Bændablaðið - 28.02.2019, Side 7

Bændablaðið | Fimmtudagur 28. febrúar 2019 7
LÍF&STARF
E ftir ósómavísur Ágústar á Sauðanesi í síðasta vísnaþætti, er hollt að hverfa til kveðskapar
sem flokka má undir bændamenningu.
Bændaríma Haraldar Zophoníassonar
á Jaðri við Dalvík, var kveðin í
marsmánuði ársins 1932. Haraldur var
prýðilega hagorður og hafði stórgott
vald á bragarháttum. Bændaríma hans
ber þess líka vott þar sem hann ferðast
um Svarfaðardal bæ af bæ með bragtól
sín. Þessi vísnaþáttur helgast gjörvallur
þeirri hringferð. Rímuna orti Haraldur
undir ýmsum bragarháttum og hefur
rímnakveðskapinn undir hætti aldýrrar
stafhendu:
Til að setja saman ljóð
svo að geti orðið góð,
hjálpar bið ég bljúgur þig
Braga-Iðunn, styrk nú mig.
Blendið kýs ég bragaval:
bændavísur kveða skal.
Stefnir fyrst mín stefjaskrá
strandar ysta bæinn á.
Sinnisglaður, Jónsson Jón
jafnlundaður græðir Frón;
böli þrotinn halur hress
heldur Kotið-Sauðaness.
Á Sauðanesi heldur hjú
hirðir fés og stundar bú,
burðarstóri bóndinn Jón,
blíður, rór og frír við tjón.
Sitt á Karlsá bætir bú
beitir fals í sannri trú,
Þorsteinskundur Þórarinn
þarna stundar búskapinn.
Útgerð stundar ótrauður
óðalsbóndinn Þorleifur.
Viður bóla bætir lönd
byggir Hól á Upsaströnd.
Býs á Felli fáskiptinn,
frír við hrelling, Jóhann minn;
lyndiskátur, lipur vel,
löngum státinn rær í sel.
Í Háa-Gerði byggir best
brjótur sverða, skap með hresst;
víða á storðu velþekktur
í verki og orði Sigurður.
Situr Koti-Efsta á,
-akkersgota stýrir sá-
Antonssonur Þorsteinn þar
því að vonum kennir mar.
Annar býr þar örvaþór,
orðaskýr, í geði rór;
Friðbjörn heitir seggur sá,;
sinnisteitur bús við stjá.
Í Miðkoti ekkja býr,
á því sloti ræður skýr.
Hringananna á hlýra fróns
heitir Anna dóttir Jóns.
Stefán klækjum stýrir hjá;
stjórnar Lækjarbakka sá.
Veit ég fróður veigagrér
vænn og góður drengur er.
Arnór gætir Upsaranns;
er það mætur runnur brands.
Brátt er greppsins baga gjörð,
býr á hreppsins eignajörð.
Stefán fróður drýgir dáð
og dyggðagróður, vítt um láð.
Bör- sá –kesju ber gott orð,
Brims- á –nesi ræður storð.
Boðnarmjöð skal blanda á ný,
Böggvisstöðum að ég sný:
Loftur ræður löndum þar,
lipur græðir krónurnar.
Í Árgerði unir best,
oft á ferðalagi sést,
lærður, fróður, laus við tjón
læknir góður Sigurjón.
Umsjón:
Árni Geirhjörtur Jónsson
kotabyggð1@gmail.com
220MÆLT AF
MUNNI FRAM
Biskupstungur:
Nýtt og glæsilegt 200 milljóna
króna fjós á Spóastöðum
Nýlega var tekið í notkun nýtt, glæsilegt
og fullkomið fjós á bænum Spóastöðum í
Biskupstungum í Bláskógabyggð. Fjósið
er um 1550 fermetrar að stærð með 140
básum. Það tók aðeins sjö og hálfan mánuð
að byggja fjósið.
Það eru bræðurnir á Spóastöðum og
foreldrar þeirra sem byggðu fjósið en það eru
þeir Þórarinn og Ingvi Þorfinnssynir, eiginkona
Þórarins er Hildur María Hilmarsdóttir og
foreldrarnir eru þau Þorfinnur Þórarinsson
og Ásta Jóhannesdóttir.
Um er að ræða stálgrindarhús frá
Landstólpa í Skeiða- og Gnúpverjahreppi og
þaðan komu innréttingarnar líka. Pálmatré sá
um steypuvinnuna, Jötunn um fóðurkerfið og
mjaltaþjónarnir tveir koma frá VB landbúnaði.
„Við erum í skýjunum með nýja fjósið og mér
sýnist kýrnar vera það líka, þær eru allavega
mjög ánægðar og láta fara vel um sig í öllu
þessu plássi sem þær hafa. Við erum að
læra á tæknina og allar græjurnar sem fylgja
svona fjósi en það kemur vonandi fljótt,“ segir
Þórarinn. Stefnt er að því að hafa opið hús í
fjósinu fyrir sveitunga og aðra áhugasama með
vorinu. /MHH
140 básar eru í fjósinu, 120 fyrir mjólkandi kýr og 20 fyrir geldneyti. Myndir / Magnús Hlynur Hreiðarsson.
Bræðurnir Ingvi og Þórarinn Þorfinnssynir eru í skýjunum með nýja fjósið, tæknina og allan
aðbúnað fyrir gripina í því.
Það fer sérstaklega vel um kálfana í nýja
fjósinu á hálminum enda mjög rúmt hjá þeim
og aðbúnaður þeirra til fyrirmyndar.
Frjótæknirinn, Sverrir Ágústsson, er reglulegur
gestur í fjósinu á Spóastöðum þar sem hann
sér um að sæða kýrnar með sæði úr úrvals
nautum.
Fóðurkerfið er magnað í nýja fjósinu en heyið kemur á færibandi að ofanverðu og dettur á
fóðurganginn þar sem kýrnar bíða eftir því að éta það af bestu lyst. Gefið er fimm sinnum á dag.