Borgfirðingabók - 01.12.2005, Page 39

Borgfirðingabók 2005
37
HÓLMFRÍÐUR SVEINSDÓTTIR
Ævintýralegur vöxtur
Frá Viðskiptaháskólanum á Bifröst
Viðskiptaháskólinn á Bifröst er afskaplega lifandi staður. Á það
jafnt við um gott mannlíf og stöðuga þróun og öran vöxt staðarins.
Hér á eftir verður gerð stuttleg grein fyrir hvoru tveggja. Lítum fyrst
á þær nýjungar sem átt hafa sér stað undanfarna mánuði á Bifröst.
Heimspeki, hagfrœði og stjórnmálafrœði
Frá og með næsta hausti verður boðið upp á BA nám í nýrri há-
skóladeild, félagsvísinda- og hagfræðideild. Þar er fléttað saman
þremur greinum, heimspeki, hagfræði og stjórnmálafræði. Verður
það í fyrsta skipti sem boðið er upp á þessa námsleið við íslenskan
háskóla. Námið, sem er upprunnið við Oxford háskóla í Englandi, er
þó vel þekkt í hinum enskumælandi heimi undir skammstöfuninni
PPE (Philosophy; Politics and Economics). Námið er samkvæmt
arfleifð skólans, sem hefur menntað stjómendur og leiðtoga fyrir
atvinnulíf og samfélag frá árinu 1918, hugsað sem leiðtoganám.
Inntaka í námið verður takmörkuð, kennsla mun að miklu leyti fara
fram í smáum hópum, auk þess sem allir nemendur fá við upphaf
náms síns sinn tutor, eða handleiðara úr hópi kennara, sem fylgir
honum í gegnum allt námið, leggur til lesefni og hvetur hann áfram
og styður.