Goðasteinn - 01.09.1967, Síða 82

rænum málvísindum og bókmenntum við ríkisháskólann í Grand
Forks í Norður-Dakota. Á sama tíma hefur hann unnið þrotlaust
áhugastarf í þágu íslenzkra mennta, austan hafs og vestan. Hann
er í senn fjölvís rithöfundur, dáður fyrirlesari og gott skáld, jafnt
á enska tungu sem íslenzka. Hann hefur komið víða við sögu og,
hvarvetna til góðs. Richard Beck hefur hlotið margskonar heiður
hjá háskólum og vísindastofnunum, en frami og mannvirðing hafa
ekki svipt hann - fremur en aðra góða drengi - auðmýkt, lát-
leysi og sannri góðvild í garð allra, sem á vegi hans verða. Hann
er maður lífstrúar og lífsgleði. Lífið hefur gefið honum margar
ágætar gjafir. Hann hefur að sönnu reynt þunga sorg oftar en einu
sinni, en sól hefur líka einatt skinið í heiði á ævivegi.
Richard Beck er þrígiftur. Fyrsta kona hans, Ólöf Daníelsdóttir
frá Helgustöðum, dó á æskualdri. Önnur kona hans, Bertha, var
Rangæingur að ætt. Eiga margir um hana góðar minningar frá för
þeirra hjóna til íslands 1954. Börn þeirra eru tvö: Richard og
Margaret Helen. Þriðja kona dr. Richard er Margaret J. Brandson,
listfræðingur. Voru foreldrar hennar Einar Brandsson frá Reyni i
Mýrdal og kona hans, Sigríður Einarsdóttir frá Hvoli. Minnisstæð*
er mér koma þeirra hjóna í byggðasafnið í Skógum 26. júní 1964.
Dr. Richard gckk um það hljóður, jafnvel eins og annarshugar, en
enginn safngestur hefur lýst eins eftirminnilega og hann áhrifum
þeirrar sögu, sem fábrotin og fátækleg áhöld Skógasafns segja. Frú
Margaret færði þá safninu gjafir, sem mér eru sem helgur dómur:
sálmabók móður sinnar og sokkaplögg foreidra sinna, er þau
höfðu á fótum vesturfararárið 1886. Þetta var geymt dyggilega til
minningar um gamla landið austur í hafi.
Richard Beck og kona hans hafa nú flutt heimili sitt vestur til
Victoria í British Columbia, sem er fæðingarbær frú Margaret, og
mun ekki skorta verkefni, meðan guð gefur orku til starfa, því
áhugaefnin eru mörg. Goðasteinn sendir þeim beztu kveðjur og ósk-
ir um hamingju, hvar sem leiðir liggja.
Þórður Tómasson
80
Goðasteinn