Þjóðmál - 01.09.2018, Page 79

ÞJÓÐMÁL Haust 2018 77
Árið 1976 var Ólympíuskákmótið haldið í Haifa
í Ísrael. Þá mótmæltu flestar arabaþjóðir og
héldu sitt eigið Ólympíuskákmót í Trípólí sem
var lítið og fámennt. Það snerist svo við þegar
mótið var haldið í Dubai í Sameinuðu arabísku
furstadæmunum árið 1986. Þá mættu Ísraels­
menn ekki. Pólítík hefur því sett stóran svip á
Ólympíuskákmótin í gegnum tíðina. Armenar
mættu heldur ekki á Ólympíuskákmótið í
Bakú 2016 í Aserbaídsjan enda eiga þjóðirnar
formlega í stríði.
Allir eru velkomnir á Ólympíuskákmótið í
Batumi í Georgíu, nema þeir sem hafa komið
til Suður­Ossetíu og Abkasíu, en þau héruð
voru hertekin af Rússum árið 2008. Þeir sem
hafa komið þangað geta verið handteknir við
komuna til Georgíu, sem lítur á þau sem sitt
landsvæði.
Ísland á Ólympíuskákmótum
í gegnum tíðina
Íslendingar hafa alls tekið þátt 37 sinnum
á Ólympíuskákmóti; fyrst á þriðja Ólympíu­
skákmótinu árið 1930. Síðan 1952 hefur
Ísland ávallt tekið þátt. Þess fyrir utan tefldi
Ísland á hinu umdeilda Ólympíuskákmóti í
Þýskalandi nasismans árið 1936.
Íslandi hefur oftsinnis gengið vel á Ólympíu­
skákmóti. Fræg er þátttakan á Ólympíuskák­
mótinu í Buenos Aires 1939 sem fram fór í
stríðsbyrjun. Þá þurftu íslensku keppendurnir
að ferðast í þrjár vikur til að komast til baka!
Þá vann liðið b­keppnina og Copa
Argentina­bikarinn, sem var mikið afrek.
Tímabilið 1984­1996 var sannkallað gullaldar­
tímabil Íslands. Þá endaði íslenska liðið
aldrei neðar en í 22. sæti og þrívegis á topp
10. Besti árangurinn var í Dubai 1986 þegar
íslenska liðið endaði í fimmta sæti. Um það
afrek skrifuðu dr. Kristján Guðmundsson og
Jón L. Árnason stórgóða bók; Skákstríð við
Persaflóa.
Ísland hefur heldur gefið eftir á heimsvísu
þrátt fyrir að vera enn með sterkasta landslið
heims miðað við höfðatölu! Síðustu ár hefur
íslenska liðið endað í kringum í 40. sæti.
Kvennaliðið
Á Ólympíuskákmótum er teflt í opnum
flokki og kvennaflokki. Skákkonur geta teflt
í opnum flokki og gera það stundum. Judit
Polgar tefldi ávallt í opnum flokki fyrir Ung­
verjaland.
Ísland sendi fyrst kvennalið til keppni árið
1978. Þá ætlaði Skáksambandið ekki að
senda lið. Birna Norðdahl, sem þá var ein
sterkasta skákkona landsins, barði þá í
borðið og sagði „Við förum samt“ og safnaði
sjálf fullum farareyri. Ísland sendi ekki lið á
árunum 1986­1998, enda voru þá afar fáar
konur teflandi hérlendis.
Síðan árið 2000 hefur íslenskt kvennalið
ávallt tekið þátt. Kvennaliðið hefur síðustu ár
verið í kringum 50­60. sæti.
Ólympíuhópurinn 1978 ­ fyrsta kvennaliðið
sem sent var. Birna Norðdahl lengst til vinstri.
Guðlaug Þorsteinsdóttir önnur til hægri.