Uppeldi og menntun - 01.01.1998, Blaðsíða 32

SAMSTARF HEIMILA OG FRAMHALDSSKÓLA
Baksviðsbreytnr
Spearmans hró stuðullinn var notaður til að skoða fylgni ýmissa baksviðsbreytna
sem spurt var um í könnuninni. Kom meðal annars fram að stelpur eru hlynntari
samstarfi en strákar (0,13; p<0,01) og yngri nemendur eru hlynntari því en eldri
nemendur (-0,11; p<0,05). Menntun foreldra virðist hafa áhrif á afstöðu þeirra til
samstarfs á þá leið að þeir foreldrar sem hafa meiri menntun eru óánægðari með
núverandi stöðu mála og hlynntari samstarfi en þeir sem hafa minni menntun
(-0,26; p<0,05). Ekki kom fram munur á viðhorfum foreldra til samstarfs eftir kyn-
ferði þeirra, aldri eða hvort nemendur séu enn á framfæri þeirra. Meðal kennara
kom fram fylgni milli viðhorfa til samstarfs og kynferðis þar sem konur í hópi
kennara eru hlynntari samstarfi en karlar (0,20; p<0,01).
Áherslur í samstarfi
Þegar skoðuð eru viðhorf nemenda, foreldra og kennara til þess um hvað samstarf
eigi að snúast sést að flestir telja að samstarf eigi einkum að snúast um það að upp-
lýsa samfélagið um skólann til að auka skilning þess á þörfum hans og einnig um
tengsl skóla og samfélags (t.d. upplýsingar um vinnumarkað, félagsleg og heilsu-
farsleg úrræði). Nokkuð margir nemendur vilja einnig samstarf um innihald náms
og heimavinnu, vanda einstakra nemenda og skipulag skólastarfs. Margir foreldrar
vilja einnig samstarf í tengslum við innihald náms og heimavinnu auk vanda ein-
stakra nemenda. Margir kennarar eru einnig á þeirri skoðun að samstarf eigi að
snúast um vanda einstakra nemenda (sjá Töflu 3).
Þegar spurt er nánar út í framkvæmd samstarfs kemur fram að meirihluta
nemenda finnst mikilvægt að foreldrar fái margvíslegar upplýsingar um skólastarf-
ið. Flestum finnst mikilvægt að foreldrar fái upplýsingar um viðtalstíma starfsfólks
skóla, um sérkennslu og um hegðunarvandkvæði. Þar á eftir nefna nemendur upp-
lýsingar um námsráðgjöf og svo fræðslu um áfengis- eða fíkniefnavanda, síðan
prófkröfur og loks skólasóknarreglur. Fáir telja mikilvægt að foreldrar taki þátt í
þemavikum og félagslífi (sjá Töflu 4).
30