Árbók Landsbókasafns Íslands - Nýr flokkur - 01.01.1987, Blaðsíða 20

20
BRÉF NOKKURRA FRÆÐIMANNA
Ekki get ég sagt þér neinar fréttir af sjálfum mér, því ég mundi þar
hvorki sjá upphaf né enda. Þú réðst mér í vetur að hlusta á þá Schiller
og Mc. Dougall. Ég þekki þá báða, var t. d. í gærkveldi með Schiller í
dinner í Hall í Corpus Christi. Hef líka hlustað á fyrirlestra hans.
Hann er merkismaður. Mc. Dougall heldur enga fyrirlestra, en ég
þekki hann persónulega. Hann er konunglegur maður ásýndum.
Einn kunningja þinna hef ég hitt hér, Mr. Geo. Ainslie Hight, sem
var með Eiríki í Rúðuborg 1911. Hann er nú aðskrifa Thesis (B. Litt.)
um íslendingasögur, þó aldraður sé.
1. júlí.
Kom þessu ekki lengra um daginn, en nú mun ferð falla, og bind ég
því enda á. Ég skal segja þér, að ég hef oft gripið í bókina þína síðan
og lesið kafla og kafla aftur. Og ég óska oft, að fleira væri til af slíkum
bókum á íslenzku, en þetta kom mér til að hugsa um „Hug og heim“,
sem ég auðvitað skildi eftir ,magasíneraðan‘ í Höfn, eins og allar
mínar bækur. Vinur minn einn hér hefur gefið mér Njálu og Lilju, og
Sigfús sendi mér Sálarfræði Ágústs í póstinum. Jæja, þú veizt, að ég
tel til skuldar á hendur þér, sem ég er nú búinn að gleyma, hvað er
stór, en hitt man ég, að ég vildi hafa hana borgaða í kúníaki. Nú sé ég
mig um hönd og bið þig að borga hana í Hug og heimi! Er þér engin
vorkunn að kúga bókina út úr forleggjaranum fyrir ekkert, og hefur
þá hvárrtveggi vel, þú borgar skuld þína þér að kostnaðarlausu [og
óska ég öllum skuldum slíkar farir eða aðrar verri], ég fæ bókina, sem
mér er gulli betri, en bóksalinn geldur maklegur ranglætis Svíanna.
Hér er sólskin og kuldi og gott að vinna. Hreifist héðan ekki, meðan
svo er. Hef hugann fullan af efni að skrifa um, fyrir utan allar mínar
lestrarfyrirætlanir, en framkvæmi aðeins í brotum eins og gengur.
Það er hart að vera ekki nema einhamur, hart að vera manneskja. Og
við því geta engin vinnuvísindi hjálpað, það er sjúkdómur, sem við
erum fæddir með og úr honum deyjum við. Bara að við deyjum ekki
alveg. Ég kemst ekki með nokkuru móti af án trúar á annað líf. En
hvar get ég fengið hana? Borgar sig að lesa Myers t.d.??
Jæja, maturinn bíður á borðinu, og á eftir ætla ég í Organ Recital í
New College Chapel. Annað eins orgel er ekki til í Danaveldi og varla
á Norðurlöndum. Það á heilt orkestur í sér og hvert hljóðfæri í því
orkestri fallegra en það á að sér. Ég öfunda sjálfan mig. Það er
dýrðlegt að vera þar, sem nær til slíkra hluta.