Litli Bergþór - 01.06.2022, Qupperneq 6

6 Litli-Bergþór
Við félagarnir í Lionsklúbbnum Geysi erum
fjarri því að vera með uppgjafartón, þrátt fyrir
heimsfaraldurinn höfum við náð að halda uppi
umtalsverðu starfi á undanförnum misserum. Nokkrir
fundir hafa fallið niður á vetrinum sem var að líða af
þeim sökum, en ekki margir.
Við erum 33 félagar i klúbbnum á ýmsum aldri. Góður
andi er í hópnum og samheldni meðal félaga. Við
njótum þess að eiga góðar stundir saman. Fyrir utan
reglulega fundi sem haldnir eru að jafnaði fyrsta og
þriðja miðvikudag í hverjum mánuði frá september til
maí, förum við í vorferð og haustferð. Umhverfi og
gróður eru okkur hugleikið. Margra ára hefð er fyrir því
að gróðursetja trjáplöntur á hverju vori á afrétti okkar
Tungnamanna. Við hreinsum meðfram stofnvegum
á vorin í sveitarfélaginu, frá sveitarmörkum við
Ósabakka og alla leið upp að Gullfossi, auk þess að
fara út með Hlíðum og að Hvítárbrú við Bræðratungu.
Í vetur höfum við fengið til okkar nokkra fyrirlesara
og heimsótt fyrirtæki. Má þar nefna Hótel Fagralund
og Friðheima.
Þau verkefni sem við höfum stutt á undanförnum
árum eru styrkur til leikskólans, styrkur til kaupa á
fjarfundarbúnaði við heilsugæsluna í Laugarási og
framlag til lækningatækja í Vestmannaeyjum. Einnig
framlag í ,,Sjóðinn góða“ en það er sunnlenskur
hjálparsjóður sameiginlegur með lionsklúbbum og
kvenfélögum á Suðurlandi. Alþjóða hjálparsjóður
Lions hefur fengið skerf frá okkur á hverju ári, en sá
sjóður er notaður á alþjóðavísu til stórra sem smárra
líknarverkefna, sá stærsti í veröldinni. Um þessar mund-
ir renna þaðan miklar fjárhæðir til Úkraínu. Klúbburinn
tók í nýliðnum apríl þátt í rauðufjaðrarsölunni. Við
erum þakklátir fyrir sérlega góðar viðtökur hér á okkar
svæði. Í nóvember hefur verið hefð fyrir því að bjóða
upp á fríar blóðsykursmælingar.
Okkar stærsta fjáröflun er Villimannakvöldið okkar.
Það héldum við að þessu sinni 22. apríl síðastliðinn
í Aratungu og tókst það sérlega vel í alla staði. Um
þessar mundir erum við að vinna að útgáfu símaskrár,
en hana gefum við út annað hvert ár. Hún hefur reynst
okkur mikilvæg fjáröflun og er dreift ókeypis á öll
heimili í Biskupstungum. Við seljum hins vegar í hana
auglýsingar.
Nú líður að lokafundi þessa vetrar og horfum við
félagarnir bjartsýnir til framtíðar klúbbsins. Við
þökkum af heilum hug þá velveild sem við höfum
mætt í samfélaginu.
Fyrir hönd klúbbsins, Kristófer Tómasson
og Guðfinnur Eiríksson.
Lionsklúbburinn Geysir er á góðu róli
Myndin er tekin í Mosfellsbæ í vorferð Lionsklúbbsins Geysis í apríl 2022.
Þarna eru frá vinstri: Jóhannes á Brekku, Þórarinn á Spóastöðum, Benedikt á Sporði, Einar Þórketill á Litla- Fljóti, Kristófer í Launrétt, Sigurður í
Skyggnissteini, Snorri á Tjörn, Sveinn í Þöll, Erlendur á Vatnsleysu, Helgi í Hrosshaga, Þorsteinn í Hábrún, Jón Bjarni í Skógarbergi, Bjarni á Brautarhóli,
Örn í Lindatungu, Guttormur fyrrum Skálholtsbóndi, Kristín Sverrisdóttir á Reykjum (Gestgjafi), Guðfinnur í Borgarholti og Hjalti í Ásakoti.