Bændablaðið - 28.02.2019, Side 4

Bændablaðið | Fimmtudagur 28. febrúar 20194
FRÉTTIR
Opinn fagráðsfundur
– Fagfundur sauðfjárræktarinnar
Fagráð í sauðfjárrækt boðar
til fundar í Bændahöllinni
föstudaginn 1. mars. Þar
verða kynntar niðurstöður úr
ýmsum verkefnum tengdum
sauðfjárrækt og umræða tekin
um ræktunarstarfið.
Áherslur í kynbótastarfi ræddar
Gunnar Þórarinsson, formaður
fagráðs, mun fara yfir helstu
verkefni ráðsins og Eyþór Einarsson
ráðunautur yfir helstu þætti í
kynbótastarfinu. Undir þessum lið
verða fengnir fulltrúar frá þremur
sauðfjárbúum til að færa fram sína
sýn á áherslur í ræktunarstarfinu
í nútíð og framtíð. Það eru þeir
Eiríkur Jónsson, Gýgjarhólskoti,
Jón Gíslason, Hofi og bræðurnir
Bjarki og Sigþór Sigurðssynir frá
Skarðaborg.
Rekstur sauðfjárbúa
Á fundinum munu þau María
Svanþrúður Jónsdóttir og Eyjólfur
Ingvi Bjarnason kynna helstu
niðurstöður átaksverkefnis þar
sem safnað hefur verið saman
rekstrargögnum sauðfjárbúa árin
2014–2017.
Rannsóknarverkefni frá Lbhí
Flest ár eru unnin nokkur spennandi
lokaverkefni af nemendum
Lbhí sem tengjast sauðfjárrækt.
Á fundinum verða kynntar
niðurstöður úr þrem BS verkefnum
sem unnin hafa verið undir
handleiðslu Emmu Eyþórsdóttur
og Eyjólfs Ingva Bjarnasonar.
Verkefnin fjalla um vanhöld lamba,
burðarerfiðleika og skyldleikarækt
og eru höfundar þeirra þær Nanna
Lilja Níelsdóttir, Pálína Pálsdóttir
og Unnur Jóhannsdóttir. Þá mun
Jóhannes Sveinbjörnsson fjalla um
áhrifaþætti á haustþunga lamba,
en nýverið kom út rit hjá LbhÍ
sem byggir á uppgjöri gagna frá
Hestbúinu fyrir 12 ára tímabil.
Um kjötgæði
Síðastliðið haust gerðu sérfræðingar
hjá Matís samanburð á kjötgæðum
skrokka af sambærilegum lömbum
sem var slátrað annars vegar í
handverkssláturhúsi og hins vegar
í hefðbundinni afurðastöð. Guðjón
Þorkelsson mun kynna niðurstöður
úr þessu verkefni. Hann mun einnig
segja frá hugmyndum sem Svíar
eru að vinna með varðandi þróun
á kjötmati. Þá munu þeir Óli Þór
Hilmarsson hjá Matís og Eyþór
Einarsson, RML, kynna nýjan
bækling um meðferð sláturlamba
og lambakjöts.
Sauðfjársjúkdómar
Charlotta Oddsdóttir, sérfræðingur
á Keldum, mun gera grein fyrir
niðurstöðum úr verkefninu
„Öndunarfærasjúkdómar hjá
sauðfé“ sem gekk út á að skoða
lungu í sláturlömbum og greina
tíðni óheilbrigðra lungna auk
spurningalista sem lagður var fyrir
bændur. Charlotta mun einnig greina
frá því hver staðan er í rannsóknum
á lambleysi gemlinga. Síðan mun
Hrafnkatla Eiríksdóttir kynna
meistaraverkefni sitt í búvísindum
frá Kaupmannahafnarháskóla sem
fjallar um lungnaorma í sauðfé.
Verðlaunaafhending
sæðingastöðvanna
Árlega eru útnefndir tveir
framúrskarandi hrútar úr hrútahópi
sæðingastöðvanna. Það er annars
vegar besti lambafaðirinn og
hins vegar mesti kynbótahrútur
sæðingastöðvanna. Fulltrúar
sæðingastöðvanna afhenda rækt­
endum hrútanna verðlaun og
sauðfjár ræktarráðunautar RML
munu fara yfir feril hrútanna og
rökstuðning fyrir valinu.
Fundurinn fer fram í
Bændahöllinni og hefst kl. 12.30.
Áætlað er að dagskrá ljúki kl. 17.00.
Þátttaka er öllum opin.
Hugsanleg sameining Norðlenska og Kjarnafæðis:
Ágætur gangur
sagður í málinu
Búsæld, eigandi Norðlenska,
ráðgerir að halda hluthafafund
seinnipartinn í mars þar sem
staða mála varðandi hugsanlegan
samruna matvæla framleiðslu­
félaganna Norðlenska og
Kjarnafæðis verður kynnt
hluthöfum.
„Vinna við væntanlegan samruna
Norðlenska og Kjarnafæðis er í gangi
og gengur ágætlega,“ segir Ágúst
Torfi Hauksson, framkvæmdastjóri
Norðlenska. Málið er unnið
í samstarfi við ráðgjafa hjá
fyrirtækjaráðgjöf Íslandsbanka. Nú
er verið að vinna við tilkynningu
til samkeppnisyfirvalda en samruni
er háður samþykki Samkeppnis­
eftirlitsins.
Tilkynnt var um hugsanlega
sameiningu félaganna tveggja í
ágúst í fyrra og hefur verið unnið
að málinu síðan þá. Eigendur
félaganna mátu stöðuna á þann veg
að sameinað félag væri betur í stakk
búið til að veita viðskiptavinum
sínum og birgjum, ekki síst
bændum, gæðaþjónustu á góðu
verði.
Verði sameining félaganna að
veruleika svo sem stefnt er að verður
til öflugt félag í matvælaframleiðslu,
en um 320 ársverk eru hjá félögunum
tveimur, víða um land. /MÞÞ
Einar Freyr Elínarson, oddviti Mýrdalshrepps, færði Kristjáni Þór Júlíussyni sjávarútvegs- og landbúaðarráðherra
áskorun til ríkisstjórnar Íslands í upphafi fundarins. Var hún frá 42 félagasamtökum bænda þar sem formenn
samtakanna leggjast alfarið gegn frumvarpi ráðherra sem felur í sér heimild til þess að flytja inn hrátt ófrosið kjöt
og fersk egg. Myndir / Magnús Hlynur Hreiðarsson
Fundur í Þingborg um innflutningsfrumvarp ráðherra vegna EES:
42 félagasamtök bænda
mótmæltu frumvarpinu
Um 250 manns mættu á opinn
fund Kristjáns Þórs Júlíus­
sonar sjávarútvegs og land­
búnaðarráðherra í félags heim­
ilinu Þingborg í Flóahreppi
miðvikudagskvöldið 25. febrúar
þar sem ráðherra kynnti frumvarp
sitt um innflutning á ófrosnu kjöti
til landsins.
Mjög skiptar skoðanir voru um
málefnið á fundinum þótt ráðherra
hafi ekki verið „jarðaður“ á
fundinum eins og jafnvel var talið að
myndi gerst fyrir fundinn. Kristján
Þór gerði grein fyrir forsögu málsins,
afleiðingar þess og hvernig íslenskur
landbúnaður þyrfti að bregast við nái
frumvarpið í gegn á Alþingi.
Félagasamtök bænda mótmæla
Einar Freyr Elínarson, oddviti
Mýrdalshrepps, færði ráðherra
áskorun til ríkisstjórnar Íslands
í upphafi fundarins frá 42
félagasamtökum bænda þar sem
formenn samtakanna leggjast alfarið
gegn frumvarpi ráðherra sem felur í
sér heimild til þess að flytja inn hrátt
ófrosið kjöt og fersk egg.
„Verði frumvarpið að veruleika
felur það í sér fullkomna uppgjöf
í baráttu okkar Íslendinga fyrir því
að verja lýðheilsu þjóðarinnar og
íslenskra búfjárstofna sem hafa
sérstöðu í alþjóðlegu samhengi,“
segir m.a. í áskoruninni.
Frumvarpið í samráðsgátt
Hægt er að kynna sér frumvarpið
og gera athugasemdir við það
á samráðsgátt stjórnvalda
til 6. mars. Fram kom hjá
ráðherra að í málinu liggur fyrir
aðgerðaráætlun í 12 atriðum til
að tryggja öryggi matvæla, vernd
búfjárstofna og aðgerðir til að
bæta samkeppnisstöðu innlendra
matvælaframleiðslu.
Í frumvarpinu felst afnám
leyfisveitingakerfisins og þar
með frystiskyldunnar varðandi
vörur framleiddar innan EES­
svæðisins. Þá viðheldur frumvarpið
leyfisveitingakerfinu og þar með
frystiskyldunni varðandi vörur sem
upprunnar eru utan EES­svæðisins
og frá Sviss og Færeyjum.
Sérstakar ráðstafanir verða
gerðar varðandi kampýlóbakter
og í frumvarpinu verður heimild
til álagningar stjórnvaldsseta.
Bændur sem tóku til máls lýstu
miklum efasemdum við frumvarpið
og gagnrýndu ráðherra fyrir að
standa ekki í lappirnar og hlúa
frekar að íslenskum landbúnaði
með kjafti og klóm. /MHH
Kristján Þór Júlíusson í ræðustól að kynna fyrir bændum og búaliði frumvarpið
um innflutninginn á ófrosnu kjöti til landsins. Sagðist hann ánægður með
fundinn í Þingborg sem hann stýrði sjálfur og sá um frá A til Ö. Hann mun
einnig funda með bændum í Borgarfirði, Eyjafirði og á Austurlandi næstu
daga, auk fundar sem hann mun halda um málið í Reykjavík.
Núverandi formaður Bændasamtaka Íslands, Sindri Sigurgeirsson og
Haraldur Benediktsson, fyrrverandi formaður, ræða við Katrínu Andrésdóttur
og Svein Ingvarsson í Reykjahlíð í Skeiða- og Gnúpverjahreppi á fundinum.
Fundarmönnum stökk varla bros á vör á fundinum enda innflutningur á
ófrosna kjötinu alvarlegt mál í þeirra augum.