Morgunblaðið - 08.02.2008, Síða 18

18 FÖSTUDAGUR 8. FEBRÚAR 2008 MORGUNBLAÐIÐ
ERLENT
Vilnius. AP. | Varnar-
málaráðherrar þeirra
NATO-ríkja, sem eru í
fararbroddi í baráttunni
gegn talibönum í Afgan-
istan, lögðu í gær fast að
öðrum aðildarlöndum
Atlantshafsbandalagsins
að leggja meira af mörk-
um til baráttunnar og
senda fleiri hermenn til
landsins. Þeir vöruðu við
því að tregða ríkjanna til að leggja til her-
menn stefndi markmiðum NATO í hættu og
gæti leitt til klofnings innan bandalagsins.
Robert Gates, varnarmálaráðherra
Bandaríkjanna, sagði á NATO-fundi í
Litháen í gær að deilan hefði „varpað
skugga“ á framtíð bandalagsins.
Peter McKay, varnarmálaráðherra Kan-
ada, sagði að stjórn landsins myndi kalla
2.500 manna herlið sitt frá mikilvægri bæki-
stöð í Kandahar ef önnur NATO-ríki sendu
ekki þúsund manna liðsauka þangað.
„Við leysum ekki vandann í Afganistan
nema fleiri hermenn verði sendir til suður-
hluta landsins,“ sagði Søren Gade, varnar-
málaráðherra Danmerkur.
Varað við
klofningi
NATO
Robert Gates varn-
armálaráðherra.
Ríki hvött til að senda
liðsauka til Afganistans
VÍSINDAMENN í Þýskalandi segja að
húðflúrstæknin geti verið kjörin leið til
að koma bóluefnum í líkamann.
Vísindamennirnir segja að húðflúrs-
nálar, sem titra mjög ört geti reynst
gagnleg leið til að koma bóluefnum
undir hörundið í stað óuppleysanlegs
bleks.
Tilraunir á músum hafa leitt í ljós að
þessi aðferð gefur af sér sextán sinnum
meiri mótefni en stunga í vöðvavef með
venjulegri sprautu. Mótefnamagnið er
vísbending um hversu sterk viðbrögð
ónæmiskerfisins eru.
Húðflúrsaðferðin gæti verið gagnleg
leið til að koma bóluefnum í fólk í lækn-
ingaskyni, til að mynda gegn krabba-
meini. Slík bóluefni hafa oft ekki næg
áhrif á ónæmiskerfi líkamans þegar
venjulegar sprautur eru notaðar, að því
er fram kom á fréttavef breska rík-
isútvarpsins, BBC.
Vísindamennirnir segja að húðflúrs-
nálarnar myndu aldrei henta til að
koma fyrirbyggjandi bóluefnum, til að
mynda gegn mislingum, í börn þar sem
sársaukinn yrði of mikill.
Bólusett með
húðflúrsnálum
♦♦♦
Eftir Baldur Arnarson
baldura@mbl.is
EFTIR úrslit forkosninganna á
þriðjudag, „Stóra þriðjudaginn“,
búa demókratarnir Barack Obama
og Hillary Clinton sig undir langa
og stranga baráttu um að hljóta út-
nefningu flokks síns fyrir forseta-
kosningarnar í nóvember.
Slagurinn á milli þeirra er ein-
staklega harður og samkvæmt
CNN-sjónvarpsstöðinni munaði
aðeins rúmlega 50.000 atkvæðum á
þeim þegar á 15. milljón demó-
krata kaus á þriðjudaginn.
Flest bendir til að barátta þeirra
verði langvarandi, sem gæti nýst
repúblikananum John McCain sem
telst nú óskoraður fulltrúi flokks
síns í haust.
Tvær hliðar eru á þessari stöðu.
Annars vegar gæti skortur á sam-
keppni dregið úr umfjöllun um
McCain meðan þau baða sig í sviðs-
ljósinu. Hins vegar þýðir brott-
hvarf Romneys að McCain fær
dýrmætan tíma til að sætta ólíkar
fylkingar í Repúblikanaflokknum
og sannfæra þá íhaldssömustu um
að hann sé þeirra fulltrúi og ekki of
frjálslyndur eins og álitsgjafar á
hægri vængnum hafa látið í veðri
vaka síðustu vikurnar.
Eitt af því sem gerir kosning-
arnar sögulegar er hið gríðarlega
fé sem Clinton og Obama hafa
safnað. Blaðamanni reiknast til að
upphæðin hafi verið komin í sam-
tals 275 milljónir dala síðdegis að
íslenskum tíma í gær – hann hafi
alls safnað 142 milljónum, hún 132
milljónum, alls 18,4 milljörðum.
Obama safnaði mun meira fé í
janúar eða 32 milljónum dala, Clin-
ton um 14 milljónum, og komu þar
af 5 milljónir dala úr hennar eigin
vasa, til að brúa bilið á milli þeirra.
Jafnframt hefur hluti starfsfólks
hennar samþykkt að vinna launa-
laust að framboðinu tímabundið,
nú þegar herbúðir hennar leggja
megináherslu á að safna nægu fé
fyrir forkosningarnar 4. mars þeg-
ar kosið verður í Texas og Ohio.
Á laugardaginn fara fram for-
kosningar hjá demókrötum í Loui-
siana og Nebraska og í Maine á
sunnudag. Á þriðjudaginn verður
svo kosið í Maryland, Virginíu og
höfuðborginni Washington og að
sögn dagblaðsins Washington Post
spá ráðgjafar Obama því að hann
verði þá búinn að tryggja sér at-
kvæði alls 910 fulltrúa, hún 882.
Er þá ekki tekið tillit til atkvæða
„ofurfulltrúa“, flokksmanna demó-
krata sem hafa sjálfkrafa atkvæð-
isrétt, en Clinton er talin hafa
tryggt sér fleiri atkvæði hjá þeim.
Texas og Ohio gefa marga full-
trúa og á næstu dögum hyggst
kosningalið Obama opna tíu skrif-
stofur í ríkinu, þar sem Clinton
hefur nokkurt forskot meðal kjós-
enda af rómönskum uppruna.
Obama og Clinton búa sig
undir langvinna baráttu
Ákvörðun Romneys gæti dregið úr möguleikum Demókrataflokksins í haust
AP
Næsti forseti? Clinton fagnar sl.
þriðjudagskvöld í New York.
AP
Sigurstund Obama fagnar með
sínu fólki í Chicago á þriðjudag.
Moskvu. AFP. | Vladímír Pútín er
þekktur sem forseti Rússlands, júdó-
kappi og fyrrverandi njósnari KGB
en lítið er vitað um einkalíf hans. Nú
hefur verið gerð kvikmynd sem sögð
er byggjast á einkalífi forsetans og
fjalla um ástmanninn Vladímír Pútín.
Kvikmyndin „Koss – í trúnaði“
verður gefin út á DVD-diskum á Val-
entínusardeginum á fimmtudaginn
kemur en ekki sýnd í kvikmynda-
húsum.
Nafn Pútíns er ekki notað í mynd-
inni en söguþráðurinn byggist
greinilega á einkalífi hans. Myndin
fjallar um mann frá Sankti-
Pétursborg, sem talar þýsku, er í
leynilegu starfi, kvænist flugfreyju
sem heitir Ljúdmíla (eins og eig-
inkona forsetans), eignast með henni
tvær dætur og verður forseti Rúss-
lands.
„Hvernig er hann í einkalífinu og í
fjölskyldunni? Hvað býr í sál hans?
Er pláss fyrir ástina í hjarta hans?“
er spurt í kynningarbæklingi um
myndina.
Í myndinni er svarið við síðustu
spurningunni já.
Leikarinn Andrej Panin sýnir vin-
gjarnlegri og mildari hlið á forset-
anum.
„Mamma, hann er bara venjulegur
maður,“ segir eiginkona aðalsögu-
hetjunnar í myndinni. Darja Míkhaí-
lova leikur hana og þykir talsvert lík
forsetafrúnni.
Bannhelgin rofin
Eiginkona Pútíns kemur sjaldan
fram opinberlega og nær engar
myndir hafa verið birtar af tveimur
dætrum þeirra eftir að þær urðu full-
vaxta.
Í myndinni virðist bannhelgin vera
rofin. „Viljið þið vita hvort það eru
einhverjar ástarsenur í myndinni?“
spurði framleiðandinn Anatolí Vor-
opajev blaðamenn. „Nei, það er ekki
skyggnst inn í svefnherbergið.“
„Víst!“ sagði þó leikkonan Míkhaí-
lova.
Lokið var við myndina fyrir fimm
árum og vangaveltur hafa verið um
hvort stjórnvöld í Kreml hafi beitt
sér fyrir því að útgáfu hennar yrði
frestað þar til nú, nokkrum vikum
áður en Pútín lætur af forsetaemb-
ættinu. Einnig þykir það undarlegt
að myndin skuli ekki vera sýnd í
kvikmyndahúsum.
Voropajev neitaði því að Kreml-
verjar hefðu beitt sér gegn því að
myndin yrði sýnd og sagði að útgáf-
unni hefði verið frestað „af persónu-
legum ástæðum“. Hann viðurkenndi
þó að segja mætti að hann hefði hætt
sér út á hálan ís því hann yrði örugg-
lega sakaður um „persónudýrkun“
og að starfa „í þágu einhvers konar
afla og taka við skipunum frá stjórn-
völdum“.
Sögð fjalla um ástalíf Pútíns
Ný rússnesk kvikmynd er sögð svipta hulunni af einkalífi forseta Rússlands
AP
Persónudýrkun? Pútín veiðir á
stöng á mynd sem birt var í fyrra.
NÆR 1.500 manns hafa þurft að
flýja heimili sín vegna eldgoss sem
hófst í Tungurahua-fjalli í Ekvador
í fyrradag. Um 20.000 manns búa í
tíu bæjum og þorpum í grennd við
fjallið sem er 5.029 metra hátt og
135 km sunnan við höfuðborgina
Quito.
Eldgosið hefur ekki valdið mann-
skaða eða eignatjóni. Sex menn
biðu bana og 6.500 manns misstu
heimili sín í eldgosi í Tungurahua í
ágúst 2006.
Hundruð flýja
vegna eldgoss
AP
Gos Íbúar þorps í grennd við eld-
fjallið Tungurahua í Ekvador.
ALLIR stjórnmálamenn sem ætla
að klifra í efstu embætti þurfa að
búa yfir þeim eiginleika að geta
hrifið stuðningsmenn og fylkt
þeim að baki sér.
Mikilvægi þessa hefur komið
glöggt fram í forkosningunum
vestanhafs og er þá að sjálfsögðu
átt við margumfjallaðan kjör-
þokka Obama og þá hrifning-
arvímu sem hann virðist geta
dregið upp úr hatti sínum í hvert
sinn sem hann kemur fram á kjör-
fundum. Og eins og sjá má af
myndunum hér til hliðar snerta
ræður hans dýpstu strengi sálar-
lífsins hjá aðdáendum hans.
Ekki voru allir á því að Obama
myndi velgja Clinton svo verulega
undir uggum og í fréttaskýringu
New York Times í gær er gert að
sérstöku umtalsefni hversu hálir
álitsgjafarnir hafa verið á svell-
inu í spám sínum um möguleika
frambjóðenda beggja flokka.
„Framboði McCains er lokið,“
skrifaði Charlie Cook í National
Journal 14. júlí sl. „Forsetafrúin
fyrrverandi sýnist líklegri með
hverjum deginum til að hljóta út-
nefningu,“ sagði í fréttaskýringu
AP-fréttastofunnar 25. okt. sl.
„Það væri eins og ef New York
Mets mættu New York Yankees,“
sagði Chris Matthews á MSNBC 3.
október sl. og taldi fullvíst að
Rudy Giuliani og Clinton, sem
bæði hafa gegnt mikilvægum
embættum í „Stóra eplinu“,
myndu bítast í forsetakosningum.
Blaðamönnum er þó sú vor-
kunn að forkosningarnar eru
óvenjuspennandi og ófyrirsjáan-
legar og má segja að þær séu í
senn draumur og martröð fjöl-
miðlafólks, sem hefur sjaldan eða
aldrei haft úr jafnmiklu að moða
svo snemma í kosningaferlinu.
Aðeins eru nokkrir dagar liðnir
frá því Fred Barnes, ritstjóri The
Weekly Standard, lét þau orð falla
á Fox News-stöðinni að honum
þætti sjálfumgleði af hálfu Mikes
Huckabees að halda framboðinu
áfram. Nú er sá Huckabee talinn
líklegt varaforsetaefni McCains.
Konurnar falla í stafi og spekingarnir
skjóta hátt yfir markið í greiningunni
AP
Hrífur Ung kona grætur er hún
kemst nærri Obama í Chicago.
AP
Agndofa Blökkukona á erfitt með
tilfinningarnar á fundi Obama.
MITT Romney tilkynnti flokks-
bræðrum sínum í Repúblikana-
flokknum í gær að hann hefði dreg-
ið framboð sitt í
forkosningun-
um til baka.
Síðasta sum-
ar voru margir
búnir að af-
skrifa John Mc-
Cain og þýðir
ákvörðun Rom-
neys nú að sá
fyrrnefndi er
öruggur með útnefningu flokksins.
Romney þótti öflugur frambjóð-
andi, vel að sér í efnahagsmálum
og íhaldssamur í mörgum málum.
Í ræðu sinni í gær gaf Romney
þá ástæðu fyrir skrefinu að slagur
við McCain myndi seinka því að
forsetaframboð repúblikana færi í
fullan gang og þar með styrkja
framboð Obamas og Clintons.
Romney vonaðist til að verða
fyrsti forsetinn sem er mormóni og
voru ófáir evangelistar sagðir tor-
tryggja hann, en Mike Huckabee
er helsti fulltrúi þeirra nú.
Romney
hættur
Mitt Romney