Morgunblaðið - 01.02.2018, Qupperneq 30

30 FRÉTTIRInnlent
MORGUNBLAÐIÐ FIMMTUDAGUR 1. FEBRÚAR 2018
flísar fyrir vandláta
PORCELANOSA
Skútuvogi 6 - Sími 568 6755
FRÉTTASKÝRING
Sigtryggur Sigtryggsson
sisi@mbl.is
Reykjavíkurborg hefur hafnað ósk-
um lóðareiganda í Örfirisey um
breytingar á deiliskipulagi, sem fólu
m.a. í sér aukið byggingamagn.
Athygli vekur að oddvitar meiri-
hlutans voru ekki samstiga í málinu.
Stjórn Faxaflóahafna, undir forsæti
Dags B. Eggertssonar borgarstjóra,
tók jákvætt í þessar óskir. Hins veg-
ar var þeim hafnað í umhverfis- og
skipulagsráði undir forystu Hjálm-
ars Sveinssonar og borgarráði undir
forystu Sigurður Björns Blöndal.
Nú síðast synjaði borgarráð um-
sókn varðandi breytingu á deili-
skipulagi Vesturhafnar vegna lóð-
anna nr. 33, 35 og 37 við Fiskislóð.
Þarna er um að ræða óbyggðar
sjávarlóðir milli olíustöðvarinnar í
Örfirisey og bílaþvottastöðvar
Löðurs. Þar með staðfesti borgarráð
umsögn skipulagsfulltrúa Reykja-
víkur. Fyrr á árinu 2017 hafði
borgarráð hafnað uppbyggingar-
áformum á svonefndum Línbergs-
reit á Granda.
Borgarráð ósammála
Þegar breytingin á deiliskipulagi
Fiskislóðar 33-37 var tekin fyrir í
borgarráði sátu borgarráðsfulltrúar
Sjálfstæðisflokksins hjá við af-
greiðslu málsins. Þeir segjast hins
vegar í bókun telja að möguleikar
svæðisins séu miklu meiri en deili-
skipulagið frá 2015 beri með sér,
enda hafi þar ekki verið horft til
framtíðar og þeirra fjölmörgu tæki-
færa til byggðarþróunar sem geti
legið í nýtingu þessa svæðis. Skipu-
lagið ætti að taka upp og endurskoða
sem fyrst enda gríðarlega mikilvægt
svæði fyrir alla borgina.
Borgarráðsfulltrúar Samfylking-
arinnar, Bjartrar framtíðar, Pírata
og Vinstri grænna lögðu fram svo-
hljóðandi bókun: „Það er alveg rétt
að Örfiriseyjarsvæðið er mjög mikil-
vægt. Það hefur fengið að þróast án
heimilda til stórtækrar uppbygg-
ingar og lóðasameininga. Það fyrir-
komulag hefur skapað svigrúm fyrir
fjölbreytta og blómlega flóru fyrir-
tækja. Við þéttingu byggðar þarf að
forgangsraða svæðum. Þótt það sé
mjög líklegt að Örfirisey muni í
framtíðinni þróast í átt að miðsvæði
telur meirihluti umhverfis- og skipu-
lagsráðs ekki tímabært að hleypa
þeirri þróun af stað.“
Það voru T.ark Arkitektar ehf.
sem sóttu um breytingu á deiliskipu-
lagi Vesturhafnar (Örfirisey) vegna
lóðanna nr. 33, 35 og 37 við Fiski-
slóð. Í breytingunni fólst hækkun á
nýtingarhlutfalli, sameining lóða
ásamt sameiginlegum bílastæðum
sem yrðu að stórum hluta í bíla-
geymslu neðanjarðar.
Í umsögn skipulagsfulltrúa
Reykjavíkur kemur fram að tillagan
geri ráð fyrir þremur byggingum,
samtals 12.009 fermetrar, sem muni
tengjast saman með sameiginlegum
innigarði og bílakjallara. Hug-
myndin sé að byggingarnar verði
samnefnari atvinnulífsins, sjávar-
útvegsins og listsköpunar. Sótt sé
um hækkun á nýtingarhlutfalli, að
sameina lóðir og koma fyrir sam-
eiginlegum bílastæðum sem yrðu að
stórum hluta í bílageymslu neðan-
jarðar.
Skipulagsfulltrúi segir að tillagan
gangi í mörgum atriðum gegn gild-
andi deiliskipulagi fyrir svæðið.
Byggingamagn sé meira en tvöfald-
að og gert sé ráð fyrir tvöföldu
gatnakerfi. Þá sé bílastæðafyrir-
komulag og fjöldi bílastæða umferð-
arskapandi og bent er í þessu sam-
hengi á skýrslu Mannvits en rýni
fyrirtækisins leiddi í ljós að vegirnir
þola 30% meiri umferð áður en þjón-
ustustig lækkar, á háannatíma.
Sem fyrr segir tók skipulags-
fulltrúi síðastliðið haust neikvætt í
hugmyndir um niðurrif og uppbygg-
ingu á svokölluðum Línbergsreit í
Örfirisey.
Í hugmyndinni fólst að rífa átta
hús á reitnum og byggja þess í stað
nýbyggingar, samtals 36.800 fer-
metra. Línbergsreitur afmarkast af
Grunnslóð, Fiskislóð, Djúpslóð og
Grandagarði. Reiturinn er á land-
fyllingu bak við verbúðirnar yst á
Granda. Borgarráð staðfesti umsögn
skipulagsfulltrúans.
Uppbygging ekki tímabær
 Fulltrúar meirihlutans í borgarráði segja Örfirisey mikilvæga en hafna því að auka bygginga-
magn á tveimur lóðum þar  Minnihlutinn segir möguleika svæðisins meiri en skipulag segir til um
Tölvumyndir/T.ark Arkitektar
Fiskislóð 33-37 Hugmyndir arkitekta um uppbyggingu. Um er að ræða þrjár óbyggðar sjávarlóðir. Höfuðstöðvar Forlagsins eru til vinstri á myndinni.
Tillaga að útliti Hugmyndin er að byggingarnar verði samnefnari atvinnulífsins, sjávarútvegs og listsköpunar.
Landið í Örfirisey er eignarland
Faxaflóahafna. Samkvæmt
hafnalögum gerir hafnarstjórn
tillögu að deiliskipulagi til sveit-
arfélagsins sem fer með skipu-
lagsvaldið.
Í báðum tilvikum, þ.e. varð-
andi lóðirnar við Fiskislóð og
Línbergsreitinn, hafði stjórn
Faxaflóahafna tekið jákvætt í
hugmyndir lóðarhafa. Og á báð-
um fundunum var Dagur B. Egg-
ertsson borgarstjóri formaður
stjórnar, en Reykjavíkurborg á
75,5% í fyrirtækinu.
Á fundi stjórnar Faxaflóhafna
16. júní 2017 var eftirfarandi
bókað:
„Línbergsreitur, kynning á
drögum ASK arkitekta að skipu-
lagshugmyndum á reitnum.
Skipulagsfulltrúi kynnti fyrir-
liggjandi hugmyndir. Stjórn
Faxaflóahafna sf. tekur jákvætt
í fyrirliggjandi hugmyndir að því
viðbættu að sjávarútvegi t.d.
með fisk- og matarmarkaði
verði gert hátt undir höfði á lóð-
inni.“
Á fundi stjórnar Faxaflóa-
hafna 18. ágúst 2017 var eftir-
farandi bókað:
„Kynning á tillögu að deili-
skipulagsbreytingu. Breytingin
felur í sér aukið nýtingarhlut-
fall, sameiningu lóða og sam-
eiginlegan bílakjallara við Fiski-
slóð 33-37. Skipulagsfulltrúi
[Faxaflóahafna] fór yfir fyrir-
liggjandi tillögur og tekur
hafnarstjórn jákvætt í erindið
og heimilar að formlegt erindi
verði lagt fyrir umhverfis- og
skipulagsráð Reykjavíkur.“
Stjórnin tók
jákvætt í
hugmyndir
FAXAFLÓAHAFNIR
Örfirisey Mannlíf á Granda.