Frjáls verslun - 01.05.2008, Page 179

F R J Á L S V E R S L U N • 5 . T B L . 2 0 0 8 179
t e n g s l a n e t h e r d í s a r þ o r g e i r s d ó t t u r
Hvaða áhrif hefur tengslanetið haft?
„Tengslanetið hefur sent frá sér ályktanir, meðal annars um
afnám launaleyndar, sem fór inn í stjórnarsáttmálann og síðan
jafnréttislögin. Einnig um þörf á að setja lög um hlutfall kvenna
í stjórnum skráðra fyrirtækja og það fór inn í lög um opinber
hlutafélög. Sumir eru hneykslaðir á því að við séum að senda
frá okkur kröfur, en maður verður að ganga skrefinu lengra til
þess að á mann sé hlustað og það er svo langt þangað til hlutur
kvenna verður réttur. Annars eru karlmenn afar hrifnir af tengsla-
netinu. Ég er að hitta menn sem spyrja: Hvernig er þetta hægt,
hvaða galdur er þarna í gangi og af hverju vill konan mín fara ár
eftir ár?“
Og af hverju er það?
„Af því að þetta eru allar konur, ekki einsleitur hópur innan
sömu stéttar. Þær koma saman og finna kraftinn hver í annarri,
þarna er svo mikil fjölbreytni en samt samhljómur, hlýja, gleði og
eldmóður, sem skapar töfrana.“
Þú ert að fara til Feneyja og ery nýkomin frá Svartfjalla-
landi. Kæmi til greina að fara með tengslanetið í útrás?
„Já. Ég get vel séð fyrir mér að þessi hugmynd sem ég þróaði og
sá veruleiki sem hún er orðin, gæti gert sig á evrópskum vett-
vangi. Það er svo brýnt að auka hlut kvenna í ákvarðanatöku
í stjórnun samfélaga. Konur hafa lengst af séð um grunninn,
börn og heimili og án hans verður engin yfirbygging. Það er
sjálfsagður réttur þeirra að hafa jafn mikið um það að segja hvert
stefnir í samfélaginu og karlarnir.
Ástæðan fyrir því að jafnréttismál hafa verið sett á dagskrá
í Evrópusambandinu er ekki sú að körlum finnist þetta svo
æðisleg hugmynd, heldur sú staðreynd að jafnrétti er forsenda
efnahagslegra framfara, velferðar og þess að samfélagið virki og
við deyjum ekki út. Við skilnað eru það yfirleitt konur sem axla
hitann og þungann, sitja eftir með lægri laun og ábyrgð á börn-
unum. Almennt axla konur ábyrgðina á uppeldi barna og umsjá
fjölskyldu samhliða skyldum sínum á vinnumarkaði, en hafa lítil
áhrif og lítil laun. Þessu verður að breyta, því ef mannréttindi
eru brotin á stórum hópi fólks, er það alltaf ávísun á eitthvað
mjög slæmt.
Nú er mikil upplausn í samfélaginu og erfiðir tímar fram-
undan. Það verður aldrei gott ástand nema hlúð sé að grunn-
inum, sem eru börnin og það verður ekki hlúð að börnunum
nema það sé hlúð að mæðrum þeirra líka. Það er ekki verið
að hlúa að konum í dag, það er aðallega verið að bæta á þær
byrðum. Ég lít ekki á þetta sem baráttu fyrir kvenréttindum,
heldur einfaldlega fyrir mannréttindum. Það verður að gera
þetta samfélag mannlegra og það gerum við ekki með því að láta
hart mæta hörðu, heldur með því að konur standi saman um að
ná fram raunverulegu jafnrétti.“
Vigdís Grímsdóttir rithöfundur:
tengslanetið er
módel framtíðarinnar
„Mér var einu sinni sögð saga af
manni sem hafði þá náttúru að
allt sem hann snerti breyttist í gull
bæði í óeiginlegri merkingu og eig-
inlegri. Ég held að Herdís Þorgeirs
sé svona manneskja; það mynd-
ast dýnamískt afl og glæsileiki í
kringum það sem hún tekur sér
fyrir hendur. Tengslanetið er einmitt
dæmi um þetta; það er nefnilega
ekki nóg að fá hugmynd, málið er
að hafa kraft, vit og áræði til að
framkvæma og virkja svo aðra til liðs við sig. Herdís kann að
virkja hugvitið svo um munar og það er einmitt okkar sterkasta
vopn. Tengslanetið er því módel framtíðarinnar.“
Valgerður Bjarnadóttir alþingismaður:
Fyrirlesarar í fremstu röð
„Tengslanetið var fróðlegra, marg-
breytilegra og skemmtilegra en síð-
ast. Ég hélt nú að ekki væri hægt
að toppa þá ráðstefnu. Erlendu
konurnar sem Herdís fær til fyrir-
lestrahalds eru í fremstu röð og
vekja konur til umhugsunar. Síðan
taka við pallborðsumræður daginn
langan – engri held ég samt að
finnist dagurinn langur – þar sem
ólíkar konur vinna hver á sinn hátt
úr þeim spurningum sem lagðar
hafa verið fyrir. Herdís hefur sérstakt lag á að fá hverja og
eina til að leggja sig fram. Hún hefur líka einstakt lag á að
rífa konu upp úr gömlum hjólförum og fá hana til hugsa hlut-
ina upp á nýtt, eða að minnsta kosti reyna að hugsa þá upp á
nýtt. Þetta smitar, og allar konur á öllum aldri verða í sjöunda
himni á þessari samkomu. Hreint ótrúlegt!“
SaGT uM TEnGSlanETS-ráðSTEfnurnar:
Vigdís Grímsdóttir
rithöfundur.
Valgerður Bjarnadóttir
alþingismaður.
Helga Þórarinsdóttir gaf rétta tóninn.