 Bréf S-hóps til framkvæmdanefndar um einkavæðingu, dags. 31. október 2002.
Skjalasafn forsætisráðuneytis.
Saga haust 2011 NOTA_Saga haust 2004 - NOTA 11/24/11 9:52 AM Page 114