Jólablað félagsins Stjarnan í austri. - 24.12.1920, Side 12

Þeir ákalla að vísu hinn alvitra Guð
um aðstoð við brennur og morð,
en gleyma, að alt þetta eru hans börn,
sem ófriðinn heyja á storð.
II.
Vér deilum um leiðina, er liggur til hans
í ljósinu eilífa, er býr,
því dimman í berginu deprar oss sýn,
svo dómgreindin verður ei skýr.
Ó, blessaði Meistari, birzt þú á ný
og börnunum fáfróðu kenn!
Ó, kom þú og bjargaðu úr berginu út
þeim bundnu, er sitja þar enn.
Lát himnesku tónana hljóma til vor,
í hamarinn þykka inn.
Svo vakni og glæðist hið góða í oss
og gleymist ei vegurinn þinn.
Ó, kom til vor, eilífa kærleikans lind,
með kraftinn og friðarins mál
og gef oss að frelsa þá guðlegu mynd,
sem geymir hver einasta sál.
Árdís.
0