Mímir - 01.06.2005, Side 6

Frá ritstýrum
„Rit þetta er allmiklu síðar á ferðinni en áformað
var í upphafi. Ber margt til þess, sem ekki skal upp
talið.“ (Mímir, 4. árg., 1. tbl. 1965)
,,Enn einu sinni sér nú Mímir dagsins Ijós. Ekki er
hann í þetta sinn neitt fyrr á ferðinni en oft áður, og
verður hér engum sérstökum um kennt.“ (Mímir, 6.
árg., 1. tbl. 1967)
„Nokkur töf hefur orðið á útgáfu Mími að þessu
sinni, og veldur því einkum verkfall, sem skall á í
byrjun marz.“ (Mímir, 7. árg., 1. tbl. 1968)
„Eins og Mímismönnum og öðrum áskrifendum
blaðsins er kunnugt, er þetta tölublað orðið alllangt
á eftir áætlun." (Mímir, 8. árg„ 1. tbl. 1969)
„Enn lítur Mímir dagsins Ijós. Eins og oft hefur viljað
brenna við hefur útkoma hans dregizt nokkuð.
Hefur margt orðið til að tefja fyrir, sem ekki verður
þó rakið hér.“ (Mímir, 19. árg„ 1. tbl. 1971)
Svona hafa margir ritstjórnarpistlar Mímis hafist
í gegnum árin. Þessari skemmtilegu hefð verður
viðhaldið í þessum pistli einnig, þótt of vægt væri
til orða tekið að segja að blaðið sé í seinna fallinu í
þetta sinn. Nær væri að segja að það sé alltof seint,
svívirðilega seint eða jafnvel ófyrirgefanlega seint,
enda um fjögur ár frá því síðasta tölublað kom út.
En hér er það, þrátt fyrir erfiðleika sem á tímabili
virtust óyfirstíganlegir. Með góðri blöndu af hörku
og þolinmæði tókst að vinna á þeim.
Þetta blað er óhefðbundið á þann hátt að hér er
slegið saman tveimur blöðum. Það er því óvenju
stórt, enda sett saman af tveimur mismunandi
ritstjórnum, og ber svip af því. Við vonum þó að því
verði vel tekið, enda aðdáendur blaðsins líklega
orðnir langeygir eftir nýju eintaki.
Þrátt fyrir þessa seinkun á útgáfunni hafa greinar
þær sem upphaflega voru ritaðar til birtingar í
50. tölublaði vel staðist tímans tönn og er það til
vitnis um góða og metnaðarfulla fræðimennsku
greinahöfunda. Nú vonum við að þetta blað verði
einhverjum hvatning til að gera betur og halda
útgáfunni gangandi, því áhugi á að skrifa í blaðið er
alls ekki af skornum skammti hjá nemendum.
Að öllum öðrum ólöstuðum viljum við þakka
sérstaklega þeim Kristjáni Árnasyni, Sveini Yngva
Egilssyni og Ásdísi Egilsdóttur fyrir skrif sín í
minningu þeirra Hreins Benediktssonar, Matthíasar
Viðars og Sveins Skorra. Einnig þökkum við Herði
Lárussyni áralanga vinnu við uppsetningu blaðsins.
Mímir lifir.
Tinna Sigurðardóttir og Svanhvít Lilja Ingólfsdóttir
4