Ritið : tímarit Hugvísindastofnunar - 01.05.2015, Qupperneq 9

8
samsetningar og framsetningar efnis, þar á meðal auglýsinga, auk þess sem
fjallað er um Birting sem „lítið tímarit“ út frá þeim skilgreiningum sem
Ezra Pound setti fram í áhrifamikilli grein sinni „Small Magazines“ árið
1930. Í grein sinni í þessu hefti beinir Þröstur fyrst og fremst sjónum að
mikilvægi Birtings fyrir miðlun og úrvinnslu samtímamenningar.
Greinarnar sex sem hér eru birtar sýna hver um sig hluta af þeirri fræðilegu
vinnu sem í doktorsritgerðirnar hafa verið lagðar. Greinarnar eru skrifaðar
á íslensku fyrir íslenskt fræðasamfélag og íslenskan lesendahóp, og gefa
lesendum kost á að setja sig inn í þau viðfangsefni sem doktorsnemunum
hafa þótt nægilega áhugaverð til að helga sig rannsóknum á þeim, þau ár
sem það tekur að skrifa heila doktorsritgerð. Þessi verk eru ekki aðeins
mikilvæg fræðilega, þau eru líka hluti af menningarlegri greiningu sem
stöðugt þarf að fara fram í landi þar sem fólki er annt um menningarlegt
sjálfstæði. Því má halda fram að Hugvísindasvið sé ein helsta menningar-
stofnun landsins. Sem slík verður hún í senn að horfa út í heim, byggja
brýr milli Íslands og erlendra menningarheima, og halda málstað fræða
stundaðra á íslensku á lofti. Hún verður jafnframt að minna á að hugvís-
indi þrífast ekki nema þau nái til almennings og veki fólk til umhugsunar,
líka þá einstaklinga sem standa utan háskólanna.
Ljósmyndin á kápunni ber nafnið „Lesið í gröf“ og er eftir rann-
sóknastjóra Hugvísindasviðs, Eirík Smára Sigurðarson. Merkingaraukar
myndarinnar eru margvíslegir og áleitnir, en verða þeir ekki greindir hér.
Lesendum Ritsins verður látin eftir sú ánægja.
Guðni Elísson og Jón Ólafsson
GUÐNI ELÍSSON OG JÓN ÓLAFSSON