Ritröð Guðfræðistofnunar - 01.01.1990, Síða 26

Studia theologica islandica
Greinilegt er þó að trú á framhaldslíf er sterkari meðal hinna eldri en yngri
og eindregnari meðal kvenna en karla. Þetta kemur skýrast í ljós þegar litið er
á svör við fyrsta svarsmöguleikanum um að ekkert líf sé eftir dauðann. Þar má
segja að verði kynslóðaskipti við 45 ára aldursmörkin og mikill munur er á
körlum og konum. Trú á framhaldslíf sálarinnar er einnig háð aldri og kyni
og er í því efni mjög greinilegur munur á viðhorfum þeirra yngstu og elstu. Af
þessu má sennilega draga þá ályktun að áhrifa frá spíritisma gæti í mun ríkara
mæli meðal elstu en yngstu kynslóðarinnar. Er það niðurstaða sem ekki verður
sagt að komi á óvart. Upprisutrú nýtur aftur á móti nánast sama fylgis meðal
þessara aldurshópa og er þar jafnframt lítill munur á körlum og konum. Fyrir-
fram hefði mátt búast við almennari upprisutrú meðal hinna elstu, en svo er
ekki. Þetta minnir á að enginn munur kom fram á afstöðu elstu og yngstu kyn-
slóðarinnar til spurningarinnar um guðdóm Jesú. Þar sem hér er um að ræða
tvær grundvallarkenningar kristinnar trúar hlýtur þessi niðurstaða að vekja
nokkra athygli, einkum þegar haft er í huga að trúaráhugi er í flestu mun meiri
meðal eldra en yngra fólks.
Tafla II, 12 Líf eftir dauðann og trúarafstaða:
Trúlaus Óvissa Trúir á Játar kr.
um trú sinn hátt trú
n= 40 66 307 233
Ekkert líf eftir dauðann 62.5 6.1 6.8 0.9**
Eitthvað tekur við 35.0 71.2 66.8 52.4**
Maðurinn endurholdgast 2.5 1.5 5.2 7.3ns
Sálinn á annað tilverustig 10.0 24.2 30.6 35.2*
Maðurinn rís upp 0.0 4.5 8.1 28.8**
Þessi tafla veitir bæði upplýsingar um trú á líf eftir dauðann og urn trúarleg
viðhorf í víðtækari merkingu. Eins og við er að búast nýtur upprisutrú lang
mests fylgis meðal þeirra sem játa kristna trú. Ekki getur það þó talist mikið að
rúmlega íjórðungur þeirra merki við þessa staðhæfmgu. Það vekur líka athygli
að lítið samband virðist vera á milli trúar á upprisuna og á Jesú sem guðs son
og frelsara mannanna. Sem fyrr segir eru það 72% þeirra sem játa kristna trú
er merkja við Jesú sem guðs son en 29% merkja við upprisuna. Kanna má fylgni
á milli þessara tveggja trúarviðhorfa með beinum hætti og spyrja hversu hátt
hlutfall þeirra sem játi trú ájesú sem son guðs merkja við upprisuna. Kemur
reyndar í ljós að það er mjög svipað hlutfall og hjá hópnum sem kveðst játa
kristna trú, eða 26.5%. Þetta er athyglisvert og styður áreiðanleika niður-
stöðunnar þar sem hér er um tvo hópa að ræða sem eiga margt sameiginlegt
skv. heildarniðurstöðum, þótt það sé fjarri því allt.
24