Litli Bergþór - 01.06.2022, Page 8

8 Litli-Bergþór
Mín æskuár fóru mikið í að stunda íþróttir,
hestamennsku eða syngja í Barna- og
Kammerkór Biskupstungna. Þegar ég lít til baka
þá finnst mér það þvílík forréttindi að hafa alist
upp í Biskupstungum. Fallegri og skemmtilegri
sveit er erfitt að finna.
Á sumrin og í fríum vann ég oftar en
ekki við ýmis garðyrkjustörf á hinum ýmsu
garðyrkjustöðvum í sveitinni. Áhuginn fyrir
náttúrufræði hefur alltaf verið til staðar. Ég man
til dæmis eftir því þegar Halldór móðurbróðir
minn kom í gróðurhúsið sem þá var í Hrosshaga
til að greina einhver skordýr sem voru á ferli
í ræktuninni. Þetta hefur lengi setið í mér og
fannst mér þetta alltaf einstaklega áhugavert
starf sem frændi minn hafði.
Eftir grunnskóla fór ég í Menntaskólann að
Laugarvatni og útskrifaðist þar af Náttúrufræðibraut
árið 2006. Menntaskólaárin voru skemmtileg og
lærdómsrík, og mér verður oft hugsað til skemmtilegu
stundanna og vináttunnar sem myndast þegar búið er
á heimavist.
Haustið 2006, eftir að ég útskrifaðist úr menntaskóla,
ákvað ég að prófa eitthvað alveg nýtt. Fara svolítið út
fyrir þægindarammann og flytja til Kaupmannahafnar.
Til að byrja með vann ég sem þjónn við morgunmatinn
á hóteli á Vesterbrogade. Þar þurfti ég að mæta fyrir
allar aldir til að gera morgunmatinn tilbúinn. Það
var afar lærdómsríkt fyrir saklausu sveitastelpuna að
rölta um miðbæ Kaupmannahafnar í vinnuna, sem lá
samhliða hinni alræmdu Istegade. Samstarfsfólk mitt
hló til að mynda mikið að mér þegar að ég loksins
áttaði mig á því að konurnar sem stóðu á götunum
þarna snemma á laugardagsmorgnum voru ekki að
bíða eftir leigubíl á leið sinni heim af djamminu.
Árið 2008 ákvað ég að sækja um nám í
Kaupmannahafnarháskóla. Og þar gerði áhuginn
á náttúrufræði og garðyrkju það að verkum að ég
byrjaði í Náttúruauðlindafræði (Naturressourcer), með
sérfræðiáherslu á plöntur. Þar, í fyrstu skólavikunni,
kynntist ég svo mínum tilvonandi manni Morten. Við
byrjuðum í sama námi en hann sérhæfði sig svo seinna
meir í umhverfisefnafræði.
Árið 2012 ákváðum við Morten að taka smá
pásu frá náminu og ferðast til suð-austur Asíu, sem
var alveg einstakt ævintýri. Eftirminnilegastar eru
ferðir um Indónesíu og svo Japan. Heimurinn er ekki
stærri en svo, að í Japan kynntumst við óvænt tveim
japönskum systrum. Önnur systirin starfaði fyrir
íslenska sendiráðið, talaði reiprennandi íslensku, átti
dóttur sem var í Menntaskólanum að Laugarvatni og
hafði verið Barna- og Kammerkór Biskupstungna
innan handar þegar að kórinn fór til Japans árið 2005.
Ég útskrifaðist úr Háskóla Kaupmannahafnar árið
2016 með cand.agro gráðu í Agriculture. Planið var
alltaf að fara heim þegar að loknu námi og drauma-
starfið var að vinna sem ráðunautur í garðyrkju. En
stundum leiðir lífið mann á aðra braut og síðustu
fjögur ár hef ég starfað sem ráðunautur við ylrækt hér
í Danmörku, í fyrirtæki sem heitir Hortiadvice.
Frá æskuslóðum til útlanda
Fríða Helgadóttir
Fjölskyldan um jólin 2021.
Í Bukit Lawang í Indónesíu 2012.