Gripla - 2021, Síða 214

GRIPLA212
sálmar eftir séra Jón, hver á eftir öðrum. Tveir þeirra eru dagsettir aftast:
„Ort 19 9brs 1645“ og „D. 19 7brs anno 1646.“32 Þá eru þrír sálmar ortir
undir nöfnum barna séra Jóns, uppskrifaðir hver á eftir öðrum: „Hunang
míns hjarta“ undir nafni Helgu, „Réttskínandi ríkdóms andi“ undir
nafni Ragnheiðar og „Gæska þín, Guð, og miskunn mest“ undir nafni
Guðbrands.33 Enn fremur má finna í handritinu sálm sem ortur er undir
nafni Helgu Aradóttur, systur séra Jóns, „Helgasta ljós og ljóminn klár.“34
Þá eru nokkrir sálmar eignaðir bræðrunum Magnúsi og Guðbrandi.
Athyglis verð er einnig vísa sem séra Jón Arason orti um börn sín:
Magnúsi vel vegni,
vandi sið Guðbrandur,
Sigurður sæmdur verði,
soddan óska eg Oddi,
Helgu hamingjan fylgi,
heiður og sæmd Ragnheiðum,
Anna auðnu finni,
Ara Guð bevari.35
Gera má ráð fyrir að slík vísa hafi einkum gildi fyrir fjölskylduna úr
Vatnsfirði þótt vitaskuld gæti hún hafa verið skrifuð upp af óskyldum.
Staðsetning vísunnar og samhengi við annað efni gefur einnig til kynna
ákveðin hugtengsl við ætterni og skáldskap. Næst á undan henni eru þrjú
erindi úr kvæðinu Þakklætisbæn fyrir barnaheill eftir Einar í Eydölum
þar sem hann telur upp börn sín. Yfirskriftin er: „Vísur heiðarlegs og
guðhrædds sr. Einars sáliga Sigurðs sonar á Eydalastað um tölu barna
sinna“ en titill barnavísu séra Jóns er: „Vísur heiðurlegs og vellærðs sr.
Jóns sál. Arasonar um sín börn.“ Þannig eru vísurnar tengdar saman, þær
fjalla báðar um börn viðkomandi skálds en jafnframt um afkomendur séra
Einars Sigurðssonar í Eydölum. Hann var sem sagt langafi Hólmfríðar
Sigurðardóttur (1617–92) móður barna séra Jóns.
32 Lbs 847 4to, bl. 230v.
33 Lbs 847 4to, bl. 181v−86r.
34 Lbs 847 4to, bl. 155v‒56r.
35 Lbs 847 4to, bl. 195v−96r. Vísan er einnig í AM 102 8vo, bl. 21r−v, en handritið er eignað
séra Guðbrandi Jónssyni (1641–90) í Vatnsfirði, bróður Magnúsar í Vigur.