Goðasteinn - 01.09.1967, Blaðsíða 61

var óvarlegt að treysta, ef framhald yrði á jarðskjálftunum. Og það
voru fleiri en hann, sem stóð stuggur af grjótveggjum og gripu til
ýmissa úrræða. Samúel kom sér upp skýli úti á túni, þar sem nú
stendur prestshúsið. í skýlið útvegaði hann sér nokkrar járnplötur
og borðarenglur. Skýlið var með rislagi, strigaklætt á stöfnum.
Þarna hafðist Samúel við með fólk sitt, meðan jarðskjálftarnir
stóðu. Þótt seint væri risið úr rekkju þennan dag, nægði hann þó
til að reisa skýlið og flytja í það nauðsynlegan aðbúnað.
Þegar hér var komið, hófst hið fyrirhugaða starf á Bakkanum.
Hjá Guðmundi á Háeyri var reist viðbygging við íbúðarhúsið, og
svo var fuilgert hús Jóns Jóhannssonar. Þegar við vorum komnir
að Háeyri, fóru að berast fréttir af slysförum af völdum jarðskjálft-
anna og spjöllum, er urðu á bæjarhúsum viðsvegar uppi um svcitir.
Guðmundur á Háeyri sat sig ekki úr færi með að hafa tal af ferða-
mönnum, þegar tíðinda var von, eins og þá var ástatt. Hann sagði
okkur svo það, er fréttnæmt var.
Eina frétt sagði Guðmundur okkur, sem hvorki honum né okk-
ur þótti trúleg. Svo átti að hafa borið við á bæ einum á Rangár-
völlum eða Landi, þegar einn jarðskjálftakippurinn reið yfir, að
rófurnar í kálgarðinum losnuðu og sneru skottunum upp.
Ekki get ég greint frá, hve margir kippirnir urðu, áður yfir lauk,
en glöggt man ég eftir fjórum og hvar ég var staddur hverju sinni,
en vafalaust eru til skráðar heimildir fyrir því hve margir þeir
voru.
Eitt var sérkennilegt við jarðskjálftana þetta sumar: kippirnir
riðu yfir á vissum tímum sólarhringsins, klukkan hálf ellefu og
hálf fimm, ýmist kvölds eða morgna. Það var líkast sem þessi
stundvísi jarðskjálftakippanna væri í skyldleika við tímasprengjur
spellvirkja úti í löndum. Eða hvað vilja jarðfræðingar vorir segja
um það?
Sept. 1958. Höfundur dó 1961, sbr. Goðastein, 1. hefti 1966.
Goðasteinn
59