Læknaneminn - 01.04.1999, Side 63

Frelsi til vals
Þann 6. maí s.l. var reglugerð um veitingu lækn-
ingaleyfa breytt. Breytingin fól í sér 3ja mánaða
skyldu á heilsugæslustöð. Lítil sem engin umræða
eða kynning hafði átt sér stað þrátt fyrir fyrirspurnir
bæði læknanema og stjórnar FUL (Félags ungra
lækna). Ekki fylgdi nein útfærsla á skipulagi þessarar
vinnu eða tilgangi breytingarinnar. Var breytingunni
og hvernig að henni var staðið harðlega mótmælt
bæði af unglæknum og læknanemum. Vandi heilsu-
gæslunnar er mikill, en verður ekki leystur með nauð-
ungarvist kandídata í heilsugæslu.
Fyrri reglugerð hafði boðið upp á allt að fjögurra
mánaða val kandídata til að starfa í heilsugæslu. Hafa
sumir nýtt sér þennan valkost og áhuginn farið frekar
vaxandi, auk þess sem mjög margir hafa kynnst starfi
í heilsugæslu við afleysingar í læknanáminu. For-
svarsmenn heilsugæslunnar innan læknadeildarinnar
hafa hins vegar lítið gert í því að hvetja nýútskrifaða
læknanema til að nýta sér þennan valkost eða gera
hann fýsilegri en að starfa á spítala. Verulegur skort-
ur hefur verið á kennslu í heimilislækningum og
námsstöðum á Stór-Reykjavíkursvæðinu. Sjúkrahús-
in og deildir innan þeirra hafa hins vegar keppt sín á
milli um kandídata, sem tvímælalaust hefur haft mjög
jákvæð áhrif á kennslu og aðstöðu unglækna á sjúkra-
húsunum. Ákveðið frelsi er því unglæknum mjög
mikilvægt enda talið sjálfsagt í flestum öðrum grein-
um. Leiða má að því rök að aukið frelsi í starfsvali
væri æskilegra en frekari skyldur.
Framhaldsmenntunarráð hefur stefnt að samvinnu
við nágrannalönd og viðurkenningu þeirra á íslenkri
framhaldsmenntun og mikilvægt er að sú þróun haldi
áfram. Ljóst er að þriggja mánaða skyldudvöl á
heilsugæslustöðvum mun hafa veruleg áhrif á það
uppbyggingastarf sem átt hefur sér stað við kennslu
og þjálfun unglækna á sjúkrahúsunum auk þess sem
kandídatar hafa þar ákveðinn sess, sem er nauðsyn-
legur við rekstur deildanna. Mikilvægt er því að allar
breytingar á kandídatsárinu verði gerðar í samvinnu
við framhaldsmenntunarráð áður en lítt ígrunduðum
Þórir Auöólfsson
breytingum er skellt á.
Ljóst er að öll góð reynsla kemur sér vel, hvort
sem er í heilsugæslu eða á sjúkradeild. Reglugerðar-
breytingunni fylgdi ekki nein útfærsla, en sú sjálf-
sagða krafa hefur verið gerð, að þær heilsugæslu-
stöðvar, sem taka að sér kandídata, uppfylli ákveðin
skilyrði til að tryggja að dvölin nýtist sem skyldi.
Kandídatsárið er aðeins tólf mánuðir. Hvort skyldu-
dvöl unglæknis á heilsugæslu komi sér betur en starf
annars staðar, hlýtur að miklu leyti að byggjast á
áhuga hans og stefnu til framhaldsnáms. Að skylda
alla til starfa í þrjá mánuði á heilsugæslustöð af tólf
mánuðum námstímans er tvímælalaust of Iangur tími.
Komið hefur til tals að lengja kandídatsárið um tvo til
þrjá mánuði. Flest framhaldsmenntunarprógrömm
eru í tólf mánaða blokkum sem byrja f júní eðajúlí og
því myndi slík lenging tetja flesta sem eru á leiðinni
í framhaldsnám urn eitt ár. Með skipulagsbreytingu
og styttingu á læknanáminu mætti e.t.v. íhuga þann
valkost. Mikilvægt er að námsblokkir okkar á íslandi
haldist í hendur við það sem gerist erlendis svo ekki
verði óeðlilegar tafir í námi og starfi hjá þeim sem
hyggja á framhaldsnám erlendis.
Margt er enn óljóst varðandi framkvæmd nýju
reglugerðarinnar. Æskilegast væri að hún yrði dregin
til baka en í staðinn byðu ákveðnar heilsugæslustöðv-
ar upp á áhugaverðar og skipulagðar stöður fyrir
kandídata með kennslu og stuðningi sem nauðsynleg-
ur er. Það yrði áhugaverður kostur fyrir marga. Eng-
inn efast um að starf við heilsugæslu getur verið gef-
andi, lærdómsríkt og skemmtilegt ef vel er að staðið.
Eins og staðan er þegar þetta er skrifað hefur verið
farið fram á styttingu á skyldunni í tvo mánuði.
Væntanlegur útskriftarárgangur hefur einnig farið
fram á að framkvæmd hennar verði frestað vegna
þeirrar óvissu sem enn ríkir um framkvæmd hennar.
Vonandi verður farið að þessum óskum.
Höfundur er deildarlæknir og formaður Félags
unglœkna
LÆKNANEMINN • 1. tbl. 1999, 52. árg.
59