Birtingur - 01.01.1964, Page 5

BLAISE CENDRARS:
ÓBUNDIÐ LJÓÐ UM SÍBERÍULESTINA
O G JÓHÖNNU LITLU FRÁ FR AKKLANDI
Tileinkað tónlistarmönnum
Jón Óskar íslenzkaði
í þann tíð var ég á unglingsaldri
Ég var tæpra sextán ára og mundi vart lengur bernsku mína
Ég var sextán þúsund mílur frá bernsku minni
Ég var í Moskvu, þar sem eru tíu hnndruð og þrír
klukkuturnar og sjö brautarstöðvar
Og ég fékk ekki nóg af þessum sjö stöðvum og
tíu hundruð og þrem turnum
Því æska mín var þá svo brennandi og tryllt
Að stundum logaði hjarta mitt eins og Efesusshofið
eða einsog Rauða torgið í Moskvu
Þegar sólin gengur undir
Og augu mín lýstu gamla vegi
Og ég var þegar orðinn svo vont skáld
Að ég gat ekki haldið leiðina á enda
Kreml var einsog gríðarstór terta
Gullinskorpa
Með stórar möndlur mjallahvítra kirknanna
og hunangsgull klukknanna ...
Gamall munkur þuldi mér þjóðsöguna um Hólmgarð
Ég var þyrstur
Og ég stautaði mig fram úr fleygmynduðum stöfum
Og í einu vetfangi hófu dúfur Heilags anda sig til
flugs yfir torgið
Og hendur mínar hófu sig einnig til flugs með
vængjaþyt súlukóngsins
Og þetta voru síðustu minningar síðasta dagsins