Breiðfirðingur - 01.04.1957, Side 28

PÁSKALILJUR
Þið minnið á sólina, Páskasól
á heiðum austurhimni,
— dansandi á austurhimni —
með gulu blöðunum ykkar
og gullnum, djúpum bikar.
Það er lífið sjálft,
leyndardómur lífsins,
sem birtist í djúpi bikarsins.
Upprisa. Þið eruð tákn hins upprisna lífs,
og grænu blöðin eru
hinn endurvakti vorgróður jarðar.
Frá ykkur streymir lífsmagn.
Þið prédikið lífið og upprisu þess
með þögulli tilveru ykkar,
í hljóðri bæn.
Þið fyllið stofuna Páskum.
— Eg sé ykkur í höndum kvenna
á leið til grafarinnar
árla,
hinn fyrsta dag vikunnar.