Glóðafeykir - 01.04.1989, Síða 57

GLÓÐAFEYKIR
55
Sigurður Þórðarson, fyrrverandi bóndi á Egg í Hegranesi, lést 12.
jan. 1978.
Hann var fæddur á Hnjúki í Skíðadal 10. okt. 1879, og því fullum
ársfjórðungi betur en 98 ára, er kallið kom. Foreldrar: Þórður bóndi á
Hnjúki Jónsson bónda þar, Þórðarsonar
eldra bónda s.st., Jónssonar bónda á
Hrappsstöðum í Svarfaðardal, Þórðarsonar,
og kona Þórðar yngra Halldóra Jónsdóttir
bónda í Holárkoti Péturssonar og konu hans
Guðlaugar Rögnvaldsdóttur.
Sigurður óx upp með foreldrum sínum á
Hnjúki, hinn 5. í aldursröð 8 alsystkina, átti
auk þess tvö hálfsystkini samfeðra. Þau
Hnjúkshjón voru sæmilega efnum búin,
enda gædd einstökum áhuga, dugnaði og
atorku. Var börnunum haldið snemma til
vinnu og eigi slakað á, svo að nú mundi talin
fullkomin vinnuharka og jafnvel þrældómur.
En öll voru þau systkini búin miklum
manndómi og atorku, svo að orð fór af, og
reyndust samkvæmt því er til aldurs komust
og þroska.
Um tvítugsaldur fór Sigurður til náms við bændaskólann á Hólum í
Hjaltadal og lauk búfræðiprófi 1901. Áður hafði hann eitthvað
stundað barnakennslu í átthögum sínum, en eftir Hóladvöl sína ól
hann aldur sinn allan hér í Skagafirði. Var barnakennari í Hegranesi
veturna 1902-1905, en vann að jarðabótum á sumrum.
Árið 1905 kvæntist Sigurður Pálínu rjómabústýru Jónsdóttur
bónda á Egg, Guðmundssonar bónda á Sleitustöðum í Kolbeinsdal,
Einarssonar, og konu hans Sigríðar Pálsdóttur bónda á Syðri-
Brekkum í Blönduhlíð. Voru þau þremenningar að frændsemi, því
Páll á Brekkum, móðurfaðir Pálínu, var albróðir Jóns á Hnjúki,
föðurbróður Sigurðar. Móðir Sigríðar á Egg og fyrri kona Páls var
Sunneva Þorkelsdóttir bónda á Tungufelli í Svarfaðardal, Jónssonar.
Þau Sigurður og Pálína hófu búskap á Hafsteinsstöðum í
Staðarhreppi árið 1906 og bjuggu þar til 1908, þá eitt ár á Syðri-
Hofdölum, tvö ár að Rein í Hegranesi, en færðu byggð sína árið 1911
að næsta bæ, Egg, föðurleifð Pálínu, og bjuggu þar upp þaðan.
Sigurður missti konu sína síðla árs 1942, en bjó áfram með dætrum
Sigurður
Þórðarson