Kirkjuritið - 01.09.1953, Blaðsíða 24

170
KIRKJURITIÐ
eins og áður prestarnir á Mosfelli í Mosfellssveit og Mosfelli í
Grímsnesi.
4. Staðarhraunsprestakall í Mýraprófastsdæmi; því þjóna
prestarnir í Söðulsholti og Borg á Mýrum.
5. Staðarhólsþing í Dalaprófastsdæmi, og þjónar því prestur-
inn í Hvammi.
6. Brjánslækjarprestakall í Barðastrandarprófastsdæmi, og
er því þjónað af prestinum í Flatey.
7. Hrafnseyrarprestakall í V.-ísafjarðarprófastsdæmi, er
presturinn á Bíldudal þjónar.
8. Skútustaðaprestakall í S.-Þingeyjarprófastsdæmi; því
þjónar presturinn á Grenjaðarstað.
9. Raufarhafnarprestakall í N.-Þingeyjarprófastsdæmi, og
þjóna því prestarnir á Skinnastað og Sauðanesi. En nú hefi ég
í dag vígt guðfræðikandidat Ingimar Ingimarsson sem settan
prest í þetta prestakall, svo að raunverulega eru prestlaus köll
aðeins átta.
Eins og ég gat um í síðustu skýrslu, hefir nemendum mjög
fjölgað í guðfræðideild Háskólans hin síðustu ár. Þar munu nú
vera um eða yfir f jörutíu manns. Og nú í vor útskrifuðust það-
an 5 kandidatar, þeir: Árni Sigurðsson, Bragi Friðriksson, Guð-
mundur Óli Ólafsson, Ingimar Ingimarsson og Óskar Höskuldur
Finnbogason.
Má því segja, að prestafæðin, sem mjög hefir háð starfi kirkj-
unnar á undanförnum áratugum, sé nú úr sögunni, og sá tími
nærri, að skipað verði í hvert einasta prestakall á landinu. Og
það, sem veldur því, að þetta er ekki nú þegar orðið, er það,
hve byggingarmálum prestssetranna miðar hægt áfram, frem-
ur en hitt, að menn skorti til þess að starfa á vegum kirkjunnar.
Næst skal vikið að kirkjumálum á síðasta Alþingi. Um það
get ég verið fáorður, þar sem þau mál munu koma sérstaklega
til umræðu hér á prestastefnunni. Eins og þið vitið, þá voru á
þessu þingi samþykkt lög um heimild fyrir kirkjumálaráðherra
til þess að taka leigunámi og byggja á erfðaleigu hluta af prests-
setursjörðum. Hér er kirkjumálaráðherra fengin í hendur heim-
ild til þess að hluta í sundur prestssetursjarðirnar án samþykkis
og jafnvel beinlínis gegn vilja hlutaðeigandi prests og safnaðar.