Réttur - 01.10.1949, Side 8
200
RÉTTUR
ríkin og auðvaldsríki Vestur-Evrópu nú neita að kaupa af okkur.
Stórfelld, skipulögð, vaxandi viðskipti íslands við sósíalistisku
löndin, myndi skapa möguleika fyrir sífelldar, óslitnar framfarir
hér á landi og losa ísland út úr kreppu, sem ella myndi eyðileggja
það f járhagslega.
Andúð íslenzku yfirstéttarinnar á viðskiptum
við lönd sósíalismans
íslenzku yfirstéttinni er ekkert um það gefið að viðskiptum þjóð-
arinnar verði beint meira í Austurveg, jafnvel þótt hún sannfærðist
um að það væri þjóðinni sem heild betra og myndi skapa henni
öruggari lífsafkomu. Orsakirnar eru hagsmunir voldugustu ein-
staklinganna innan yfirstéttarinnar, sem einvörðungu líta á sína
hagsmuni, en ekki þjóðarheildarinnar. Er hér um að ræða vold-
ugustu heildsalana (innflytjendurna) annars vegar og voldugustu
útflytjendurna hins vegar. Skal þetta nánar tilgreint.
Voldugustu innflytjendurnir hafa mjög náin sambönd við auð-
hringi Bretlands og annarra auðvaldslanda. „íslenzku“ olíufélögin
eru launaðir umboðsmenn hinna forríku olíuhringa, Standard Oil,
Shell og Anglo-Iranian. Aðrir heildsalar eru launaðir umboðsmenn
fyrir rafmagnshringi, gúmmíhringi, kornhringi og aðra auðhringi.
Þeir fá hlutdeild í ofsagróða þessara hringa, jafnvel möguleika
með „sérstöku samkomulagi" að fá einhvern hluta hans í erlendum
gjaldeyri, utan við allt gjaldeyriseftirlit. Þessi „hlunnindi“ væru
hinir voldugu heildsalar smeykir við að missa, ef mikið af þessum
viðskiptum færu allt í einu til sósíalistisku landanna. Þess vegna
beita þeir áhrifum sínum gegn slíkri viðskiptapólitík. Og þessir
heildsalar eru uppistaðan í Sjálfstæðisflokknum fjárhagslega.
Við þetta bætist svo pólitísk andúð þessara manna á því að auka
viðskipti íslands við lönd sósíalismans, sem þeir hata. — Og auk
þess ber einnig að taka með í reikninginn skefjalausa fáfræði og
ofstæki ýmsra þessara manna. Þeir trúa því ekki, að hægt sé að
hafa viðskipti við þessi lönd!