Jökull - 01.01.2001, Page 144

Magnús T. Guðmundsson
SKIPULAG OG FRAMTÍÐ
GRÍMSFJALLS
Á stjórnarfundi þann 1. febrúar 1999, skipaði stjórnin
5 manna nefnd til að gera tillögur um framtíðarþró-
un og nýtingu aðstöðunnar á Grímsfjalli. Í nefndinni
sitja Steinunn Jakobsdóttir, formaður, Halldór Gísla-
son yngri, Ástvaldur Guðmundsson, Finnur Pálsson
og Jósef Hólmjárn. Nefndin átti í fyrstu að skila áliti
í maí, en heldur hefur teygst á starfstímanum, enda
höfðu menn ekki gert sér grein fyrir hve umfangsmik-
ið verkefnið var, né hve miklir möguleikar liggja í að-
stöðu okkar við Grímsvötn. Staðurinn er einstæður í
heiminum og búast má við að eftirspurn eftir samstarfi
við félagið vegna margháttaðra mælinga fari vaxandi
á næstu árum. Hefur nefndin unnið mikið og gott starf
og má búast við að hennar sjái stað í starfi félagsins
og áherslum næstu allmörg ár.
AÐILD AÐ SAMÚT
Félagið er aðili að SAMÚT, Samtökum Útivistarfé-
laga, sem stofnuð voru haustið 1998. Hafa nokkr-
ir fundir verið haldnir í stjórn samtakanna og hef-
ur formaður félagsins sótt þá fyrir þess hönd. Einnig
unnu formaður og gjaldkeri nokkuð að tillögugerð um
stefnumörkun samtakanna, en henni er ekki að fullu
lokið.
FRAMTÍÐ OG STAÐA FÉLAGSINS
Nú fer í hönd afmælisár, því félagið verður 50 ára
þann 22. nóvember á þessu ári. Stjórnin hefur rætt ým-
islegt sem gera má til hátíðarbrigða í tilefni afmælis-
ins. Áformað er að halda sérstakan afmælisfund eða
dagskrá í nóvember, þar sem starfsemi félagsins verð-
ur kynnt og minnst stórra áfanga í sögu rannsókna á
íslenskum jöklum. Undirbúningur er skammt á veg
kominn en vonast er til að hátíð sem þessi muni verða
lyftistöng fyrir félagið og vekja á því athygli. Einnig
er ákveðið að árshátíð félagsins verður haldin á Hót-
el Sögu þann 18. nóvember og hefur skemmtinefnd
þegar verið skipuð. Áformað er að safna sérstöku af-
mælisefni í Jökul, og er stefnt að því að 50. hefti hans
komi út á afmælisárinu.
Jöklarannsóknafélagið hefur á að skipa harðsnún-
um hópi áhugamanna og ljóst er að staða jöklarann-
sókna væri önnur í dag ef þess hefði ekki notið við.
Einnig er ljóst að rannsóknir á Grímsvötnum væru
mun fátæklegri en raun ber vitni ef ekki hefði kom-
ið til samtakamáttur félagsins. Auður félagsins ligg-
ur einkum í þessu, en ekki síður í sögu félagsins og
tímaritinu Jökli sem bráðum hefur nú komið út í 50 ár
– eina ritið sinnar tegundar hér á landi. Jökull nýtur
nokkurrar virðingar hjá útlendum fræðimönnum. Sést
það m.a. af því að sífellt fleiri útlendingar senda grein-
ar inn í ritið, um rannsóknir sínar á Íslandi. Þegar út-
gáfan er komin á réttan kjöl, eru allar forsendur til að
hægt verði að fjölga erlendum áskrifendum töluvert.
Að þessu mun stjórnin vinna af alefli. Einnig er ljóst
að færi félagsins í rannsóknum eru töluverð. Vert er
að benda á að félag eins og JÖRFÍ getur mun betur
en stofnanir unnið að langtímaverkefnum, s.s. eins og
mælingum á afkomu Grímsvatna (47 ár) eða legu jök-
ulsporða (68 ár og sumstaðar lengur).
Framtíð félagsins er björt en ekkert verður til af
engu. Framtíð félagsins er í okkar höndum og ef við
stöndum okkur í rannsóknum, útgáfu, ferðalögum og
öðru því sem að gangi má koma, verður gaman að
starfa í Jöklarannsóknafélagi Íslands.
Magnús Tumi Guðmundsson
144 JÖKULL No. 50