Uppeldi og menntun - 01.07.2011, Síða 103

Uppeldi og menntUn/icelandic JoUrnal of edUcation 20 (2) 2011 103
ragný þóra gUðJohnsen og sigrún aðalbJarnardóttir
Greining
Greining gagna hófst með opinni kóðun (Emerson, Fretz og Shaw, 1995). Hugtök voru
dregin út við nákvæman lestur viðtalanna sem voru marglesin þar til mettun kom
fram, þ.e. þar til ekki birtust lengur nýjar áherslur eða þemu í gögnunum (Charmaz,
2006).
Að því búnu var gerð markviss kóðun á gögnunum og þemu fundin sem sett voru
fram í töflu. Þá voru meginþemun flokkuð undir efnisflokkana: Áhugi, Markmið og
Gildi samkvæmt greiningarlíkaninu um borgaravitund. Áhugi vísar til áhuga þeirra á
sjálfboðaliðastörfum og hvernig hann er til kominn. Markmið vísa til markmiða þeirra
með sjálfboðaliðastarfinu og hvaða áhrif þau telja sig geta haft. Gildi þeirra koma fram
í hugsjónum þeirra með starfinu.
sýn ungmEnnanna
Sýn ungmennanna á sjálfboðaliðastarf sitt er hér greind eftir efnisflokkunum: Áhugi,
Markmið og Gildi.
Áhugi ungmennanna
Ungmennin segja hér frá ástæðum þátttöku sinnar í sjálfboðaliðastarfi og hvernig þau
hafa fundið áhuga sínum farveg.
Ari kynntist sjálfboðaliðastarfi í gegnum vin sinn í framhaldsskóla:
Mér fannst eftir að hann [vinurinn] byrjaði í þessu að hann yrði … svona bjartsýnni
og jákvæðari einstaklingur þannig að ég hugsaði að þetta væri eitthvað sem ég ætti
að prófa og fór þá að starfa með æskulýðsfélagi Þjóðkirkjunnar.
Í grunnskóla hafði Ari verið „hlédrægur“ félagslega og ekki haft nægilega sterka
„sjálfsmynd“ að eigin sögn. Hann segist hafa fengið áhuga á samfélagsmálum í fram-
haldsskóla í námskeiði um alþjóðastjórnmál og sögu. Honum finnist „rosalega van-
metið hvað kennarar hafa mikil áhrif“; mikil tækifæri liggi í því „ef kennarinn … reynir
að vera vinur manns og … gerir námsefnið skemmtilegt“. Hann hafi þar „skrifað rit-
gerð um [samskipti Ísraels og Palestínu] og las meira og meira og núna er þetta mál-
efni mér rosalega hjartnæmt“. Nokkru síðar fór hann sem sjálfboðaliði til Palestínu í
þrjá mánuði og hefur fylgt því eftir með kynningarstarfi meðal ungmenna eftir heim-
komuna. Ari sat í skólaráði fyrir hönd nemenda á framhaldsskólaárum sínum og hafði
nýverið hafið störf í ungliðahreyfingu stjórnmálaflokks. Hann segir það „köllun“ sína
að láta gott af sér leiða.
Gunnar segist hafa byrjað í sjálfboðaliðastarfi „alveg óvart“ þegar hann var í
10. bekk. Hann var beðinn að fara á fund til að kynna sér „ungmennastarfið í Rauða
krossinum með það markmið að reyna að starta einhverju í minni heimabyggð“.
Gunnar fluttist skömmu síðar til Reykjavíkur og hefur starfað þar síðan með Rauða
krossinum vegna áhuga á málefnum sem þar er unnið að. Hann segist fljótlega hafa
orðið mjög virkur innan ungliðahreyfingarinnar og tekið þátt í stefnumótunarvinnu í