Morgunblaðið - 01.02.2018, Page 12

12 DAGLEGT LÍF
MORGUNBLAÐIÐ FIMMTUDAGUR 1. FEBRÚAR 2018
Rafport ehf • Auðbrekka 9-11 • 200 Kópavogur • Sími 580 1900 • rafport@rafport.is
Fækkaðu
hleðslu-
tækjunum
á heimilinu,
skrifstofunni
eða sumar-
bústaðnum.
Tengill með USB
Dagskrá Borgarbókasafnsins á
Vetrarhátíð í Reykjavík 1.-4. febrúar
hefst með Háskaleikum í Grófinni á
Safnanótt kl. 18-21 annað kvöld,
föstudaginn 2. febrúar. Þegar dimma
tekur vakna þar til lífsins kynjaverur
og vættir sem hafa fundið sér íveru-
stað í öllum krókum og kimum.
Kjarkmiklum krökkum er boðið að
taka þátt í háskaleikunum, fara um
húsið og takast á við voðalegar
áskoranir. Þorir þú að kíkja inn í
leyniklefann í Hogwarts-skólanum og
takast á við Lord Voldemort, varúlfa
og vitsugur eða hitta fyrir glitrandi
og seiðandi ævintýra- og furðuverur í
töfraheimi Narníu? Kannski viltu
þreifa ofan í ógeðskassann þar sem
starandi augu veltast um í leðju,
slími, slor og hori innan um snáka og
snigla? Ef þú vilt fá hárin til að rísa
geturðu kíkt bak við tjöldin og hitt
Manninn magra. Mætti bjóða þér að
líta inn hjá Quasimodo, kroppin-
baknum voðalega, í kirkjuturninum?
Eða leggjast í líkkistu með uppvakn-
inga og beinagrindur allt um kring?
Viltu sigrast á óttanum við hið
ókunnuga og skríða í gegnum göngin
dimmu og djúpu þar sem allt getur
gerst? Muntu halda höfði eða enda
sem höfuðréttur óvættarinnar?
Komdu undir borðið og sjáðu hvort
þú haldir haus.
Frá kl. 21-23 verður svo hægt að
fara í koldimmt karókí þar sem 17
þúsund lög standa til boða. Í lokin fá
öll börn verðlaun fyrir áræði og kjark.
Háskaleikar í Grófinni á Safnanótt annað kvöld
Varúlfar, vitsugur og verulega voðalegar áskoranir
Kynjaverur Sumar kynjaverur og vættir fá hárin til að rísa á fólki.
Leikverkið
Maður í mis-
litum sokk-
um, sem
Halaleikhóp-
urinn frum-
sýnir kl. 20
annað kvöld,
föstudaginn
2. febrúar,
fjallar um ekkju sem býr í eldri-
borgarablokk. Dag einn er hún
kemur út úr Bónus situr ókunn-
ur maður í farþegasætinu í bíln-
um hennar. Maðurinn veit ekki
hvað hann heitir, hvar hann býr
eða hvert hann er að fara en
hann er í mislitum sokkum. Af
ótta við almenningsálitið
ákveður ekkjan að taka hann
með sér heim. Vinkonur hennar
og eiginmenn þeirra fléttast inn
í málið með tilheyrandi vand-
ræðagangi. Úr þessu tvinnast
síðan kostuleg og bráð-
skemmtileg atburðarás með lit-
ríkum karakterum.
Næstu sýningar eru 4., 9., 11.
og 16. febrúar. Miðasala í síma
897 5007 og midi@halaleikhop-
urinn.is.
Sýnt er í Halanum, en svo
nefnist salur í Sjálfsbjargar-
húsinu, Hátúni 12, Reykjavík.
Gengið er inn að norðanverðu
um austurinngang.
Nánari upplýsingar:
www.halaleikhopurinn.is.
Maður í mis-
litum sokkum
HALALEIKHÓPURINN
Leikendur og leikstjóri F.v. Alexander Ingi Arnarsson, Margrét Eiríksdóttir, Kristinn Sveinn Axelsson, Þröstur
Guðbjartsson leikstjóri, Herdís Ragna Þorgeirsdóttir, Stefanía Björk Björnsdóttir, Hlynur Finnbogason. Fremstar
eru Sóley Björk Axelsdóttir og Hanna Margrét Kristleifsdóttir, en hún og Hlynur leika aðalhlutverkin.
Valgerður Þ. Jónsdóttir
vjon@mbl.is
E
ftir frumsýninguna
annað kvöld fá leik-
arar og aðstandendur
leikritsins Maður í
mislitum sokkum að
leika lausum hala. Þá hefur Þröstur
Guðbjartsson leikstjóri lokið sínu
hlutverki, hans er ekki lengur þörf.
Eða svo segir hann að minnsta
kosti, en viðurkennir um leið að ef-
laust laumi hann sér inn á eina sýn-
ingu eða svo. „Það er ómögulegt
fyrir leikarana að vera alltaf með
leikstjórann hangandi yfir sér. Ég
kíki samt kannski við og gef góð
ráð ef á þarf að halda,“ segir hann.
Og, nei, hann er ekkert stress-
aður fyrir frumsýninguna. Hann er
þess fullviss að leikararnir átta í
Halaleikhópnum, sem fara með stór
og smá hlutverk í verkinu, muni
standa sína plikt með sóma og sann
og sömuleiðis tólf manna teymið
sem gegnir ýmsum hlutverkum á
bak við tjöldin.
Sjálfur er Þröstur sjóaður í
bransanum bæði sem leikari og
leikstjóri. Hann er búinn að setja
upp meira en 80 leiksýningar með
skólum og áhugaleikfélögum víða
um land allt frá því hann útskrif-
aðist fyrir fjórum áratugum úr
Leiklistarskóla Íslands, sem þá var
og hét.
Stútfull sýning af
orku og leikgleði
„Við skoðuðum ýmis leikrit, en
komum okkur svo saman um að
Maður í mislitum sokkum eftir Arn-
mund S. Backman hentaði leik-
hópnum mjög vel og líka í því rými
sem hann hefur yfir að ráða. Ég var
nýbúinn að setja leikritið upp með
áhugaleikhópi á Hofsósi þar sem
það hafði mælst mjög vel fyrir, og
þótt raunar alveg sprenghlægilegt,“
segir Þröstur og lýsir verkinu sem
miklum ólíkindaleik: „Farsi með
öllu tilheyrandi; rugli, hasar og
látum.“ Spurður hvort í verkinu
leynist ádeila eða boðskapur af ein-
hverju tagi svarar hann neitandi.
„Sýningin er stútfull af gríni, glensi,
orku og leikgleði, enda eiga áhorf-
endur bara að skemmta sér. Við er-
um ekkert að stinga á kýlunum í
þjóðfélaginu,“ segir hann.
En svo er áhorfendum vita-
skuld í sjálfsvald sett að lesa úr
verkinu það sem þeir vilja. Setja á
sig alvörugleraugun og rýna í að-
stæður og sjálfsákvörðunarrétt
aldraðra, ótta við almenningsálitið
og samskiptamáta fólks svo eitt-
hvað sé nefnt.
„Í Halaleikhópnum er fátt um
eldra fólk sem var tiltækt í leikinn
að þessu sinni. Mestu vandræðin
fólust því í að „elda“ leikendur því
leikritið hverfist um gamalt fólk.
Eldri maður í mislitum sokkum og
ekkja sem finnur hann í bílnum sín-
um eru í aðalhlutverkum, tvenn
eldri hjón eru líka stór hlutverk, en
tvær dætur mannsins í mislitu
sokkunum eru tiltölulega ungar,
eða á fertugs- eða fimmtugsaldri.
Allir leikararnir, nema einn, þurftu
að leika nokkra tugi upp fyrir sig ef
svo má segja. Sá yngsti, átján ára,
leikur sjötugan karl.“
Skemmtilegar áskoranir
Halaleikhópurinn er áhugaleik-
félag, stofnað 1992. Blandaður leik-
hópur, þar sem fatlaðir og ófatlaðir
vinna saman, og er hópurinn aðili
að Bandalagi íslenskra leikfélaga.
Árlega er sett upp vegleg leiksýn-
ing og er þá ráðinn atvinnuleikstjóri
til verksins. Þröstur segir mikla en
skemmtilega áskorun felast í að
leikstýra mismunandi samansettum
áhugaleikhópum. Tveir leikararnir í
Maður í mislitum sokkum séu til
dæmis í hjólastólum og því hafi
þurft að haga ýmsu með tilliti til
þess. Þá sé Halinn, salurinn í
Sjálfsbjargarhúsinu, þar sem leik-
ritið verður á fjölunum, ekki sniðinn
fyrir leiksýningar.
Þröstur þekkir þær fjalir því
að hann hefur áður verið Hala-
leikhópnum innan handar. Fyrst
með leiklistarnámskeið fyrir tíu ár-
um og síðan setti hann upp með
hópnum Sjeikspírs Karnivalið eftir
William Shakespeare árið 2009. Og
þótt Halinn sé kannski ekki full-
komnasta leikhús landsins, hefur
hann engar áhyggjur.
„Leikararnir, sem allir eru í
hálfu eða fullu starfi annars staðar,
hafa lagt á sig mikla vinnu frá því
við hófum undirbúninginn í lok
október og æft stíft, sérstaklega
síðustu vikurnar. Eins og í försum
af þessu tagi þurfa þeir að tala og
leika býsna hratt á köflum,“ segir
Þröstur og gerir fastlega ráð fyrir
að í Halanum verði allt með miklum
ólíkindum annað kvöld.
Halaleikhópurinn er rúmlega aldarfjórðungsgamalt
áhugaleikfélag, blandaður hópur fatlaðra og ófatl-
aðra. Félagar ganga í öll verk utan einu sinni á ári
þegar leikhópurinn setur upp veglega sýningu og ræð-
ur til sín atvinnuleikstjóra. Þröstur Guðbjartsson
varð fyrir valinu í ár og annað kvöld frumsýnir leik-
hópurinn ærslafullan gamanleik, Maður í mislitum
sokkum.
Gömul Flestir leikararnir þurfa að leika áratugi upp fyrir sig í aldri.
Allt með
ólíkindum í
Halanum
Æfing Herdís Ragna og Hanna Margrét í hláturskasti með trúðsnef.