Skagfirðingabók - 01.01.1975, Blaðsíða 168

SKAGFIRÐINGABÓK
lestrarfélög, annað í austurhreppnum og hitt í vesturhreppnum.
Telur hann þau enn við lýði árið 1940, en í hnignun.10
A þessu er sýnt, að lítill áhugi hefur verið á bóklestri í Fljótum,
og sá fræði- og bókmenntaáhugi, sem víða fór um sveitir á 19.
öld, hefur átt litlu fylgi að fagna á meðal Fljótamanna.
d. Póstþjónustumál
Fyrst verður vart við, að fjallað sé um póstsamgöngur í Fljót-
um árið 1880. Þá hefur komið í ljós, að mikil vanskil hafa orðið
á pósti „að sunnan“, sem dreifa skyldi til Fljóta fyrir milligöngu
bréfhirðingar á Yíðimýri í Skagafirði. Ekki voru fastar ferðir það-
an og í Fljót, heldur einungis til Hofsóss. Nú koma Fljótamenn
saman til fundar þann 7. febrúar 1880 og álykta að skora á sýslu-
mann að beina því til póststjórnar, að pósturinn frá Víðimýri til
Hofsóss verði látinn fara alla leið út í Fljót, og stofnuð verði bréf-
hirðing í Haganesi eða á Barði. Með þessu komist tveir yztu hrepp-
ar í Austur-Skagafirði inn í póstnet landsins, Fellshreppur og
Holtshreppur.11 Mál þetta er tekið fyrir á fundi sýslunefndar
þann 18. febrúar sama ár, og gera nefndarmenn að því góðan róm,
og málið er afgreitt til póststjórnar.12
Ekki hefur póststjórnin orðið við því að gera Haganes að bréf-
hirðingarstað, en Fljótapóstur hefur hins vegar verið látinn fara
með Siglufjarðarpósti, og verða ekki síður vanskil á honum við
það. Þess vegna er á ný hvatt til þess á sýslunefndarfundi 1884,
að sett verði á stofn bréfhirðing í Haganesi.13
Tíu árum síðar er krafa af þessu tagi enn á dagskrá, en þá var
þó svo komið, að stofnað hafði verið til bréfhirðingar að Hraun-
um. A sýslunefndarfundi 20. febrúar 1894 kemur fram áskorun
til póststjórnar að láta póstinn frá Víðimýri til Siglufjarðar skilja
eftir sendingar til Vesturfljóta í Haganesi.14 Hefur nú loksins
orðið að þessu, en árið 1896 ákveður sýslunefnd að flytja bréf-
hirðinguna frá Haganesi að Barði.15 Má því telja póstsamgöngur
orðnar viðunandi, er hér var komið sögu, þ. e. skömmu fyrir alda-
mótin.
166