Skírnir - 01.09.2012, Qupperneq 159

SKÍRNIR AF HVERJU ERU KONUR MEÐ FÆTUR? 419
skipstjórinn skellihlær og segir: „Já, góða mín, nú léstu sko plata þig. Þú ert
um borð í Herjólfi."23
Hér má nefna að ljóskur í bröndurum eru ekki alltaf ljóshærðar.
Nauðsynlegra virðist vera að þær séu kvenkyns og vitlausar en hára-
litnum er stundum breytt án þess að það hafi áhrif á niðurlag brand-
arans. I þessu tilviki fannst sagnamanninum t.d. sniðugt að breyta
ljóskunni í rauðku þar sem vinkona hans, sú sem hlustaði á brand-
arann, var rauðhærð. Hins vegar hafði ljóska átt í hlut þegar hann
sjálfur heyrði brandarann fyrst. Þetta er mikilvægt að hafa í huga
þegar rætt er um ljóskubrandara þar sem þeir fjalla í raun og veru
frekar um konur (sem kynferðislegt viðfang) en ljóshærða; heimska
ljóskunnar er fremur bundin kyni hennar en háralit.
Konan í ljóskubröndurum birtist ekki aðeins sem vitgrannt kyn-
ferðislegt viðfang heldur er greindarskerðingu hennar stundum teflt
fram sem andstæðu við gáfnafar karlmanna (óháð háralit þeirra).
Eina dæmið í gagnagrunninum þar sem ljóska er ekki vitlausari en
karlmaður er þegar hún er stöðvuð við akstur af lögreglunni í
Hafnarfirði, að því gefnu að við sjáum lögregluþjóninn hafnfirska
fyrir okkur sem karlmann:
Það var einu sinni ljóska að keyra í Hafnarfirði og hún var stoppuð af lögg-
unni sem bað um að fá að sjá ökuskírteinið hennar. Þá spurði hún: „Hvað
er það?“ Þá sagði löggan: „Það er svona bleikt með mynd af þér.“ Hún
leitaði í veskinu þar til að hún fann bleika púðurdós, tók hana upp, opnaði
og leit í spegilinn: „Er það þetta?" spurði hún. Löggan tók dósina, leit í
spegilinn og sagði: „Nú! Ekki vissi ég að þú værir í lögreglunni!" 24
I brandaranum er ljósku- og Hafnfirðingabrandara slegið saman og
má vart sjá hvort er vitlausari, konan eða Hafnfirðingurinn. Hann
má einnig sjá sem dæmi um brandara sem bregður á leik með brand-
arahefðina og formið með því að búa til einn brandara úr tveimur
brandarabálkum sem hafa verið aðskildir. Þetta er eina dæmið sem
finna má í gagnagrunninum þar sem ljóska opinberar heimsku sína
23 Heimildarmaður er 29 ára karlmaður. Brandarinn var sendur á Facebook, 1. apríl
2009.
24 Heimildarmaður er 31 árs kona. Safnað með símtali, 25. febrúar 2009.