Tímarit um menntarannsóknir - 01.01.2005, Qupperneq 6

Annað tölublað Tímarits um menntarannsóknir (TUM) er nú komið út. Í tímaritinu
er vikið að málum sem eru ofarlega á baugi í umræðu um menntamál í samræmi
við það markmið tímaritsins að vera fræðilegt framlag til þjóðfélagsumræðu um
menntamál.
Gretar L. Marinósson setur í pistli sínum fram hugleiðingar um hvaða hlutverki
Tímarit um menntarannsóknir eigi að gegna í umræðu um menntarannsóknir á
Íslandi. Í greinunum er svo komið víða við - frá leikskóla til háskólastigs - og ólíkri
aðferðafræði er beitt. Í grein Sigrúnar Aðalbjarnardóttur og Kristjönu Stellu Blöndal
er fjallað um brotthvarf úr framhaldsskóla og sýnt hvernig ákveðnar uppeldisaðferðir
tengjast því. Börkur Hansen og félagar fjalla um það hvernig gengið hefur að innleiða
lögbundið sjálfsmat í skólum. Þau leita skýringa á því hvers vegna sumum skólum
gengur betur en öðrum að temja sér þessar starfsvenjur. Ásta Bjarnadóttir bendir á
gildi þess að leggja fyrir stutt próf til þess að spá fyrir um árangur í háskólanámi og
til þess að velja nemendur inn í háskóla. Sýn leikskólastjóra á leikskólann sjálfan er
viðfangsefni Jóhönnu Einarsdóttur og Kristínar Karlsdóttur, en þær byggja á fjölda
viðtala nemenda í Kennaraháskóla Íslands við leikskólastjóra. Sigurgrímur Skúlason
tekur fyrir mikilvægt aðferðafræðilegt efni, þ.e. þýðingu og staðfærslu á erlendum
spurningalistum. Erlend mælitæki eru oft fengin að láni við rannsóknir hér á landi
og Sigurgrímur lýsir verkþáttum sem myndu afstýra göllum sem geta hrjáð þýdd
mælitæki.
Til þess að draga fram hagnýtt gildi tímaritsins höfum við í samráði við höfunda
tekið saman stuttar klausur um hagnýtt gildi greinanna og birtum þær fyrir neðan
útdrátt á titilsíðu greinar. Þetta er tilraun og gott væri að heyra frá lesendum hvernig
þeim líkar hún.
Ritinu barst mikið efni og talsvert af efni er í vinnslu fyrir næsta tölublað. Ákveðið
hefur verið að flýta skiladegi innsends efnis og miða við 1. júlí ár hvert svo að
ritstjórn hafi rýmri tíma til þess að ganga frá tímaritinu í samvinnu við höfunda.
Ritstjórnin vill þakka ritrýnum fyrir sitt framlag. Einnig vill undirritaður þakka
Amalíu Björnsdóttur, Friðriki H. Jónssyni og Námsmatsstofnun fyrir aðstoð við
útgáfu tímaritsins.
Ragnar F. Ólafsson
Frá ritstjóra
6