Frjáls verslun - 01.05.2008, Qupperneq 88

88 F R J Á L S V E R S L U N • 5 . T B L . 2 0 0 8
Hver er
galdurinn?
Hvað þarf helst að gerast til
að konum fjölgi í stjórnunar-
störfum í atvinnulífinu?
Hreggviður Jónsson,
forstjóri Veritas Capital:
góðar fyrirmyndir
virka best
„Því miður er þetta að verða eilífðarspurning sem kemur
alltaf upp aftur og aftur í umræðunni og er eins og verið sé
að leita að einhverri töfralausn eða að eitthvað stórt þurfi
að gerast til þess að við sjáum verulegar betrumbætur í
þessum málum.
Upp í minn huga kemur kenningin um hænuna og eggið
þegar ég velti þessari spurningu fyrir mér. Ég er þeirrar
skoðunar að það sem virki best í þessum efnum séu góðar
fyrirmyndir kvenna sem eru nú þegar í stjórnunarstörfum,
framkvæmdastjórar, forstjórar eða hafa stofnað sín eigin
fyrirtæki. Sem betur fer þá erum við með töluvert af konum
í slíkum stöðum í dag en gera má mun betur. Því má segja
að á þeim konum hvíli sú ábyrgð og skylda (umfram karlana)
að vera þessar góðu fyrirmyndir. Þær þurfa því að vera áber-
andi í sínum störfum og láta e.t.v. meira í sér heyra en karl-
arnir til þess að ryðja brautina fyrir fleiri konur.“
Þór Sigfússon, framkvæmdastjóri Sjóvár:
Fjölbreyttari fyrirtæki
hugsa meira út fyrir boxið
Mér finnst eins og mörg fyrirtæki séu að uppgötva kostina við að
hafa meiri fjölbreytni í stjórnum. Einsleitnin í stjórnun og stjórnum
fyrirtækja, sem verið hefur, kann að vera ein orsök þeirra vanda-
mála sem við stöndum frammi fyrir; stundum þarf meiri fjölbreytni í
hópa til þess að umræður verði skarpari og gagnrýnni.
Við finnum þetta vel hjá okkur í Sjóvá þar sem fjölbreytni er
töluverð hvað þetta varðar. Í fyrsta lagi endurspeglar fyrirtækið
betur viðskiptavinahópinn sem er gríðarlega mikilvægt – eiginlega
bráðnauðsynlegt. Í öðru lagi er umræðan breiðari og betri. Ég held
að fyrirtækið okkar hugsi meira út fyrir boxið með þessu fyrirkomu-
lagi og það þurfa flest fyrirtæki að gera. Meiri fjölbreytni í stjórnum
fyrirtækja er góður bisness.