Uppeldi og menntun - 01.07.2011, Side 82

Uppeldi og menntUn/icelandic JoUrnal of edUcation 20 (2) 201182
horft Um öxl
Þegar leikskólakennararnir ræddu um þetta atvik gáfu þeir þá skýringu að þessi
strákur hefði byrjað leikskóladvölina illa með því að bíta hin börnin og þó að þeir
hefðu í samstarfi við foreldrana náð að leysa málið farsællega hefði drengurinn orðið
blóraböggull og honum verið kennt um flest sem miður fór. Þeir ræddu líka um þann
möguleika að stúlkurnar hefðu haft hvetjandi áhrif hver á aðra, þ.e. þegar ein fór að
segja sögur af strákunum hefðu hinar munað eftir öðrum. Í huga leikskólakennaranna
var þetta ekki sérstaklega erfitt eða árásargjarnt barn.
Í hinum leikskólanum var áberandi hversu mörg barnanna minntust hvíldarinnar
sem leiðinda. Fyrir sum börnin var þetta biðtími þar sem þau gátu hvorki hvílt sig né
sofið. Í dæminu hér að neðan ræða þrjár stúlkur hvíldina, tilganginn með henni og
hvernig þær litu öðruvísi á hana þegar þær voru yngri.
Anna: Mér fannst mjög leiðinlegt í hvíld.
R.: Er það? Hvað var leiðinlegt í hvíldinni?
Anna: Ég gat aldrei sofnað í hvíldinni.
Sara: Ekki ég heldur. Ég teldi bara upp á tvöhundruð eða hundrað eða eitthvað.
R.: En átti maður að sofna?
Kristín: Nei. Maður gat sofnað.
R.: Já.
Anna: Þetta var bara svona – eitthvað svona fyrir leikskólakennarann.
…
R.: Ert þú sammála því að það hafi verið leiðinlegt að fara í hvíld?
Kristín: Skítleiðinlegt að vera í hvíld.
R.: Einmitt.
Anna: En litlu krakkarnir elska það.
R.: Já. En þið voruð einu sinni litlar í leikskólanum.
Kristín: Ja-há.
Anna: Þá svaf ég eins og lítill engill.
R.: Er það? Var þá gaman að vera í hvíld?
Anna: Já. Út af því að þá gátum við, þú veist. Þá skildum við eiginlega ekki neitt.
Kennaranum í þessum leikskóla var nokkuð brugðið að heyra hvernig börnin töluðu
um hvíldina og sagði að þetta væri ekki eins og hvíldin væri hugsuð eða eins og hún
hefði upplifað þetta. „Það á að vera notalegt að slaka á og þú mátt alveg hreyfa þig.“
Í tengslum við þessa reynslu barnanna ræddu leikskólakennararnir um að á síðasta
ári barnanna í leikskólanum þyrftu þau e.t.v. ekki á eins miklum hvíldartíma að halda
og þegar þau voru yngri. Einn þeirra sagði: „Þetta segir manni svolítið um hvíldina,
þegar þau eru orðin svona gömul þurfa þau kannski ekki að leggjast niður.“
Það sem börnin lærðu í leikskólanum og kom að gagni í
grunnskólanum
Börnin töluðu um fjölbreytta hluti sem þau hefðu gert í leikskólanum; þau hefðu leikið
sér, gert tilraunir, búið til pappír o.fl. En þegar þau voru spurð hvað þau hefðu lært í