Morgunblaðið - 10.02.2001, Page 12

FRÉTTIR
12 LAUGARDAGUR 10. FEBRÚAR 2001 MORGUNBLAÐIÐ
RISNUKOSTNAÐUR ráðuneyt-
anna og undirstofnana þeirra hækk-
aði um 48 milljónir frá árinu 1998 til
ársins 1999, eða úr rúmum 209 millj-
ónum í 257 milljónir. Þar af hækkaði
risna forsætisráðuneytisins og stofn-
ana þess mest, eða um 13 milljónir
króna. Þetta er meðal þess sem lesa
má úr skriflegu svari fjármálaráð-
herra, Geirs H. Haarde, við fyrir-
spurn Jóhönnu Sigurðardóttur,
þingmanns Samfylkingarinnar.
Samtals var risna forsætisráðu-
neytisins og undirstofnana þess
rúmar 10,6 milljónir kr. árið 1998 en
samtals um 23,5 milljónir kr. árið á
eftir. Þar ber hæst hækkun á risnu
aðalskrifstofu ráðuneytisins sjálfs.
Var hún rúmar 8 milljónir árið 1998
en rúmar 18 milljónir árið 1999.
Risna utanríkisráðuneytisins og
undirstofnana þess hækkaði um átta
milljónir milli áranna 1998 og 1999
eða úr um 51 milljón í rúmar 59 millj-
ónir. Risna dóms- og kirkjumála-
ráðuneytisins og undirstofnana
hækkaði um tæpar 7 milljónir, eða úr
12,5 milljónum í 19,2 milljónir, risna
menntmálaráðuneytisins og undir-
stofnana hækkaði um rúmar 6 millj-
ónir eða úr rúmum 28,7 milljónum í
34,9 milljónir, risna umhverfisráðu-
neytisins og undirstofnana hækkaði
um tæpar 3 milljónir eða úr rúmum
6,5 milljónum í rúmar 9,2 milljónir,
risna félagsmálaráðuneytisins og
undirstofnana hækkaði sömuleiðis
um tæpar 3 milljónir, eða úr 6,6
milljónum í 9,1 milljón, risna land-
búnaðarráðuneytisins og undirstofn-
ana hækkað um 2 milljónir, eða úr
5,8 milljónum í 7,8 milljónir og risna
samgönguráðuneytisins og undir-
stofnana hækkaði um 2 milljónir, úr
18,3 milljónum í 20,3 milljónir. Risna
æðstu stjórnar ríkisins, svo sem Al-
þingis, ríkisstjórnar og embættis
forseta Íslands hækkaði á þessum
árum um 1,6 milljónir, eða úr rúmum
18,9 milljónum í 20,5 milljónir.
Risna annarra ráðuneyta hækkað
innan við milljón milli áranna 1998 til
1999. Risna viðskiptaráðuneytisins
og undirstofnana hækkaði úr 3,6
milljónum í 4,5 milljónir, risna sjáv-
arútvegsráðuneytisins og undir-
stofnana hækkaði úr 8,8 milljónum í
9,3 milljónir, risna heilbrigðis- og
tryggingamálaráðuneytisins og und-
irstofnana hækkaði úr 19,2 milljón-
um í 19,4 milljónir og risna fjármála-
ráðuneytisins og undirstofnana
hækkaði úr 12,1 milljón í 12,8 millj-
ónir. Risna Hagstofu Íslands lækk-
aði hins vegar milli áranna úr 1,6
milljónum í 1,3 milljónir.
Ferðakostnaður hækkar mest í
utanríkisráðuneytinu
Ferðakostnaður ráðuneytanna og
undirstofnana þeirra hækkaði um
172 milljónir milli áranna 1998 til
1999 eða úr rúmum 1.613 milljónum í
1.785 milljónir. Er í ferðakostnaðin-
um bæði átt við kostnað vegna ferða
innanlands sem og vegna ferða til út-
landa. Þar ber hæst hækkun vegna
ferða á vegum utanríkisráðuneytis-
ins og undirstofnana þess, eða hækk-
un um 43 milljónir. Var ferðakostn-
aður ráðuneytisins um 144 milljónir
á árinu 1998 en um 187 milljónir á
árinu 1999.
Ferðakostnaður menntamála-
ráðuneytisins og undirstofnana þess
hækkaði um 28 milljónir milli áranna
1998 og 1999, eða úr 286,6 milljónum
í 314 milljónir, ferðakostnaður for-
sætisráðuneytisins og undirstofnana
hækkað um 22 milljónir eða úr 24,6
milljónum í 46,6 milljónir, ferða-
kostnaður sjávarútvegsráðuneytis-
ins og undirstofnana hækkaði um 20
milljónir, eða úr 89,8 milljónum í
109,8 milljónir, ferðakostnaður sam-
gönguráðuneytisins og undirstofn-
ana hækkað um 19 milljónir, eða úr
221 milljón í 240 milljónir.
Ferðakostnaður félagsmálaráðu-
neytisins og undirstofnana hækkað
um 9 milljónir, eða úr 45,6 milljónum
í 54,2 milljónir, ferðakostnaður fjár-
málaráðuneytisins og undirstofnana
hækkaði sömuleiðis um 9 milljónir,
eða úr 46,3 milljónum í 55,3 millj-
ónum, ferðakostnaður umhverfis-
ráðuneytisins og undirstofnana
hækkað um 8 milljónir, eða úr 70,2
milljónum 78 milljónir, ferðakostn-
aður viðskiptaráðuneytisins og und-
irstofnana hækkaði um 4 milljónir,
eða úr 27,7 milljónum í 31,8 milljón,
ferðakostnaður landbúnaðarráðu-
neytisins og undirstofnana hækkaði
um tæpar 2 milljónir, eða úr 71 millj-
ón í 72,9 milljónir og ferðakostnaður
iðnaðarráðuneytisins og undirstofn-
ana hækkaði um 1,3 milljónir eða úr
78 milljónum í 76,7 milljónir.
Ferðakostnaður heilbrigðis- og
tryggingamálaráðuneytisins lækkar
hins vegar milli áranna 1998 og 1999,
úr 287 milljónum í 286 milljónir.
Risnukostnaður ráðuneyta og undirstofnana þeirra á árunum 1998 og 1999
Risna forsætisráðu-
neytisins hækkar mest
Á SÍÐASTA ári komu 43.393 sjúk-
lingar í móttöku Læknavaktarinnar
ehf. í Smáratorgi í Kópavogi en hún
þjónar höfuðborgarsvæðinu nema
Mosfellsbæ. Þá fóru læknar í vitjanir
til 7.614 sjúklinga. Er það 1.323 vitj-
unum færra en árið 1999 en 9.878
fleiri sjúklingar heimsóttu móttöku
Læknavaktarinnar í fyrra en árið
1999.
Atli Árnason, formaður stjórnar
Læknavaktarinnar, segir þróunina
vera þá að vitjunum fækki en fleiri
komi á stöðina sjálfa og segir hann
þessa þróun hafa verið allt frá árinu
1987 þegar Læknavaktinni í núver-
andi mynd var fyrst komið á. Árið
1987 var fjöldi vitjana á þúsund íbúa
8,5 á mánuði en var komin niður í
3,6 á síðasta ári. Á sama hátt fjölg-
aði þeim sem komu í móttöku
Læknavaktarinnar frá árinu 1987
úr 5,4 íbúa á mánuði miðað við þús-
und íbúa í 20,5 á síðasta ári. Atli seg-
ir að þeir sem þurfi á vitjun að halda
fái heimsókn læknis en öðrum sé
stefnt í móttökuna. Þar sé líka betri
aðstaða til að veita nauðsynlega að-
stoð.
Gengur vel að
manna vaktir
Þórður G. Ólafsson, yfirlæknir
Læknavaktarinnar, segir læknana í
fullu starfi á heilsugæslustöðvum á
höfuðborgarsvæðinu en þeir taki
síðan tvær til þrjár vaktir í mánuði
hjá Læknavaktinni. Segir hann að
vel hafi gengið að manna vaktirnar.
Aðsókn að móttökunni segja lækn-
arnir vera nokkuð jafna yfir árið,
kringum 3.500 að meðaltali á mán-
uði en nærri 4.000 í desember. Vitj-
anir séu hins vegar alltaf færri yfir
sumarið. Miðað er við að sjúklingar
þurfi ekki að bíða lengur en tvo tíma
eftir vitjun og ekki lengur en um
hálfa klukkustund eftir þjónustu hjá
móttökunni. Ef álag verður meira
eru læknar á bakvakt kallaðir út.
Fjárhagsgrundvöllur Læknavakt-
arinnar er tryggður með þjónustu-
samningi við heilbrigðisráðuneytið
og er hann um 130 milljónir á ári
miðað við ákveðnar stærðir og for-
sendur. Samningurinn var gerður í
desember 1998 þegar Læknavaktin
ehf. hóf starfsemi sína á Smáratorgi.
Þannig lækkuðu greiðslur til
Læknavaktarinnar á síðasta ári
vegna færri vitjana en hækkuðu
vegna fleiri sem komu í móttökuna.
Í dag starfa 62 heilsugæslulæknar
á Læknavaktinni, 17 hjúkr-
unarfræðingar, 8 læknamóttökurit-
arar, 5 bílstjórar, skrifstofustjóri og
ræstingafólk. Auk vitjana og viðtala
við sjúklinga á læknastofum vakt-
arinnar er talsvert um ráðgjöf í
síma. Móttakan er opin milli kl. 17
og 23.30 á virkum dögum og frá 9 til
23.30 um helgar og hátíðisdaga.
Flýtir fyrir að hafa bílstjóra
Tveir læknar starfa í móttökunni
milli kl. 17 og 20 og eftir það einn
læknir. Þá sinnir einn læknir vitj-
unum og annar er til taks ef á þarf
að halda og er þá einnig kallaður út
annar bílstjóri Læknavaktarinnar.
Þórður segir það flýta fyrir ferðum
lækna í vitjunum að hafa bílstjóra og
því fylgi einnig ákveðið öryggi.
Læknar bera á sér litlar talstöðvar
og geta haft samband við bílstjórann
gegnum hana þegar þeir yfirgefa
bílinn og segir Þórður hafa komið
fyrir að læknar hafi þurft að kalla
eftir hjálp. Þeir Atli og Þórður töldu
nokkuð vel séð fyrir læknisþjónustu
utan dagvinnutíma á höfuðborg-
arsvæðinu. Töldu þeir ljóst að sjúk-
lingum myndi enn fjölga á næstu ár-
um. Þá sögðu þeir ekkert því til
fyrirstöðu af hálfu Læknavaktarinn-
ar að heimilislæknar byðu uppá
vaktþjónustu utan dagvinnutíma á
stofum sínum. Guðmundur Ein-
arsson, framkvæmdastjóri Heilsu-
gæslunnar í Reykjavík, segir nokkr-
ar heilsugæslustöðvar opnar til kl.
19 virka daga. Hann segir frekari
fjárveitingu þurfa, eigi stöðvarnar
að taka upp frekari vaktir.
Um 51.000 sjúklingar á höfuðborgarsvæðinu nutu þjónustu Læknavaktarinnar á síðasta ári
Vitjunum fækkar
en fleiri koma
í móttökuna
Morgunblaðið/Jim Smart
Atli Árnason (lengst til hægri) er formaður stjórnar Læknavaktarinnar
ehf., Þórður G. Ólafsson yfirlæknir og Guðmundur Einarsson er fram-
kvæmdastjóri Heilsugæslunnar í Reykjavík.
MORGUNBLAÐINU hefur borist
eftirfarandi frá Friðriki Þór Guð-
mundssyni:
„Í tilefni af fréttatilkynningu Rann-
sóknarnefndar flugslysa vill undirrit-
aður taka fram eftirfarandi: Nýjar
upplýsingar um langtíma orlofstöku
stjórnanda rannsóknarinnar (Inve-
stigator In Charge), Þorsteins Þor-
steinssonar, eru í blóra við upplýsing-
ar sem Skúli Jón Sigurðarson,
formaður nefndarinnar, gaf aðstand-
endum í byrjun nóvember, um að þá
væri téður Þorsteinn farinn í þriggja
vikna frí í Þýskalandi. Þær eru og í
blóra við það sem Þorsteinn sagði í
vitna viðurvist um miðjan janúar sl.,
að hann væri þá að fara í stutt leyfi og
kæmi aftur upp úr mánaðamótum,
sem sé í byrjun febrúar.
Þessar mótsagnir eru enn óút-
skýrðar, eins og tafir á niðurstöðum
rannsóknarinnar. Yfirlýsing nefndar-
innar, um að rannsókn slyssins hafi
haldið áfram undir stjórn Skúla Jóns
Sigurðarsonar, á tíma tímabundins
leyfis Þorsteins, er einnig ótrúverðug
í ljósi fyrri framburðar Skúla Jóns við
aðstandendur. Alltént segir í 5. grein
reglugerðar um rannsóknarnefnd
flugslysa: „Allir nefndarmenn skulu
að jafnaði taka þátt í rannsókn máls
og aldrei færri en þrír og skal einn
þeirra vera stjórnandi rannsóknar-
innar (Investigator In Charge)“. For-
maðurinn og varaformaðurinn (Þor-
steinn) eru einu „sérfræðingar“
nefndarinnar. Langtíma fjarvera
stjórnanda rannsóknarinnar er óeðli-
leg, hvað sem formaðurinn segir oft
hið gagnstæða, auk þess að vera hrein
og klár móðgun við hina látnu, hinn
slasaða sem eftir lifir, aðstandendur
þeirra og í raun þjóðina alla, sem
borgar þessum mönnum laun.
Þá er rétt að minna á, að í 12. grein
sömu reglugerðar er nefndinni veitt
heimild til að gefa út áfangaskýrslu
„vegna eðlis máls“. Það eðli er og hef-
ur verið til staðar.
Rannsóknarnefndarmenn geta
fram á næstu öld harmað „ótíma-
bæra“ umræðu um málsatvik flug-
slyssins. Þeir verða að eiga við þann
harm sinn. Vonandi þarfnast þeir
ekki áfallahjálpar af þessum sökum.
En sömu menn geta ekki kvartað
undan gagnrýni á formgerð málsins,
á aðferðafræði rannsóknarinnar, á
tímalengd hennar, á fjarveru stjórn-
anda hennar, á vinnubrögð eins og að
taka ekki skýrslu af lykilvitnum, á
efasemdum um hlutleysi formannsins
gagnvart fyrrum starfsfélögum til 30
ára í Flugmálastjórn og fleiru í þeim
dúr. Þeir geta vísað til þagnarskyldu
um málsatvik slyssins, en þeir geta
ekki vikist undan því að svara til um
framkvæmd rannsóknarinnar sjálfr-
ar – og það hafa þeir ekki gert. Ég
geri þá kröfu á samgönguráðherra að
stjórnandi rannsóknarinnar, Þor-
steinn Þorsteinsson, verði kallaður
inn úr orlofi til að ljúka gerð skýrsl-
unnar og að fenginn verði erlendur
sérfræðingur til að yfirfara rannsókn-
ina. Í millitíðinni er vegna eðlis máls-
ins rétt að gefa út áfangaskýrslu.
Friðrik Þór Guðmundsson, faðir
fórnarlambs brotlendingarinnar í
Skerjafirði.“
Faðir eins fórnarlamba flugslyssins í Skerjafirði
Tafir á niðurstöðum
rannsóknar óútskýrðar
SKÝRSLA Rannsóknarnefndar
flugslysa (RNF) vegna flugslyssins í
Skerjafirði 7. ágúst sl. sumar er á
lokastigi og er stefnt að því að gefa
hana út í byrjun mars, ef ekkert
óvænt kemur upp. Vegna umræðu í
fjölmiðlum sem átt hefur sér stað um
flugslysið vill Rannsóknarnefndin
upplýsa eftirfarandi:
„Samkvæmt lögum um rannsókn
flugslysa sem RNF er falið að vinna
eftir, skal hún þegar rannsókn er
lokið svo fljótt sem verða má semja
skýrslu um niðurstöðu rannsóknar-
innar. Í skýrslunni skal gerð grein
fyrir orsök eða sennilegri orsök
slyssins, auk þess sem þar skulu
gerðar tillögur um þær varúðarráð-
stafanir sem gera má til þess að af-
stýra frekari slysum af sömu eða lík-
um orsökum.
Skýrslum rannsóknarnefndar
flugslysa skal ekki beitt sem sönn-
unargögnum í opinberum málum,
enda miðar rannsóknin að því einu
að koma í veg fyrir flugslys. Tekið
skal því fram að opinber rannsókn
sem einnig á sér stað á slysinu er
óviðkomandi RNF og mun RNF
gefa skýrslu sína út þegar málið er
fullrannsakað af hálfu nefndarinn-
ar.“
Ótímabær
umræða hörmuð
„Þótt stjórnandi rannsóknarinnar
(varaformaður RNF) sé í tíma-
bundnu launalausu leyfi, er rann-
sókn slyssins haldið áfram undir
stjórn formanns RNF.
Skýrsla RNF er nú á lokastigi og
er stefnt á að gefa hana út í byrjun
mars, ef ekkert óvænt kemur upp.
Sá tími sem þá verður liðinn frá flug-
slysinu er ekki lengri en rannsókn á
jafn alvarlegum slysum og í þessu
tilviki.
RNF harmar þá ótímabæru um-
ræðu sem fram hefur farið um máls-
atvik slyssins og vonar að loka-
skýrsla hennar ásamt tillögum til
úrbóta sem væntanleg er innan tíðar
geti orðið til þess að stuðla að auknu
flugöryggi.“
Flugslysið í Skerjafirði
Skýrslu að vænta
í marsbyrjun