Litli Bergþór - 01.06.2022, Page 59

Litli-Bergþór 59
Fyrsta vinnan sem ég fékk hér í sveit eftir heimkomuna
var á gámasvæði Bláskógabyggðar í maí 2021.
Ég stoppaði samt stutt við þar, því það losnaði
húsvarðarstaða í Aratungu sem ég sótti um og fékk og
byrjaði þar strax 1. júní 2021.
Það hefur verið í nógu að snúast síðan ég byrjaði
sem húsvörður, því maðurinn sem átti að vera með
mér sem útistarfsmaður veiktist, svo ég hef verið að
stússast í útiverkunum líka. Við erum núna m.a. að gera
upp eina af íbúðum hreppsins hér í Kistuholtinu auk
þess að sinna allskonar viðgerðum og viðhaldsvinnu
annarri.
Ingibjörg: Ég byrjaði að vinna á Lofteiðum eftir að
við byrjuðum að búa og vann svo hjá Búnaðarfélagi
Íslands á Hótel Sögu í þrjú ár. Viðar Þorsteinsson
frændi Óla var skrifstofustjóri þá. Síðan vann ég hjá
Umferðaráði í tvö ár, hjá Gísla J. Johnsen í fjögur ár
og hjá Íslenskum endurskoðendum í 11 ár. Auðvitað
var ég líka heimavinnandi í mörg ár eftir að yngri
sonur okkar fæddist.
Eftir að Óskar fór að heiman lærði ég til bókara og
hef því réttindi sem viðurkenndur bókari. Ég vann í
fjarvinnu héðan fyrst eftir að við fluttum austur, en
síðan losnaði starf á skrifstofu Bláskógabyggðar sem
ég sótti um og nú vinn ég á skrifstofunni í Aratungu.
Byrjaði að vinna þar í febrúar 2021 og finnst það algjör
draumur að vinna þar svo nálægt heimilinu.
Fjölskyldan
Við eigum tvo syni, Sigurð Erlendsson sem fæddist
8. mars 1983, er rafvirki og giftur Guðrúnu Hörpu
Kristinsdóttur. En Kristinn Kristinsson faðir hennar er
bróðir Sveins Kristinssonar, manns Ástur Rutar á Þöll
í Reykholti, systur Óla, svo fjölskylduböndin eru víða.
Þau Sigurður og Guðrún eiga þrjá syni: Erlend Óla 13
ára, Kristinn Leo 10 ára og Patrek Sölva fjögurra ára.
Sonarsynirnir elska það að vera í sveitinni og taka oft
vinina með. Þá getur nú verið fjör.
Yngri sonurinn, Óskar, fæddist 30. mars 1993 og
er fjölfatlaður. Hann býr nú á sambýli í Reykjavík og
líður vel þar. Hann er eðlilega ósköp feginn að vera
laus við foreldrana dag og nótt, er glaður að koma í
heimsókn en glaður að komast aftur heim eftir að hafa
verið hér í nokkra daga.
Hver eru helstu áhugamál ykkar fyrir utan vinnu
og fjölskyldu?
Ingibjörg: Samvera með ættingjum og vinum er
skemmtilegust en ég fór á námskeið í silfursmíði og
hef gert dálítið af því að smíða skartgripi og slíkt til
gjafa. Ég hef gaman af því að hanna og smíða og við
höfum útbúið lítið verkstæði hér í kjallaranum þar sem
ég hef aðstöðu.
Óli: Mín áhugamál snúast helst um gamla bíla og
vélar. Ég var aldrei mikið fyrir skepnurnar og langaði
ekki til að verða bóndi, en hafði gaman að heyönnum
og vélum og gat gert við. Ég er m.a. búinn að gera upp
gamlan Farmall cub traktor og á líka gamlan orginal
Landrover sem er enn í góðu lagi.
En svo hef ég auðvitað alltaf gaman af því að hitta fólk
og vera í samskiptum við ættingja og vini.
Að lokum vil ég bara árétta það að okkur líður
afskaplega vel hér heima á Vatnsleysu í nýja húsinu
okkar. Þegar ég sest niður með morgunkaffibollann
minn sé ég yfir að að húsi foreldra minna frá borðinu
og get fylgst með lífinu og morgunverkunum á
Vatnsleysuhlaðinu. Það er ósköp notalegt.
Blaðamaður Litla-Bergþórs þakkar þeim hjónum
Erlendi Óla og Ingibjörgu kærlega fyrir spjallið og
góðar veitingar og óskar þeim velfarnaðar á nýjum
starfsvettvangi hér á heimaslóð.
Geirþrúður Sighvatsdóttir.
Hér er fjölskyldan í 20 ára afmæli Óskars Óla, frá vinstri: Guðrún
Harpa með Kristinn Leó, Ingibjörg, Sigurður, Erlendur Óli, Sigurður
og Jóna Þuríður, Óskar Óli og Erlendur Óli yngri fyrir neðan.
Hér eru barnabörnin á „kubbnum“, Erlendur Óli, Kristinn Leó
og Patrekur Sölvi.