Litli Bergþór - 01.06.2022, Qupperneq 25

Litli-Bergþór 25
Fréttir af veðri frá desember 2021 til maí 2022.
Nokkrir öfgar einkenndu veðurfarið síðasta hálfa árið.
Desember mátti þó heita góður, skiptust á frost og
hláka fyrstu daga mánaðarins með tilheyrandi hálku
á heimreiðum, síðan nokkuð hlýtt fram að jólum. Yfir
jóladagana var bjart og falleg veður með vægu frosti,
en á gamlársdag þykknaði upp með austan hvassviðri.
Snjólaust var svo gamlársbrennur voru bannaðar.
Nokkrir sinubrunar urðu samt vegna skotelda.
Nýársdagur heilsaði svo með rokhvelli, 20-25
m/sek, jörð var alauð og allt skraufaþurrt. Gaf það
tóninn fyrir það sem koma skyldi, því síðan gekk
hver óveðurslægðin eftir aðra yfir landið næstu
tvo mánuðina. Þorrinn byrjaði með gulum og
appelsínugulum veðurviðvörunum og lokun fjallvega
og Góan byrjaði á rauðum. Flesta daga sveiflaðist
hitinn, allt frá 10 stiga frosti og upp fyrir frostmarkið
og til skiptis éljagangur, slagveðursrigning, slydda,
aftur éljagangur, skafbylur. Stöku meinlaus dagur á
milli, töluverð snjóalög.
Febrúar heilsaði með frosti og síðan áframhaldandi
umhleypingum, sem fóru versnandi. Hiti sveiflaðist
áfram um frostmarkið. Endalaus lægðakeðja með roki
eða ofsaveðri um og yfir 30 m/sek, með fárra daga
millibili, sérstaklega seinnipart mánaðarins. Versta
veðrið sennilega 21. febrúar þegar spáð var 34 m/sek
suðaustan fárviðri, (mælir í Myrkholti sýndi 50 m/sek í
hviðum), með tilheyrandi tjóni á gróðurhúsum. Veðrið
var oft verst um nætur og illa gekk
að halda fjallvegum opnum.
Hellisheiði oft ófær dögum
saman og það komu dagar
þegar allir vegir urðu ófærir
til og frá höfuðborgarsvæðinu.
Skurðir fullir af snjó.
Í mars brá til betri tíðar fyrri part
mánaðarins með þægilegu vetrarveðri,
hiti um frostmark, talsverður snjór.
Engin ofviðri fyrr en um miðjan mánuð.
Þá gengu nokkrar djúpar lægðir yfir
landið með tilheyrandi ofsaveðri og
blindbyljum. Síðan kom vorið, hiti
yfir frostmark og lóan kom 20. mars.
Apríl og maí voru yfirleitt
góðviðrasamir. Næturhiti var um og
yfir frostmarki flesta daga og eftir miðjan maí allt að
10°C hiti að næturlagi. Á daginn var hlýtt í sólinni,
dásemdar vorveður og gott gróðrarveður, enda komin
góð beit á tún strax fyrstu vikuna í maí. Áframhaldandi
gróðrarveður og góðviðri fram í júní.
Tjón á gróðurhúsum. Gróðurhús í Jarðarberjalandi í
Reykholti lögðust saman í rokinu 21. febrúar og gjör-
eyðilögðust. Eins varð tjón á gróðurhúsum Kvistabæjar
og á Sólveigarstöðum og víðar varð minniháttar tjón á
gróðurhúsum, þar sem brotnuðu nokkrar rúður. Í einni
hviðunni brotnaði grenitré við íbúðarhús Þórarins og
Hildar á Spóastöðum og munaði litlu að það lenti á
húsinu og í Laugarási héldu tré áfram að leggjast á
hliðina. Víða urðu foktjón á Suðurlandi, t.d. sprakk
loftborna íþróttahúsið Hamarinn í Hveragerði í
óveðrinu 21. febrúar.
Hvað segirðu til?
Fréttir úr Tungunum frá janúar til maí 2022
Brrr.. mér var kalt í
Bláfelli í vetur. Eyðilögð jarðarberjauppskera og gróðurhús í Jarðarberjalandi
21. febrúar 2022.