Þjóðmál - 01.12.2019, Page 30

28 ÞJÓÐMÁL Vetur 2019
Höfum brugðist ungu fólki
Þá að öðru en kjarasamningum. Hlutverk
SA er mun víðtækara en að semja um kaup
og kjör á almennum vinnumarkaði og ekki
úr vegi að spyrja Halldór Benjamín um aðra
þætti sem snúa að starfi SA og þær áskoranir
sem atvinnulífið stendur frammi fyrir á næstu
árum og áratugum. Ein af þeim eru menntamál
í víðum skilningi. SA birtu í byrjun nóvember
skýrslu sem nefnist Menntun og færni við
hæfi. Í henni er að finna um þrjátíu tillögur
sem miða að því að bæta öll skólastig,
framhaldsfræðslu og umgjörð menntamála.
„Kjarasamningar eru samningar um
uppbyggingu lífskjara fólks og jákvæða
þróun samfélagsins. Það eru þó fjölmargir
aðrir þættir sem skipta máli fyrir lífskjör
þjóðarinnar, meðal annars menntakerfið,
og við höfum skoðun á því og látum hana í
ljós,“ segir Halldór Benjamín aðspurður um
skýrsluna og stöðu menntamála.
„Skýrslan byggist á rannsóknum frá öðrum
þjóðum sem sýna hvað hefur virkað vel og
hvað ekki. Það hafa verið gerðar breytingar
á menntakerfinu á undanförnum árum en
ýmislegt má betur fara. Nefna má mikið
ósamræmi milli þess úr hvaða greinum
nemendur útskrifast og eftirspurnar í
atvinnu lífinu. Verkalýðshreyfingin og SA
vinna saman að mörgum verkefnum. Eitt
þeirra er að meta hvaða störf verða til í
atvinnu lífi framtíðarinnar. Ef við horfum aftur
til nágranna þjóða okkar eins og Breta liggur
þar fyrir með nokkurri nákvæmni hversu
marga sérhæfða hjúkrunarfræðinga muni
vanta á norðurhluta Bretlandseyja eftir tíu ár.
Atvinnulífið, menntakerfið og stjórnvöld
hafa að mörgu leyti brugðist ungu fólki með
því að halda ekki upplýsingum að þeim
um hvar eftirspurnin í atvinnulífinu verður
í framtíðinni. Rannsóknir sem þessar hafa
ekki verið gerðar á Íslandi, en eru nú hafnar.