Glóðafeykir - 01.04.1989, Blaðsíða 71
GLOÐAFEYKIR
69
meir en vit. hann var maður „hinna fornu dyggða”, traustur og
orðheldinn, trúr sjálfum sér og öðrum og fór aldrei rasanda ráði.
Haraldur á Völlum átti mikinn og góðan hlut að sönglífi þessa
héraðs. Hann var gæddur bjartri og óvenju blæfagurri tenórrödd og
hefði vafalaust getað hlotið mikinn frama sem þeir sveitungar hans,
Sigurður Skagfield og Stefán íslandi, ef kosið hefði að gera söng að
ævistarfi, enda sagði Magnús organisti, er svo var jafnan nefndur,
söngkennari við Gagnfræðaskólann á Akureyri, við Harald, að ef
hann eignaðist þúsund krónur, þá skyldi hann „leggja þær í röddina”.
Haraldur eignaðist 1000 krónur, en hann kaus að feta í slóð feðra sinna
og gerast bóndi. Haraldur var einsöngvari með Bændakórnum
skagfirska, er talinn var einn bestur söngflokkur á Islandi á sinni tíð.
Síðar, í árslok 1927, gerðist hann einn af stofnendum karlakórsins
Heimis og söng með honum um nokkurt árabil. Að loknum
glæsilegum söngferli var hann kjörinn heiðursfélagi kórsins.
Haraldur Jónasson var hár maður og íturvaxinn, andlitsfríður og
sviphreinn. Hann var ágætlega greindur og skýr í hugsun,
alvörumaður að eðli, skapríkur og eigi hneigður til undansláttar, þótt
fátalaður væri að jafnaði og þurr á manninn á stundum, en glaðvær í
góðvina hópi og gat þá leikið á als oddi. Hann var drengskaparmaður,
trygglyndur og vinafastur og minnilegur þeim, sem með honum unnu.
Friðrik Jónsson, útgerðarmaður í Hofsósi, lést snögglega hinn 16.
maí 1978.
Hann var fæddur á Grund í Svarfaðardal 23. okt 1894, sonur Jóns
bónda í Brekkukoti í sömu sveit, Friðrikssonar, Jónssonar, og konu
hans Guðrúnar Björnsdóttur frá Jarðbrú í Svarfaðardal. Kona
Friðriks eldra og móðir Jóns í Brekkukoti var Margrét Björnsdóttir
bónda að Grund, Björnssonar, og konu hans Ingigerðar Jónsdóttur,
Olafssonar. „Eru í þessum ættliðum orkumikið greindar- og
dugnaðarfólk og athafnasamt, sem ekki lét bugast þótt oft risu öldur á
ævisjónum”. Svo mælir Snorri Sigfússon, hinn kunni skólamaður og
námstjóri og mátti gerst um vita, enda voru þeir Friðrik í Hofsósi
systrasynir. Mun Friðrik síst hafa farið varhluta af þessum
eðliskostum ættmanna sinna.
Friðrik ólst upp með foreldrum sínum fram yfir fermingaraldur.
Arið 1910 missti hann föður sinn í sjóinn, fluttist eftir það með móður
sinni til Sigríðar systur sinnar og manns hennar Jóns Pálssonar, er
bjuggu að Stafnshóli í Deildardal og síðan að Miðhúsum í Oslandshlíð.