Skírnir - 01.09.2017, Blaðsíða 284

endi heldur var það meira af praktískum ástæðum að Þrándur flutti
í eigin vinnustofu, ekki síst til að geta spreytt sig á stærri myndum
en þeim sem krókurinn á vinnustofu Odds Nerdrum bauð upp á.
Þrándur lauk svo meistaragráðu í heimspeki frá Háskóla Íslands
árið 2015.
Íslensk saga og sagnahefð
Eins og minnst var á hér að framan er samband Þrándar Þórarins-
sonar við fortíðina og samtímann sérlega áhugavert, en málverk
hans virka mörg hver „gamaldags“, bæði í stíl og efnistökum, og
fátt við fyrstu sýn sem bendir til þess að þetta séu í raun kornung
verk. Eins og áður sagði standa verkin í beinu sambandi við eldri
málarahefðir og verk gömlu meistaranna, en Þrándur hefur lýst því
í viðtali að honum finnist „allt í lagi að fólk segi að málverkin séu
gamaldags, [hann] vildi síður að það segði þau hefðbundin því það
er engin hefð fyrir svona málverkum hér á landi“.1 Þetta er vissulega
mikilvægt að hafa í huga því þótt bæði formið og viðfangsefnin séu
af gömlum meiði þá hefur Þrándur vissulega verið að gera eitthvað
bæði einstakt og nýtt með því að leiða saman gamlar evrópskar mál-
arahefðir og íslensk myndefni, bæði gömul og ný.
Framan af ferli sínum sótti Þrándur efnivið í þjóðleg minni, til
dæmis persónur og atburði úr þjóðsögum og Íslendingasögum, svo
og ýmis valin augnablik úr Íslandssögunni. Hann hélt sína fyrstu
einkasýningu í húsi O. Johnson & Kaaber í Reykjavík árið 2008 og
þar leyndi sér ekki að málarinn var kominn með rýmri aðstöðu til
að mála því að sumar myndanna voru flennistórar. Stærst var verkið
„Hvarf séra Odds frá Miklabæ“ — 250 × 230 sm. Aðrar myndir á
sýningunni sýndu ýmsa þekkta atburði á raunsæislegan hátt, til
dæmis aftöku Jóns Arasonar og sona hans, Egil Skallagrímsson að
flytja ljóðið Höfuðlausn svo og einn af fundum Fjölnismanna.
Þrándur var á svipuðum slóðum á sýningu sinni „Málverk“ árið
2009 en þar var meðal annars lagt út af minnisstæðum atvikum úr
Íslendingasögum í verkum eins og „Gunnarshólmi“ og „Silfur
548 friðrik sólnes skírnir
1 Úr viðtali í Morgunblaðinu, 23. ágúst 2010.
Skírnir HAUST 2017 (13.10.2017).qxp_Layout 1 20.10.2017 13:46 Page 548