Ráðunautafundur - 15.02.1991, Blaðsíða 268

-260-
í fimmta lagi vil ég nefna námskeið eða ráðstefnur erlendis. Þar má nefna m.a.
námskeið á vegum NJF. Einnig má nefna COMETT áætlunina á vegum Evrópu-
bandalagsins sem ætlað er að efla samstarf atvinnulífs og skóla um tækni- og
verkþjálfun. Meðal verkefna í COMETT áætluninni er endurmeimtun starfsmanna
einstakra atvinnugreina.
LOKAORÐ
Síðustu tvo áratugi hefur íslenskur landbúnaður tekið mjög miklum breytingum eins
og allir vita. Frá því að vera atvinnugrein í örum vexti yfir í atvinnugrein sem á
ýmsan hátt er í verulegum erfiðleikum.
Störf leiðbeinenda eru síbreytileg í eðli sínu og upprunaleg starfsmenntun þeirra
sem fást við leiðbeiningar dugar oft skammt. Ný þekking streymir að og leiðbeininga-
þjónustan verður á hverjum tíma að takast á við ný verkefni. Forsenda þess að
starfsmenn geti aðlagað sig að breyttum aðstæðum er að þeir sjálfir hafi möguleika
á að endurnýja þekkingu sína.
Hér á undan hafa verið nefndar nokkrar leiðir sem eru í boði fyrir starfsmenn
leiðbeiningaþjónustunnar. Leiðirnar eru allmismunandi en spurning er hvernig þær
eru notaðar og hvaða möguleikar gefast fyrir starfsmenn til að afla sér nýrrar
þekkingar. Leiðbeinendur starfa oft einir sér eða í tiltölulega fámennum hóp og erfítt
getur reynst að komast frá reglubundnum störfum í nokkurn tíma ef viðkomandi
starfsmaður hefur hug á, t.d. námsdvöl í einhverja mánuði.
Víða erlendis er talað um síðasta áratug þessarar aldar sem áratug fullorðins-
fræðslu. Hér á landi er fullorðinsfræðsla orðin mjög umfangsmikil og eins og áður
er komið fram er talið að um 30% fullorðinna hafi sótt einhverja fullorðinsfræðslu
árið 1989. Að verulegu leyti var þarna um að ræða starfsfræðslu.
Innan landbúnaðarins má búast við að þróunin verði með svipuðum hætti og í
öðrum starfsgreinum m.t.t. óska um endur- og símenntun. Benda má í þessu
sambandi á þau viðbrögð sem fengist hafa af námskeiðahaldi bændaskólanna síðustu
ár.
Varðandi leiðbeiningaþjónustuna verður að efla þennan þátt í starfi og líta á
endur- og símenntun sem hluta af starfi á hverjum tíma. Jafnframt er ástæða til að
skoða hvort hagnýta megi þá reynslu sem t.d. Danir hafa af skipulögðu starfi á þessu
sviði. Meðal annars með mun meiri kynningu á þeim kostum sem eru í boði nú
þegar og einnig að skapa samstarfsvettvang milli einstakra stofnana um þessi mál.